Read Kambera YAHAKIALU 26 Bible Online

YAHAKIALU 26 - Kambera bible

YAHAKIALU 26

¹La tànggalu hau la hau na wulangu[55] la pa-hakambulu hau wàna na ndaungu tanawangu-ma nyuma, napanii-ngga i MIRI,

²“Ha dumu tau nda payatangu, mbàda paoi - oingu-daka da ma-mandapu-nya la Tiruhu, ‘Nakabu-ka na Yeruhali! Dira-naka na àtalu-na la danggangu! Nda angu pa-hihiku anda-nyapa nyuna!’ ” wàda.

³Napanii i MIRI Hupu Majangga, “Nyungga yia muhu-mungga, ha Tiruhu! Napa ku-kariangu banjaru dangu pa-kaluluku-nggau nyumu, dàngu napa nyuda damai hama tuna ngalingu la tehiku-ha.

⁴Napa nyuda da-pakabu-ha da dindi watumu dàngu da-nyungguru-ha da lewatu-mu. Mbutana na tana na maninya lai nu napa kuwari-ya hi lupa hau watu bulu-ayaka na maninya la padua tehiku.

⁵Napa da mini jala dadengi jalada lai nu la pinu watu. Nyungga yia MIRI Hupu Majangga mambàda panii. Napa na Tiruhu uhu banjaru danguya.

⁶Napa nyuda da-rambangu dàngu da-pameti-ha da ma-mandapu-nja da paraingu la padua tana Tiruhu. Ka pi-danggaka paraï da ma-mandapu-nya na Tiruhu ba MIRI-ka Nyungga,” wàna.

⁷Napanii i MIRI Hupu Majangga, “Napa ku-karia-nya na maràmba Nembukatunehàru welingu la Mbambilu pa-kaluluku-nggau nyumu, ha Tiruhu. Napa namai weli diangu nuna na maràmba na ma-kanjupu kapàru-ya dàngu tanatara bokulu, njara dangu dàngu kareta - kareta pabera dàngu pamba tanatara mali la njara.

⁸Da ma-mandapu-nja da paraingu la padua tana napa dameti la pa-hànjalungu nuna. Napa daàki londa ngia pa-torungu na muhu, da pa-kanguhurungu dindi watu ngia pa-nggupulu dàngu da-wandalu-ha da temingu bokulu ba datuu ngia pa-torungu-da pa-rawaku-kau nyumu.

⁹Napa da-njularu wànja pa-njularu wàngu da dindi watumu hi da-nyungguru wànja kabuli bàhi da lewatu-mu.

¹⁰Kanjupu danguha da njarada, hi lupa da-pa-hambutalu-ya na kumburu tana ba da-hadumbalu hi na-hambongu-nggau nyumu. Na kangguruku-da da pamba tanatara mali la njara da mairu kareta bàlangu dàngu kareta pabera napa da-patandidu-ha da dindi watumu ba dali la pindu bokulu dàngu ba datama la paraingu na mambàda njadi tanyungguru watu.

¹¹Da pamba tanatara mali la njara napa da njungu la à - àndamu hi da-pameti wànja hapanda-da da ma-mandapu-nggau nyumu. Da andungu-mu da manggoji dàngu da ma-kapingatu pa-nyungguru-ha napa.

¹²Nuda da muhumu napa dawàhi-ha da pawulu-mu dàngu da padangga-mu. Da nyungguru-ha da dindi watumu hi da-weharu-ha da umamu da ma-manandangu. Napa dapiti-ha da watuda, da kapapa ai dàngu da tanada, hi da-kawuka-nja la tehiku.

¹³Napa ku-pa-kamàndalu-ha mbuu ndàba da ludumu dàngu da lingu jungga pambabu wàmu.

¹⁴Na pabiinggu jiaya na hau watu bulu-ma-a, ngia padengi-da jala da mini jala. Nda jia hili tura beli-ayapa nuna na paraingu. Nyungga yia, MIRI Hupu Majangga mambàda panii,” wàna.

¹⁵I MIRI Hupu Majangga napanii-nya na parai Tiruhu, “Da ma-ngiangu la hingi tehiku nda - ndàndada napa paraï pa-mangàdatu ba darongu-ya na kaladaku kàkumu dàngu na kanjaïku-da da tau pa-hambàli.

¹⁶Ba daita-ya na ura dedimu, da maràmba-da da banjaru la hingi tehiku napa da-hadangu welingu la kanjàka pareta-da, hi da-kalàba-ha da kalembi malai mangarangu-da dàngu da kalembi pahikungu-da, hi nda - ndàndada ba da-mandapu la tana. Kanjupu mangàdatu-ha hi nda ana mandangu-da.

¹⁷Hàlaka nu hi dawunda-nggau ludu taningu: Kabu-nanyaka na parai ma-pangarangu! Mbuu ndàba da kapalu-da pawari-haka[56] welingu la tehiku lerangu. Làti da mangia-nya da-mehangu limada la tehiku hi lupa da-mangàdatu da tau la hingi tehiku.

¹⁸Nàhu, la lodu pakàku-kau nyumu, nda - ndàndada da mangia-nja da nuha. Dawàngu pa-katàtaku mbuu ndàbada nyuda ba daita-ya na kabumu na manda najaru,” wàna.

¹⁹Napanii i MIRI Hupu Majangga, “Ku-pa-malinggitu halawàla-kau hama tuna paraingu nda ningu taungu. Napa ku-palumburu wànggau wai welingu la lata tehiku lerangu.

²⁰Hàla hi ku-pangàndi-nggau la pangia tau meti kai pa-angungu dàngu da tau welingu la handàka-na. Kumàta padainggau la pangia tau meti, la manggawa tanyungguru watu weli nungu, dàngu da tau meti. Hi nda pahili ngia-anyapa na tanamu, dàngu nda padiha-akaupa nyumu la honga[57] tau luri.

²¹Ku-panjàdi-kau ngerangu pa-maringgingu nuna-duyaka na hupu pekamu. Napa nahimbu-kau tau, tàka nda jia hunggu-ada-nggaupa. Nyungga yia MIRI Hupu Majangga mambàda panii,” wàna.