Read Kambera YAHAKIALU 29 Bible Online

YAHAKIALU 29 - Kambera bible

YAHAKIALU 29

¹La tànggalu hakambulu dàmbu wulangu hakambulu, la ndaungu pa-hakambulu wàna na tanawangu-ma, napanii-ngga i MIRI,

²“Ha dumu tau nda payatangu, panjala-yawa na hanganji Mehiru. Paniinya ba pa-hukungu-ha napa, nyuna dàngu nggubulu na rayatu Mehiru,” wàna.

³I MIRI Hupu Majangga na-paràha-ngga nyungga pa-patàka-nya yiana na lii langu la hanganji Mehiru, “Nyungga yia muhu-mungga, ha dumu wuya ma-kanjupu bokulu ma-pamuku la padua luku. Upanii abungu nyumu ba mangumu nyumuya na Luku Nilu dàngu ba nyumu ma-pandoi-ya.[64]

⁴Napa ku-pakàna-nya katekaru na ngingimu dàngu ku-pa-karitaku-nja iyangu da nepimu. Hàla hi ku-ruruhu-kau paluhu welingu la Luku Nilu dàngu mbuu ndàba da iyangu ma-karitaku la nepimu.

⁵Hàlaka nu hi ku-kawuka-nggau nyumu dàngu mbuu ndàba nuda da iyangu la maràda wara. Napa na-tawàlahu la tana na ihimu hi na-taneparu lai nu. Nda haàtu-a napa matani-nggau nyumu. Napa kuwua-ya la ma-hawurungu dàngu la banda hawiangu na ihimu ka dangaanya.

⁶Ka pi-ndàba-nanggaka rayatu Mehiru ba MIRI-ka Nyungga,” wàna. Napanii i MIRI, “Ha dumu banjaru Mehiru! Na tau Ihirailu namonu-nya na pa-ndulangu-mu nyumu, tàka na ma-lohangu, hi hama tokungu mamàja-akau dumu nyumu.

⁷Ba da-haria-kauka, ka mbata-munyaka hiu hàkaha da mbonga halili-da, hi da-pahili da kunduda.[65]

⁸Jia ba tuna, Nyungga, MIRI Hupu Majangga, kupanii-nggau nyumu, ba pa-ngàndingu-nggunya tanatara da ma-kaluluku wànggau hapanda, hi da-pameti-ha da ma-mandapu-nggau dàngu da bandamu.

⁹Napa nanjadi-ya tana ma-malinggitu halawàla na Mehiru. Ka pi-dimi-nggaka ba MIRI-ka Nyungga,” wàna. Napanii i MIRI, “Ha dumu hanganji Mehiru! Rukuna bau panii ba mangumu nyumuya na Luku Nilu dàngu ba nyumu ma-pandoi-ya,

¹⁰ka muhu-munggaka Nyungga dàngu muhuna na Luku Nilumu. Nggubulu-na na Mehiru ku-panjadi-ya tana ma-malinggitu halawàla piti welingu la parai Mikundulu la mbara dia lundu la parai Ahuwangu la mbara luru, lupa la padira Hundangu.

¹¹Nda jia ningua tau jàka ndia banda malaku liya. Nda jia ningua mangia-nya la patu kambulu ndaungu.

¹²Napa ku-pa-malinggitu halawàla-ya na Mehiru, hi lupa jiaya na Mehiru ma-kanjupu malinggitu la hongada da tana ma-malinggitu hawiangu. La patu kambulu ndaungu mandaina da paraingu la Mehiru tanyungguru watu marihi jàraha welingu la tanyungguru watu la nggi paraingu biaya. Napa ku-panjadi-ha tau ma-yilangu na banjaru Mehiru. Da-tanyalangu nyuda la mbuu ndàba tana hi da-ngiangu la honga banjaru hawiangu,” wàna.

¹³Napanii i MIRI Hupu Majangga, “Ha dumu banjaru Mehiru, napa la hambeli patu kambulu ndaungu nuna ku-karia belinggai welingu la ta - tana ngia pa-tanyalangu-mi.

¹⁴Napa ku-pahawuri belikai hi ku-paràha-nggai pa-ndàdiku la Mehiru mbara luru na tana ngia paweli-mi. Napa lai nu ituraya na pa-maràmba ma-lamanga,

¹⁵marihi lamanga la nggubulu pinu tana. Napa ku-palamanga halawàla-kai hi nda peku pareta-mi banjaru hawiangu jàka ndia la pa-ngànjangu hanggangu lai nyuda.

¹⁶Nda nakarai-apa pa-ndulangu lai nyumu na Ihirailu. Na ura dedimu ha banjaru Mehiru napa na-panamu-nya na banjaru Ihirailu ba kanjupu hanjàliru-ya ba na-hamela wànya na Mehiru, hama tuna na pambàda wundana. Ka pi-nanggaka paraïna Ihirailu ba MIRI Hupu Majangga-ka Nyungga,” wàna.

¹⁷La tànggalu hau wulangu hau la padua kambulu pihu wàna na ndaungu tanawangu-ma, napanii-ngga i MIRI,

¹⁸“Ha dumu tau nda payatangu, na Hanganji Nembukatunehàru welingu la Mbambilu na-pambangatu-ya na-kaluluku-nanya na Tiruhu. Na-paràha-nja da panjuri paduku ngàndi ma-kanjupu mbotu, hi lupa dabulu da katiku-da dàngu da taluruhu da kunduda, tàka na nyuna, nyuna na maràmba hamangui da tanatara-na nda ana nggàra pangala-da la jàrada nuna.

¹⁹Tuna nuduka, hi kupanii Nyungga MIRI Hupu Majangga: Napa kuwua-ya na tana Mehiru la Hanganji Nembukatunehàru hi wànggu. Napa naramba-nja dàngu nawàhi-ha mbuu ndàba da pawulu Mehiru hi nangàndi-ha patuha wunda tanatara-na.

²⁰Na tana Mehiru kuwua-nyaya nyuna patuya limbada da hàmuna nyuna, nadu ba mbàda ràma-dudaka da tanatara-na ndumanggu Nyungga. Nyungga yia, MIRI Hupu Majangga mambàda panii.

²¹Jàka na-hàrangu-ka nuna, napa kutuya banjaru ma-kapingatu na Ihirailu, tàka nyumu dumu Yahakialu nda nggàra-apa ma-paratahu-nggau papanii ba peku patingi ndàba-nanggauka tau. Ka pi-duda-nggaka nyuda ba MIRI-ka Nyungga,” wàna.