Read Kambera YAHAKIALU 23 Bible Online

YAHAKIALU 23 - Kambera bible

YAHAKIALU 23

²“Ha dumu tau nda payatangu, ninja tau madua-ha da kawini, ma-paeri ayangu.

³Ba bidi kawini-ha da-ndàdiku la Mehiru. Lai nu na-yàmihu na pa-anakaria wàda, hi danjadi kawini pahunda.

⁴Na tamuna na ma-maaya Ohola-ya; ninu maüna na Hamaria-ya. Na tamuna na erina Ohulimba-ya; ninu maüna na Yeruhali-ya. Ku-pakuru uma danja nyuda hi ningu ananggu la pa-kadua-da.

⁵Jiapa ka mbàda papaha-nggunya i Ohola, pa-daingu bia-nanya pa-pahunda dàngu kanjupu mbangatu-ya ba nayema-ha da yorana welingu la Ahuru.

⁶Nyuda nu tanatara maningu paki ndihi marara atuha, tau bokulu-ha, maningu wai ngaba ma-papingi-ha; mbuu ndàbada ngara pamba tanatara li la njara ma-paràka miningu-ha.

⁷Jiaha da tau bokulu nuda-duka da angu njuraku-na i Ohola. Dàngumbu ba lalu mbana matarungu-ya mini, na pa-iraku wikina wàngu lumu-nanja da marapu-da nyuda.

⁸Nutakungu-mananya pa-pahunda hama tuna na pawunda-na àmangu la Mehiru na ngia pa-yàmihu-na na pa-anakaria wàna. Welingu pa-anakeda-mayaka ba mbàda ningu ma-katuda angunya hama tuna kawini pahunda-ya.

⁹Tuna nuduka hi kuwua-ya la yo - yorana, da tau Ahuru da pambana rinjuna.

¹⁰Wàngu hanggàritu da-pakalulu-ya nyuna hi da-pameti wànya hapanda, tàka hi wàhiha da anana. Jiaya na ura dedina nyunama na pakàli panii wàna nimbihu-na na kawini la nggi - nggini.

¹¹I Ohulimba na erina naita-ya nuna, tàka narihi mbangatui-pa duna nyuna pa-njuraku welingu lai Ohola.

¹²Kanjupu rinju-mbunanja nuda da tau Ahuru nyuna i Ohulimba, nu da bidi mini paràka miningu welingu la pamba tanatara mali la njara, da tau bokulu dàngu da maningu wai ngaba ma-papingi, dàngu da tanatara da maningu paki ndihi marara atuda.

¹³Kuita-ya ba kanjupu iraku-ya i Ohulimba, hama tuna na ayana.

¹⁴Hama huka mandaina hama huka iraku-mana i Ohulimba. Kanjupu mbuha-nanja da nggàmbaru pa-huratu la dindingu, da patungu ma-parara wai riangu. Nuda da nggàmbaru ninu maüda da ngara tanatara Mbambilu-ha da maningu boru bànggi manandangu dàngu da terada ningu ma-kawaiwalu-da.

¹⁵

¹⁶Ba naita-haka nuda da nggàmbaru i Ohulimba, hei-nanyaka na matarungu-na mini hi na-pangàndi-nja huratu dundangu da ma-pangora tanatara la Mbambilu.

¹⁷Ka mai-danyaka hi da-katuda angunya nyuna. Kanjupu pa-kajari-danya nyuna hi lupa nalabu-nja eti.

¹⁸Hàlaka nu pa-lohangu-mana-nyaka pa-pahunda wàngu pa-jilikungu-na wikina la madangu. Nalabu na etinggu Nyungga ba kuita-ya nyuna hama tuna ba nalabu na etinggu ba kuita-ya na ayana.

¹⁹Hama huka mandaina hama huka njuraku-na, nda na-pahili-a hama tuna ba bidi kawini-ya ba na pahunda la Mehiru.

²⁰Kanjupu mbangatu-ya nyuna hanggangu la mini mambana rotana, dàngu na mahama rota njara miniya. (

²¹Ha dumu Ohulimba umbuhangu nyumu pahili wunda beliya na kajari pawunda-mu ba bidi kawini-kau ba napu - puduku-kau tau Mehiru),” wàna.

²²I MIRI Hupu Majangga napanii, “Ha dumu Ohulimba, mbàda hoda-munjaka nyumu da yoramu, tàka napa Nyungga ku-titiru-ha nyuda ka dambeni-nggau hi da-nggupulu-kau.

²³Napa ku-pauhi-nja hi ku-karia-nja da yoramu lai nyumu welingu la Mbambilu, la Pekutu, la Houa, la Kua, la Ahuru dàngu da tau Kalandia. Ku-karia-nja lai nyumu da bidi mini paràka miningu majangga pànggatuda, tau bokulu, maningu wai ngaba ma-papingi dàngu da ngora pamba tanatara mali la njara.

²⁴Napa nyuda da-kaluluku weli dia[48]-nggau nyumu wàngu tanatara bokulu, wàngu kareta - kareta pabera dàngu wàngu kareta - kareta ngàndi bàlangu. Wàngu pa-hangindingu-da temingu dàngu nggubi waja da-nggupulu-kau nyumu. Napa kumàta-nja ka da-patanda-nggau ngeramu nunjuha da uku wikida nyuda.

²⁵Rukuna ba mbeni-nggunggau, kumàta-nja nyuda ka dawàngu mbana etida lai nyumu. Napa da kadipu-ya na urumu dàngu da-kàtahu-ha da kahilu-mu dàngu dapiti-ha da anamu hi datunu kaluri-nja.

²⁶Napa da-pakalulu-kau hi dawàhi-ha da ngaümu.

²⁷Tuna nuduka ba ku-papànja-nya na rinjungu-mu mini dàngu mbuu ndàba da njuraku pawunda-mu piti welingu ba ninggaupa la Mehiru. Nda jia monungu-amupa nyumu la nggàra marapu bia jàka ndia la panamu-ya na Mehiru,” wàna.

²⁸I MIRI Hupu Majangga napanii, “Napa kuwua-kau nyumu la tau da pa-labungu eti da pa-karaü-mu eti.

²⁹Rukuna ba da-karaü-nggau eti, dawàhi-ha mbuu ndàba da wunda jàramu. Napa damàta-nggau dàngu kalulu-mu ba ma-pahunda-kau hi naimi-nggau madangu. Jiaya na-rinjungu-mu mini dàngu na-kajari-mamu,

³⁰na maparuu-nggaunya na ura dedimu na manda hàmu. Unjadi nyumu kawini pahunda ndumada da banjaru, dàngu hiu pa-iraku wikimu wàngu da marapu-da nyuda.

³¹Kiku-mamunya na ayamu nyumu, tuna nuduka hi kuhuku-nggau napa wàngu hukungu ma-pahama,” wàna.

³²Napanii i MIRI Hupu Majangga, “Lupangu ukawàluku-nyaka bàdi na ihi kabawai ayamu. Na bokulu dàngu na-njubuku nuna na kabawai. Nambinu wàngu paakangu dàngu ma-payudi ihina, na pa-handepa-mu welingu la tau mbutana.

³³Na kaba wai ayamu na Hamaria, mangàdatu dàngu tàparu ihina. Bau unu ndàba-nyaka na ihina ka maüku dàngu mayila-munyaka napa. Tàka wàngu kambera-na na kaba wai nuna na kurumu uba - bàriku-ya napa. Nyungga yia MIRI Hupu Majangga mambàda panii,” wàna.

³⁴

³⁵Napanii i MIRI Hupu Majangga, “Rukuna bau maromba-ngga dàngu bau taliuru-ngga, napa uhandepa mayila ruku rinjungu-mu mini dàngu ruku pahunda-mu,” wàna.

³⁶Napanii-ngga i MIRI, “Ha dumu tau nda payatangu, mbàda ehingu-dumuka pa-patanda-nja ngerada i Ohola dàngu i Ohulimba? Kanyàngi-njawa nyuda rukuna na kajari pambàda wundada.

³⁷Mbàda njuraku-daka dàngu mbàda pameti-daka tau; mbàda njuraku da-danjaka da marapu dàngu da-pameti-ha da ananggu da pa-paana-da. Mbàda mangeji-danjaka nuda da anakeda la marapu - marapu-da.

³⁸Dàngu nda didi biaha nuda. Da-pairaku-mbuya na Umanggu dàngu da lodu Hangahu pambàda kawuku-nggu.

³⁹La lodu pameti-daha da ananggu ba da mangeji-nja la marapu, damai pa-kadua-da nuda da ma-paeri ayangu la Umanggu hi da-pakajari-ya!

⁴⁰Jiapa dadunda-kinjapa da tau mini la tana mamarau, hi damai nyuda. Keha ka hàmburu-ha nuda da ariyaa, ihu-danyaka pa-kadua-da nuda da ma-paeri ayangu, da-peringu muru mata hi dawotu-ha da ngaüda.

⁴¹Hi da-mandapu la ngia pa-katuda ma-manandangu. La hanggada ningu menja mambinu-nya pangangu mahàmu, dàngu dupambu dàngu mina haitungu pambàda wua-nggunja.

⁴²Parongu-ya welingu la hambeli na kanyaüru tau dangu da mambawa. Da tau nuda pa-dundangu-ha welingu la maràda wara hi damai. Dapuhi-nja kara la limada nuda da ma-paeri ayangu hi da-patànggapu-nja tubuku pareta manandangu la katiku-da.

⁴³La etinggu, ‘Da-mbuhangu biapa ihu da tau nida pa-payora dànja da kawini pahunda da mambàda mangonangu ruku njuraku-da?’[49] wànggu.

⁴⁴Dawàngu papahi - hilungu da tau nuda pamai tomaha i Ohola dàngu i Ohulimba, nu da tau madua kawini pahunda da mambàda iraku.

⁴⁵Tàka na nyuna, napa da tau manundu da-patanda-nja ngerada nuda da ma-paeri ayangu rukuna ba da-njuraku dàngu ba da-pameti tau maa ba njala-madanya nyuda,” wàna.

⁴⁶Napanii i MIRI Hupu Majangga, “Pa-aungu-wa hajuru tau ka pa-mayila-ha dàngu ka rambanja nuda da madua kawini pahunda.

⁴⁷Màtawa ka nàhaku-nja watu dàngu ka pameti-ha nyuda wàngu hapanda. Màtawa ka hambàli-ha da anada dàngu ka huluha da umada.

⁴⁸Napa la nggubulu-na nuna na tana ku-podahu-ya na iraku na matungu nu. Nu na-paluangu-nggu lima màta ka pa-panamu wànya nimbihu-na na kawini ka àmbu na-njuraku hama tuda nuda da ma-paeri ayangu.

⁴⁹Ha dimi Ohola dàngu Ohulimba, napa kuhuku-nggai nyimi rukuna bai njuraku dàngu bai lumungu marapu. Ka pi-dimi-nggaka ba MIRI Hupu Majangga-ka Nyungga,” wàna.