Read Kambera YAHAKIALU 27 Bible Online

YAHAKIALU 27 - Kambera bible

YAHAKIALU 27

¹Napanii-ngga i MIRI Hupu Majangga, “Ha dumu tau nda payatangu, ludu-nyawa yiana na ludu taningu ndumana na Tiruhu, na paraingu hingi tehiku na madangga dànja da mangia-nja mbuu ndàba da hingi tehiku: Ha dumu Tiruhu, upanii wàngu ngànjangu-mu, ‘Na manandangu-nggu nda ningu langatàka nyurana!’ wàmu.

⁴Nyumu dumu beri uma-munya na tehiku lerangu. Patura-kau beri hama tuna kapalu manandangu.

⁵Da dindingu-mu ai arahu welingu la Palindi Herumungu-ha da tandai lirumu ai kajiu welingu la Limbanongu-ha.

⁶Da buhimu pa-pandoi-ha welingu la pingi ai bokulu la Mbahàngu. Na ndekumu pa-pandoi welingu la ai kajiu-ya, ma-welingu la nuha Hipuru, da pa-mananda wàna nggedi pawilingu pa-pawandalungu-ha.

⁷Da lirumu dàngu na patanda wànggau tera linangu patinu Mehiru-ha pa-pahikungu ma-pabetingu-ha. Kanjupu manipihu-ya na tera maümu, tera rara atu welingu la Hipuru.

⁸Da mini buhimu ma-welingu la Hindungu dàngu la Àruwàtu-ha. Da tau kapalu-mu kataru wai ma-manyàmungu-ha.

⁹Da tukangu ai maràma la kapalu mini pandoi welingu la Nggembàlu-ha. Welingu la hau tana - hau tana damai da kapalu pa-pahama-nya na danggangu.

¹⁰Da panjuri welingu la Perihia la Lindia dàngu la Limbia datama la tanatara-mu. Da-tiwalu-nja da temingu dàngu da nggubi wajada la kangeli paraingu-mu. Mbàda pa-mbapangu-daka nyuda pa-pakàku-ha da muhu hi na-bonjangu na-kawulangu-mu.

¹¹Da panjuri welingu la Àruwàtu dadai la dindi - dindi watumu; da lewatu-mu dadaiha paraï tau Nggamàtu. Da temingu-da pa-tiwalu pa-wandalungu-ha la dindi watumu. Nyudaka da mapinu-ya na manandangu-mu.

¹²Udangganja da padangga-mu da ma-bundungu la Hapanyulu, tàka hiu kei wilida àmahu bara, bàhi, tambura bara dàngu tambura mitingu.

¹³Udanggangu la Yunani, la Tumbàlu, dàngu la Mehiku, tàka hiu kei wilida welingu lai nyuda ata dàngu ngga - nggàra ma-welingu la parunggu.

¹⁴Da malanja-mu upanjepa-nja la njara kareta, njara kaliti dàngu mbanggalu welingu la Mbetunggàrama.

¹⁵Da ma-ngiangu la Ronduhu[58] dadangga daa-mbunggau nyumu tàka da ma-ngiangu la hingi tehiku dakei wànja nggedingu dàngu ai mitingu da padangga-mu.

¹⁶Da tau danggangu welingu la Hiria dakeiha da padangga-mu dàngu da ihi paraïmu da madangu. Da-mbayaru wàngu watu mata tawuru hàmurutu, tera rara atu, tera pa-hikungu, linangu manipihu, watu mata tawuru welingu la watu pungguru dàngu watu parara njalimangu.

¹⁷Na Yahunda dàngu na Ihirailu danjepa-ha da malanja padangga-mu wàngu uhu nggàndumu, manggaluangu, mina haitungu dàngu rungu mbii kati.[59]

¹⁸Da ma-ngiangu la Ndamàhiku dakeiha da padangga-mu dàngu da ihi paraï-mu hi da-mbayaru wàngu angguru welingu la Helumbungu, wulu mbimbi welingu la Haharu, bàhi patuku dàngu rungu mambii kati.[60]

²⁰Da ma-ngiangu la Ndendàngu da-mbayaru wànja tera hela da malanja-mu.

²¹Da tau Arapu dàngu da ma-kawaha la Kendàru dakei wànja ana mbimbi, mbimbi bumbu dàngu kamàmbi da malanja-mu. Da tau danggangu welingu la Heimba dàngu la Raema watu mata tawuru, àmahu rara dàngu rungu mambii kati mahàmu halawàla pakei wànja da padangga-mu.

²³Da parai Haràngu, Kani, Endingu, da tau danggangu welingu la Heimba, da paraingu la Ahuru dàngu Kilimàtu, mbuu ndàbada dadangga dànggau nyumu.

²⁴Da-danggangu paki ma-borakungu nyuda lai nyumu, tera rara atu, tera pa-hikungu, topu lata wihi ma-pabeti - pabetingu dàngu ma - màtu liku màndungu.

²⁵Da padangga-mu pangàndi wànja kapalu pa-jurungu ma-kanjupu bokulu. Beri kapalu mambotu ngàndikau nyumu, kapalu mapala tehiku lerangu.

²⁶Da mabuhi dangàndi-kau la padua kuru nduu. Na-nàhaku-kau ngilu timiru ma-kaborangu.

²⁷Mbuu ndàba da pa-danggangu da ngàndimu, mbuu ndàba da mini tehiku dàngu da tau kapalu-mu, mbuu ndàba da tukangu ai dàngu da tau danggangu-mu, nimbihu-da da panjuri nu la kapalu, mbuu ndàbada nyuda damohu da-tandaningu la rehi tambulu-mu nyumu.

²⁸Da mini tehiku-mu da-kaladaku paraï pa-mangàdatu da kanjaïku-da nalàngi la hingi - hingi tehiku.

²⁹Nàhu pa-màtangu-yaka nuna na kapalu, mbuu ndàba da mini tehiku-mu da heiha la mara.

³⁰Dahii ba da-pangàda-nya na ura dedimu, dahii walangu dàngu da padudurungu pamila eti. Datunja kumburu tana da katiku-da hi da-nggilungu la aü tanda handuka.

³¹Lumumu nyumu da-kikiru pabulu katiku-da, da-kalambungu karungu ba kanjupu handuka-ha. Dahii pamila eti da-padudurungu pangàda-nya na ura dedimu.

³²Hàla hi da-ludungu hau ludu taningu, ‘Ou Tiruhu, nggamu menjamu? Ou Tiruhu, nàhu pàdi wàmuka la tehiku.

³³Bau pala-ipa tehiku lerangu bau pukangu wàngu ngàndimu, upatoma-ya na ma-kalana-nja da banjaru; upawulu-ha da maràmba-mbu.

³⁴Nàhu tandaningu-munyaka, hiu kabu kati wara. Nggubulu-da da tau kapalu-mu dàngu mbuu ndàba da ngàndimu damohu karia-nggau nyumu la padua kuru nduu,’ wàna.

³⁵Mbuu ndàba da tau ma-ngiangu la hingi tehiku nda - ndàndada ba darongu-ya na ura dedimu. Da maràmba-da dira mangàdatu-mbuha, na haringgingu hamangu-da na-lohangu la matada.

³⁶Mohu molungu-munyaka lundu nu - nu. Da tau danggangu la nggubulu pinu tana da-kanggupuku paraï pa-mangàdatu pa-hunggungu ura dedi matungu nu, wàmu,” wànangga.