Read Kambera YAHAKIALU 25 Bible Online

YAHAKIALU 25 - Kambera bible

YAHAKIALU 25

¹Napanii-ngga i MIRI,

²“Ha dumu tau nda payatangu, ràtu-nyawa na tana Amungu.

³Paràha-nya nuna na banjaru pa-patingi-nya jàka nggàraya na papanii-nggu Nyungga, MIRI Hupu Majangga lai nyuda, ‘Mbaha eti pàku-aminya nyimi bai itaya ba pa-iraku-ya na Umanggu dàngu ba paruha-ya na tana Ihirailu hamangui ba dundilu-ya la ngia pa-wàrungu na tau Yahundi.

⁴Tuna nuduka hi kumàta-nggai nyimi ka na-pakàku-kai paraï da kalibaru banjaru welingu la maràda telangu la pahunga lodu. Napa dawulu kanguhuru uma tera la tanami hi da-ndàdiku pa-daingu lai nu. Napa dangaanja da wua pingi aimi dàngu daunu-nja da wai huhu bandami.

⁵Napa ku-pambeli-ya ngia pa-pawangu ota na parai Ramba, tàka nggubulu-na na tana Amungu nanjadi-ya ngia pa-pawangu mbimbi. Ka pi-dimi-nggaka ba MIRI-ka Nyungga,’ wàna wàmunja,” wànangga.

⁶Napanii i MIRI Hupu Majangga, “Kapokukungu paku-aminya limami nyimi dàngu renja mbaha etimi. Ndai reki-aya na tana Ihirailu.

⁷Tuna nuduka napa hi kuwua-kai la banjaru dangu da maramba-nggai hi dawàhi-ha mbuu ndàba da mangumi. Ku-patàlaru halawàla kai nyimi, hi nda hau banjaru-akaipa dàngu hi nda ningu-mbupa tana wikimi. Ka pi-dimi-nggaka ba MIRI-ka Nyungga,” wàna.

⁸Napanii i MIRI Hupu Majangga, “Napanii na Muapu[53] ba hama biana dàngu da banjaru hawiangu na tau Yahunda.

⁹Tuna nuduka hi kumàta-nja ka na-kaluluku-nja muhu da paraingu ma-pahangindi-nja da padira tana Muapu, na-hanggàlu mbuha da paraingu ma-manandangu halawàla, nu: na Mbetu-Yehimutu, na Mbaàlu-Miungu dàngu na Kiriyataïmu.

¹⁰Napa kumàta-nja da kalibaru banjaru welingu la maràda telangu la pahunga lodu ka da-pakàku-ya na Muapu[54] dàngu na tana Amungu, hi nda hau banjaru-ayapa na Muapu.

¹¹Napa kuhuku-nya na Muapu ka pi-duda-nggaka ba MIRI-ka Nyungga,” wàna.

¹²Napanii i MIRI Hupu Majangga, “Mbàda wunda-naka njala bokulu na banjaru Endumu, ruku mbana etina hanggangu la Yahunda, ba na-pabelingu kiringu.

¹³Jia ba tuna bobaru-nggunyaka ba huku-nggunya napa na Endumu hi ku-pameti-ya nimbihu-na na tau dàngu nimbihu-na na banda lai nu. Nggubulu-na nuna na tana, piti welingu la parai Temàngu lundu la parai Ndendàngu, ku-pa-malinggitu halawàla-ya; na rayatu-na napa nameti la pa-hànjalungu.

¹⁴Na banjaru-nggu na Ihirailu jiaya napa na pa-pahuhuku-nggu pa-pabeli-nya kiringu na Endumu, tàka hi palua-nya lima na Endumu nunjuya na-mbàringu-na na hàngganggu. Napa napinya paraïna Endumu nggiki hamana ba nanjadi-ya ngia pa-orangu-na na hàngganggu. Nyungga yia MIRI Hupu Majangga mambàda panii,” wàna.

¹⁵Napanii i MIRI Hupu Majangga, “Mbàda pa-belingu-daka kiringu wàngu mbana etida da tau Pilitingu hanggangu la muhu ndaida hi da-patàlaru-ha wàngu mbumbaru-na na karaü etida.

¹⁶Jia ba tuna bobaru-nggunyaka ba kaluluku-nggunja da tau Pilitingu hi ku-patàlaru-ha nyuda. Napa ku-pameti-ya nimbihu-na na tau na ma-ngiangu la hingi tehiku ngaba tau Pilitingu.

¹⁷Napa dira huku pambotu-ngguha nyuda dàngu ku-hanubuku-nya na kiringu-nggu lundu nahoda-ka. Jàka dapàda-nyaka na hàngganggu, pi-danggaka ba MIRI-ka Nyungga,” wàna.