Read Kambera YAHAKIALU 22 Bible Online

YAHAKIALU 22 - Kambera bible

YAHAKIALU 22

¹I MIRI napanii-ngga,

²“Ha dumu tau nda payatangu, mbàda ehingu dumuka pa-patanda-nya ngerana na paraingu na ma-mbinungu ma-pameti tau. Paita-nya mbuu ndàba da pawunda-na da pa-mayitangu,” wànangga.

³I MIRI Hupu Majangga na-paràha-ngga pa-patàka-nya yiana na lii langu la Yeruhali, “Unjala nyumu rukuna ba mbàda danguka pa-pameti-mu welingu la ma-mandapu-nggau, dàngu ba mbàda pa-iraku-mu wikimu bau lumungu marapu pa-pandoi wikimu. Jia ba tuna na rehi patanda-nggau ngeramu mareni-nanyaka dàngu lu njàpu-nanyaka na pekamu. Kumàta-nggau ka pa-paakangu dàngu ka pariki wàngukau la ba - banjaru dàngu la mbuu ndàba tana.

⁵Da-paaka-nggau nyumu paraï da paraingu mamarau ma-mareni ba nua nainguna napangga-mu uku dàngu kalaratu.

⁶Mbuu ndàba da liku uru Ihirailu da-hamela wàngu àtalu wikida dàngu da-pameti tau.

⁷Nda haàtu-ma welingu la ma-mandapu-nggau matembi ina amana. Ulapi tau hangàdangu nyumu dàngu upiti pautu wàngu welingu la handuka kawini meti lei dàngu ana mamila.

⁸Upa-kajari-ha da ngia palumu-ngga Nyungga dàngu ndau wàrihu-aha da lodu Hangahu-nggu.

⁹La honga ma-mandapu-nggau ninja da ma-parunda da ma-mbuhangu papawau tau hawiangu ka huku pameti-ha. Ningumbu ma-mbuhangu pangangu tolungu pambàda mangejingu la marapu. Ningumai ma-mbuhangu pa-kajari.

¹⁰Ningu ma-paànga dàngu ma-katuda angungu papaha amana, kawini matàka-nya ariyaa-na,

¹¹papaha tau hawiangu jàka ndia rii anana jàka ndia ana winina ana hau ina.

¹²Ningumbu tau pahewa la pa-pameti tau, ningu ma-lamuji wai ria anguna dàngu ma-lamihi angu banjaru-na. Nyuda nu mbuu ndàbada mbàda maromba-danggaka Nyungga. Nyungga yia MIRI Hupu Majangga mambàda panii.

¹³Tàka nàhu napa ku-nàhaku-ha da tau rambangu dàngu da tau pameti taumu.

¹⁴Utoru mbeni-mapa nu jàka ndia umaka-mapa ihu pa-wulaku limamu ba kuhàla-ka pahuku-nggau? Nyungga yia, MIRI Hupu Majangga mambàda panii dàngu jiangu-ma napa ku-pahàra-nya jàka nggàraya na pambàda paniinggu.

¹⁵Napa kupai - ihanja da ma-mandapu-nggau la mbuu ndàba tana dàngu banjaru, dàngu napa ku-papànja-nya na pawunda-mu na ma-akatu.

¹⁶Napa da-pawawa-kau banjaru hawiangu, ka pi-dumu-nggaka ba MIRI-ka Nyungga,” wàna.

¹⁷Napanii-ngga i MIRI,

¹⁸“Ha dumu tau nda payatangu, nda ningua linguda da tau Ihirailu lai Nyungga. Hama tuna tai bàhi pa-korungu-ha nyuda, hama tuna wudu, tambura, bàhi dàngu tambura mitingu marihi ba hàla pa-paihi mbànginya la epi na àmahu bara.

¹⁹Tàka nàhu Nyungga MIRI Hupu Majangga, kupanii-nja ba hama bàhi manda ningu lingungu-ha nyuda. Hama tuna da karunggu àmahu bara parunggu, bàhi, tambura mitingu dàngu tambura bara ba papuhi la epiha ka paihi mbànginja, tuna numbu ba ku-pauhi-nja nyuda hi kungàndi-ha la Yeruhali. Na hàngganggu na ma-mbàringu napa napalui-ha nyuda hama tuna epi mapalui karohu bàhi.

²¹Langatàka, napa ku-pauhi-nja nyuda la Yeruhali, ku-padukulu-ya na epi hàngganggu la wawada, hi lupa dakabu dalui.

²²Hama ba palui àmahu bara la epi, tuna numbu nyuda ba palui-ha la Yeruhali. Ka pi-duda-nggaka ba Nyungga yia, MIRI, mambàda pulinya na hàngganggu lai nyuda,” wàna.

²³Nahili paniingga i MIRI,

²⁴“Ha dumu tau nda payatangu, paniinya na tau Ihirailu ba na-iraku na tanada nyuda, tuna nuduka hi kuhàngga dàngu hi kuhuku-nja.

²⁵Da liku uruda[47] hama tuna hinga ma-kangaüku-ha mahàla pahoba payàpa-na. Da-pameti rayatu, dawàhi-ha da malanja-da dàngu da pawulu pahunggu-da hi kiri dangu kawini manjadi kawini meti lei.

²⁶Da ratu Ihirailu dapangga-ha da Ukunggu hi da-pairaku-ha da kanaingu pa-pahinggilu ndumanggu Nyungga. Nda daheka-anja nggiha da mauku dàngu nggiha da manda uku. Dàngu nda da-papeka-mbunya na rayatu nggiha da maili dangu nggiha da ma-iraku pa-namatu-nya na kalaratu huri lumungu. Nda da-ihili-anya na lodu Hangahu. Ba tuna nu pawawa-nangga tau Ihirailu.

²⁷Da ma-pangaba la pareta-da hama tuna ahu rumbaha mahi - hira payàpa-na. Himbu-danya utu-ma-ada hi da-pameti tau.

²⁸Da wunangu da-pahini-nja nuda da njala; hama tuna tau ma-apihungu kapu la dindi watu marihaku-ha nyuda. Da harii matada ma-kabàli-ha, hamangui da manyura-da. Na lii langu pa-patàka-da, pangala-ma welingu lai MIRI Hupu Majangga-ya wàda, tàka nda ana panii da-anggunja duku nyuda.

²⁹Da tau mawulu da-palapingu dàngu da-rambangu. Àtalu eti biada na pawunda-da la tau mila dàngu dapiti utuda welingu la tau hangàdangu.

³⁰Kuhimbu tau mapingu pa-pahadangu dindi watu la honga tau Ihirailu, jàka ndia ma-ndolaku la ngia pa-tanyungguru-da da dindi watu, ka padàdu-nya na paraingu la rehi pakabu-nggunya la mbumbaru-na na hàngganggu; ba tuna nda haàtu-mbu pahunggu-nggu.

³¹Jia ba tuna puli-nggunyaka nàhu na hàngganggu lai nyuda, hi hama tuna epika ba ku-patàlaru-ha napa, rukuna mbuu ndàba pawunda-da. Nyungga yia MIRI Hupu Majangga mambàda panii,” wàna.