Read Kambera YAHAKIALU 31 Bible Online

YAHAKIALU 31 - Kambera bible

YAHAKIALU 31

¹La tànggalu hau wulangu tailu la ndaungu pa-hakambulu hau wàna na tanawangu-ma, napanii-ngga i MIRI,

²“Ha dumu tau nda payatangu, patàka-nyawa yiana na lii langunggu la hanganji Mehiru dàngu nggubulu na banjaru-naka: Kanjupu halawàlangu-na na bokulu-mu! Nda ningua angumu pa-pahihingu!

³Hama kajiu Limbanongu ma-pangarangu-kau mbinu kahanga ma-marumbingu dàngu ma-manandangu. Na polana na-kunduhu kalandihu na kapuka-na natàka la karumangu.

⁴Natumbu ba natoma na waina. Na luku la unu tana mawua-nya pangangu, ma-mangahu ndàbanja da amuna, dàngu ma-pambaha-ha da pingi ai hawiangu.

⁵Ba nda ana kawawaku-na na waina, na-kamboka na tumbuna, da-bokulu dàngu da-madita da kahanga-na. Welingu la mbuu ndàba pingi ai la omangu-ka, nyunama marihi jangga ba po - pòdina.

⁶Ma - màtu ma-hawurungu mawulu hibu la laina. Da banda matàmba da-paana la maüna. Mbutana na banjaru bokulu la nggubulu pinu tana da-mandapu pa-pamaü la lumbuna.

⁷Nuna na pingi ai na-manandangu ka tàngaru-ya; na-kunduhu na polana, da-madita da-kahanga-na. Da amuna da-tanjiku hu dalu la tana datoma la mapawai la unu tana.

⁸Dapingi kajiu la Endingu, na woka ngia pa-mbawana i Ala nda pa-pamenja-anja dàngu nyuna. Nda ningu kajiu angu pahihingu-na, nda ningu pingi ai ma-madita tuna nu da kahanga-na. Langatàka la woka mbawana i Ala nda ningu pingi ai hama manandangu tuna nyuna.

⁹Nyunggama ma-pamananda-nya nyuna wàngu kahanga-na da ma-madita dàngu na marumbingu-na. Mbuu ndàba da pingi ai la woka mbawana i Ala ohanai-ka nyuna, wàdanya.

¹⁰Tuna nuduka, Nyungga, MIRI Hupu Majangga, hi kupanii-nggau nyumu jàka nggàra manggàna-ya nuna na pingi ai matoma la karumangu na kapukana. Nadu ba hama huka janggana, hama huka ngànjangu-na nyuna.

¹¹Hi mbàda tulaku-nggunyaka nyuna hi kuwua-ya la kuaha tau hangàdangu, da ma-palua-nya lima pa-topangu la akatu-na.

¹²Da tanatara tau hangàdangu manda pingu pa-paaïngu napa dapunggu-ya nyuna hi damàta-nya. Da laina da mambàda mbata napa da-kanabu hi da-taneparu la mbuu ndàba da palindi dàngu da lolangu la tana nuna. Mbuu ndàba na banjaru ma-ngiangu la lumbuna napa dalaku wàrunya nyuna.

¹³Da ma-hawurungu napa damai hi da-rànjaku nu la pingi ai manjoru, tàka da banda matàmba napa dataro - rohaku-ha da kahanga-na.

¹⁴Hi danjadi mbuu ndàbada nuda màta ka pakiri weli nàhungu, àmbu jia ningu-dupa pingi ai matumbu tuna nu janggana; àmbu ningu dupa kapuka ai matoma karumangu jiapa ka dira dangu-yakai na wai pangala-na. Lupa dameti mbuu ndàbada hama tuna tau nda payatangu, hi da-pauhi dànja da tau mambàda puru la pangia tau meti,” wàna.

¹⁵Tuna yia na paniina i MIRI Hupu Majangga, “Jàka napuru-ka nuna na pingi ai la pangia tau meti, ku-paràha-nya na wai la unu tana pa-lumburu-nya nyuna ka tanda ringu languya. Napa kupàtu-ya na arihu-na na luku dàngu kuhulu-nja da ana luku. Ba mbàda meti-naka nuna na pingi ai, napa ku-patàka-nja kapàtangu da palindi Limbanongu hi ku-pamalaï-ha mbutada da pingi ai la omangu.

¹⁶Ba ku-papuru-nya nuna na pingi ai la pangia tau meti, na kambòkuku-na na-pa-mangàdatu-ha da banjaru. Mbuu ndàba da pingi ai la Endingu dàngu da pingi ai papindi la Limbanongu da madira ngala padangu wai, dàngu da mambàda tamaha la tana dahàmu da etida napa ba nanjoru-ka nuna na pingi ai.

¹⁷Napa nyuda dandàki-ya nyuna la pangia tau meti hi da-pauhi dànja da mambàda njoru mangilu. Tàka mbuu ndàbada da ma-mandapu àmangu la lumbuna nuna na pingi ai napa pa-pa-tanyalangu-ha la honga ba - banjaru-ka.[67]

¹⁸Nuna na pingi ai na-paninu maünya na hanganji Mehiru dàngu na banjaru-na. Nda ningua pingi ai la Endingu matuna nu janggana dàngu pangarangu-na. Tàka nàhu, hama tuda da pingi ai la Endingu, napa na pingi ai nuna napuru-mbuya la pangia tau meti hi da-pauhi dànja nyuda da manda tandaya i Ala hamangui dàngu da ma-hanggubalu la pa-hànjalungu. Nyungga yia, MIRI Hupu Majangga mambàda panii,” wàna.