Read Kambera YAHAKIALU 21 Bible Online

YAHAKIALU 21 - Kambera bible

YAHAKIALU 21

¹I MIRI napanii-ngga,

²“Ha dumu tau nda payatangu, ràtu-nyawa na Yeruhali. Ràtu-njawa da ngia pa-lumungu lai nu. Panamu-nyawa na tana Ihirailu,

³ba tuna yia na paniinggu Nyungga yia MIRI, ‘Nyungga yia muhu-mingga. Napa ku-binjiru hapanda-nggu hi ku-pameti ndàbakai nyimi, tau ma-akatu hamangui tau mahàmu.

⁴Wàngu hapanda-nggu ku-rawaku ndàbaya na tau weli diangu lundu hu luru.

⁵Ka pi-ndàba-nanggaka tau ba Nyungga MIRI, ma-binjiru hapanda-nggu dàngu ba nda jia patiku beli-anggunya, wàna wàmu,’ wànangga.

⁶Ha dumu tau nda payatangu, kaingu-wa dàngu padudurungu-wa la hangga tau Ihirailu beri hama tuna mambata eti dàngu mambota monungu-kau.

⁷Jàka da-paàrangu nggikina hiu padudurungu, panii-njawa ba hawina-munya rukuna na lii langu na manàmu-nya napa. Na lii langu nuna napa na-pakaduku-nja da etida, da-haluputu da limada, nda - ndàndada da kambàku-da, namàli na ringgitu-da. Langatàka jiayaka na rehina, dàngu napa danjadi mbuu ndàbada nuda. Nyungga yia MIRI Hupu Majangga mambàda panii,” wàna.

⁸I MIRI napanii-ngga,

⁹“Ha dumu tau nda payatangu, manyura-wa! Peka-njawa da tau ba tuna yia na paniinggu Nyungga, MIRI, ‘Ninya na hapungu hapanda, hapanda pauda, dàngu pa-padàka.

¹⁰Pa-padàka-ya ka ràka pameti wànguya, pa-pa-kamilihu-ya ka li - lilana. Nduma banjaru-nggu nda ningu-apa hawola ba nda da-kawela-nja mbuu ndàba ba panamu-nja dàngu ba hukunja.[40]

¹¹Hi deliya na hapanda ka naehi mànungu padua la papaki-ya hàla hi wuaya la haàtu matanggu hambàli.

¹²Padudurungu-wa, ha dumu tau nda payatangu, kaladaku-wa dàngu warawa! Ba ehingu-nanya padua-ka na hapanda pa-rawaku-ya na banjaru-nggu. Da liku uru Ihirailu dàngu nggubulu na banjaru napa natanju-nja paraïna hapanda hi lupa da-tàlaru. Tàmbungu-wa kurumu wàngu mila mumuhu-na na etimu,

¹³ba kaka-nggunya na banjaru-nggu, jàka nda da-pahàmu-ya na huri lurida, mbuu ndàbada nuda napa nanggàna-ha nyuda.’[41]

¹⁴Màla dumu, ha tau nda payatangu, manyura-wa. Kapokukungu limamu ka tandaya nduma na hapanda pa-pakiringu pa-hambàli. Kanjupu pa-mangàdatungu-ya nuna na hapanda.[42]

¹⁵Nyuna ma-pawiti-nya hi namàli na tarana na banjaru-nggu hi danjoru pa-nggubulungu. Ku-pangàdu-nya na paraingu-da wànya nuna na hapanda[43] ma-kajilaku ba hama kabilaku-ya, dàngu na ma-ehingu pa-pameti.

¹⁶Ha dumu hapanda dàka, tunguwa la kawana la kalai dàngu la nggi hanggangu bia kikungu pambuha-mu.[44]

¹⁷Napa ku-kapokukungu-mbu limanggu Nyungga hi na-wadaru na hàngganggu. Nyungga yia, MIRI mambàda panii,” wàna.

¹⁸I MIRI napanii-ngga,

¹⁹“Ha dumu tau nda payatangu, nggàmbaru-wa dàmbu ànda peku li ninguna na maràmba Mbambilu na mangàndi hapanda-na. Nuda da ànda da madàmbu-da da-pakiringu welingu la hau paraingu-ma bàdi; na hau na ànda na hanggangu la Ramba, parai tau Amungu; tàka na hau na-hanggangu la Yeruhali, na paraingu maningu ngia pa-torungu-na la Yahunda. Tunya kapapa ai tanda ànda la ngia pa-pakiringu-na pa-kahanga nuna na ànda.[45]

²¹Na maràmba Mbambilu na-ndolaku la lihina nuna na kapapa ai tanda ànda. Keha ka pinya jàka nggi àndaya napali-na, na-paàra-nja da marapu-na na-kanjàku-nja da panana dàngu nakinju eti banda[46] pabidi marakungu.

²²Ka lohangu-nanyaka ba ningu tanda Yeruhali-na na pana papiti wàna lima kawana-na! Nuna nu tanda-nanya ba lupangu bàdi na maràmba na-kaluluku-nya na Yeruhali, hi na-pawolakungu wara pa-kabungu màta da tanatara-na ka da-wandalu-ha da pa-njularu wàngu, patuba-nja nuda nu la pi - pindu bokulu Yeruhali, ka dawulu kabundu tana ka kangeli pa-nggupulu wànguha dàngu ka daàki londa.

²³Da ma-mandapu la Yeruhali nda jia pajia-adanya ba pa-nggupulu-ha nyuda, ba mbàda tura-dudaka pa-njanjingu dàngu na Mbambilu. Tàka ba tuna nu na ngera nyuraya yiana jiaya na-papanamu hahanja napa ba payàpa-ha nyuda ruku njala-mada.

²⁴Nyungga yia MIRI Hupu Majangga kupanii-nja nyuda, ‘Da njalami papingu-ha dàngu mbuu ndàba na tau napinya ba njala-minya. Na akatu-mi nandudu la pawu - wunda-mika. Nàhu toma-nanyaka na rehi kahuku-nggai dàngu wua-nggunggaika la muhumi.’

²⁵Tàka kupanii-nya na maràmba Ihirailu, ‘Ha dumu maràmba ma-akatu dàngu ma-katadaku! Mareni-nanyaka na rehi hukungu-mu na ma-malamiri dehi.

²⁶Nyungga yia MIRI Hupu Majangga mbàda panii-ngguka. Àli-nyawa na tubuku pareta-mu dàngu bunggahu-ya na teramu. Nàhu, pa-njilungu-nanyaka na ndaungu. Jijiku-nyawa na mandapu tau mila dàngu wua-njawa kawaha nyuda! Papuru-njawa da maningu kawahangu welingu la ngia pa-mandapu-da!

²⁷Napa ku-pakabu ndàbaya yiana na paraingu, hi lupangu ningu tanyungguru watuna la nggi - nggini. Na nyuna nuna nu, natàka-mapa bàdi na tau papindi-nggu la pahuku-nya yiana na paraingu hi namangu panjadi. Nyuna-maka ngia pawua-nggunya napa yiana na paraingu,’ ” wàna.

²⁸“Ha dumu tau nda payatangu, manyura-wa! Panii-nyawa na tau Amungu na mambàda pawawa-ya na tau Ihirailu, ba panii-nggunya Nyungga yia, MIRI Hupu Majangga, ‘Na hapungu hapanda ehingu-mana-nyaka pa-hambàli; nuna na hapanda padeli pa-kajilaku-mayaka hama tuna kabilaku, ka na-ehingu pa-pameti.

²⁹Na harii mata paita-mi ma-kabàli-ya, tàka na manyura papeka-mi ma-kakòlulu dàngu ma-kambàliku-mbuya. Mi-akatu nyimi dàngu ikatadaku, tàka na rehi hukungu-mi na ma-malamiri dehi mareni-nanyaka. Nuna na hapanda napa na-kadipu-ha da nggorumi.

³⁰Ha dimi tau Amungu, patiku belinya na hapanda-mi! Napa ku-patanda-nggai ngerami la ngia pawulu-kai dàngu la ngia padedi-mi.

³¹Napa ku-hanubuku-nggainya na hàngganggu na ma-mbàringu dàngu napa kuwua-kai la tau mbana eti da ma-manyàmungu pa-patàlaru.

³²Napa imbuta ba nauhu-nggai epi. Da wai riami napa dambungu la tana wikimi, hi nda haàtu-mbupa manamu-kai. Nyungga yia MIRI mambàda panii,’ ” wàna.