Read Kambera YAHAKIALU 3 Bible Online

YAHAKIALU 3 - Kambera bible

YAHAKIALU 3

¹Napanii i Ala, “Ha dumu tau nda payatangu, nganyawa yiana na kuluru karàta, hàla lakuwa dàngu paniiwa la tau Ihirailu,” wànangga.

²Hàla hi ku-hanganga tàka i Ala nawua-ngganya nuna na kuluru karàta ka kunganya.

³Napanii, “Ha dumu tau nda payatangu, nganguwa! Paihi-nya na kambumu yiana na karàta,” wànangga. Hàla hi kunganya nuna na karàta tàka ba pàdanya na-palàngga manggaluangu.

⁴Nahili panii i Ala, “Ha dumu tau nda payatangu, luawa la tau Ihirailu dàngu patàka-njawa mbuu ndàba na lii langunggu lai nyuda.

⁵Lai nyuda-maka ku-palewa-kau nyumu, tàka nda la banjaru ma-kalutu hilu-ana, na mahau-maya dàngu na panda pimu. Ngera hama tuna jàka ku-palewa-kau la banjaru matuna nu, da-patingi-manya na paniimu.

⁷Tàka na banjaru Ihirailu nda nabihu pa-patingi-nggau nyumu, jiapa Nyunggambu nda da-wàrihu-aka. Nyuda mbuu ndàbada da-tongguru eti dàngu da-mbuhangu pa-patumbarungu.

⁸Nàhu nyumu ku-patongguru-kau dàngu upadàdungu hama tuna nyudambu.

⁹Napa ku-pamàndu-nggau hama màndungu watu pungguru dàngu ukalatungu hama itangu. Àmbu mangàdatu-dunja da ma-patula ngganggangu,” wànangga.

¹⁰Na pangalangu-na nahili panii i Ala, “Ha dumu tau nda payatangu, etiwa-manja dàngu namu-maha mbuu ndàbada napa da papanii-nggunggau.

¹¹Luawa la banjaru-mu da maninja la tanawangu, dàngu patàka-njawa jàka nggàraya na papanii-nggu Nyungga, MIRI Hupu Majangga lai nyuda, ka mbuhangu-danya pa-patingingu ka ndiakai,” wànangga.

¹²Hàla hi nadanda-ngga Ngahuna i Ala dàngu kurongu la kajianggu talia lii ma-kawoku mapanii, “Wotu-nyawa na mangunju-na i MIRI la awangu!” wàna.

¹³Kurongu-ha da lingu ruu kàpada nuda da dika da ma-paràmbahungu dua wikida, dàngu da lingu kanggeriku-da nuda da ndutungu da mahama lingu upungu-ha mbangatu-da.

¹⁴Na kawaha-na i MIRI namai tomaka wàngu wirungu-na, tàka ba nadanda-nggaka dàngu ba na-karia-nggaka Ngahuna, kupàda-nya paitana dàngu mbanana na etinggu.

¹⁵Ka tàka-nggunyaka la ngia pa-ngiangu-da da ma-tanawangu la Telu-Ambipu la hingi Luku Kembàru. Pihu mbua lodu mandainggu ba ku-ndàdiku lai nu; ku-maratangu rukuna mbuu ndàba na pabidi rongunggu dàngu na paita-nggu.

¹⁶La hambeli pihu mbua lodu, napanii-ngga i MIRI,

¹⁷“Ha dumu tau nda payatangu, nyumu kuwotu-kau la padaiya na banjaru Ihirailu. Patàka-njawa nyuda yiana ka panamu-nja na pawua-nggu yiana.

¹⁸Jàka kupeka-ya ba nameti napa na haàtu tau akatu, tàka nyumu ndau panamu-anya ka na-panjilu-nya na huri lurina hi namara, napa jianguma na pameti tau njalangu, tàka na mahema-ya na ruku metina napa pa-karuhi-ya welingu lai nyumu.

¹⁹Jàkau panamu-nya nu na tau akatu tàka nda na-mbuhangu-a pa-pànjangu pawunda ma-akatu, napa na pameti tau njalangu, tàka nyumu wiki napa umara.

²⁰Jàka na-pakiringu pawunda manjala na haàtu tau hàmu, tàka hi ku-paoranya hanggàmaru, napa nameti-ya jàka ndau panamu-nya. Napa nyuna nameti rukuda da njalana, tàka da pawunda-na da mahàmu nda ku-pangàda-anja. Tàka na nyuna na mahema-ya na ruku metina napa ku-karuhi-ya welingu lai nyumu.

²¹Jàkau panamu-nya nu na tau hàmu ka àmbu nawunda manjala, tàka hi nanunju-ya na panaungu-mu, nda jia huku-anggunya tàka nyumu napa umara,” wànangga.

²²Kupàda-nya mbangatu-na ba ninya i MIRI dàngu kurongu-ya ba napanii-ngga, “Hadangu-wa kau lua la lolangu. Lai nu napa ku panii-dànggau,” wànangga.

²³Ka laku-nggunyaka la lolangu, hi kuita-ya lai nu na ma-hambila kalilangu na tandana ba ninya i MIRI hama tuna na pambàda itanggu la hingi Luku Kembàru. Hàla hi kunjoru panggubu la tana,

²⁴na nyuna na Ngahuna i Ala na tamangga hi na-pandolaku-ka. Napanii-ngga i MIRI, “Beliwa kau kapàndi la umamu.

²⁵Ha dumu tau nda payatangu, napa nyumu pahondu wànggau liku hi nda peku luhumu dàngu nda peku pa-hàmburu dàngumu tau.

²⁶Napa ku-pahalata-ya na làmamu hi nda peku panamu-munya yiana na banjaru patula ngganggangu.

²⁷Napa, jàka kuhili paniinggau dàngu kupabeli-nya na pingumu pa-kareuku, lupangu-ma bàdi upatàka-nya jàka nggàraya na pa-patàka-nja nyuda ba wànggu Nyungga, MIRI Hupu Majangga. Hawiangu nyuda napa da-patingingu, tàka hawiangui ndia-a, nadu ba banjaru ma-patula ngganggangu-maha nyuda,” wànangga.