Read Kambera YAHAKIALU 32 Bible Online

YAHAKIALU 32 - Kambera bible

YAHAKIALU 32

¹La tànggalu hau wulangu hakambulu dàmbu la ndaungu pa-hakambulu dàmbu wàna na tanawangu-ma, napanii-ngga i MIRI,

²“Ha dumu tau nda payatangu, panamu pa-mbangatu-manya na hanganji Mehiru. Patàka-nya yiana na lii langunggu lai nyuna, ‘mu - uti wikimu nyumu hama tuna kamboka hingakau la hongada da banjaru, tàka na nyuna urihi hama ninyapa na wuya ma-ngiangu la wai. Upa-kanubaru dàngu upa-marihaku ndàbaya wàngu wihimu na luku.

³Napa kuyàpa wànggau jalanggu, la rehi pauhi-da da banjaru, hi kumàta-nja nuda da banjaru pa-ruruhu-kau nyumu la mara.

⁴Napa ku-kapàha-nggau la tana hi ku-paràha-nja mbuu ndàba da ma-hawurungu dàngu da banda welingu la nggubulu pinu tana pangaa-nggau nyumu.

⁵Hàla hi kupinu wànja tolu muhungu-mu napa da palindi dàngu da lolangu.

⁶Napa kubuunya na riamu hi na-pambaha-ha da palindi dàngu hi napinu-ha da luku.

⁷Napa la rehi patàlaru-nggunggau ku-pahangindi-nya na awangu dàngu ku-palamaru-ha da kandunu. Ku-kawini-nya na mata lodu la hambeli karumangu dàngu nda jia handaraku-ana na wulangu.

⁸Langatàka-ma, napa kupàda ndàbaha da hambila la awangu, hi ku-pakapàta wuru yila-ya na pinu tana. Nyungga yia, MIRI Hupu Majangga mambàda panii.

⁹La rehi bobaru-nggunya na kabumu la ta - tana pandedi tandamu nadangu na banjaru ma-mangginggitu etina.

¹⁰Langatàka-ma napa ku-payalu-nya na hapanda-nggu hi ku-pakàku-kau nyumu. Napa daita-ya na-palua-ngunggu lima paraï da hanganji dàngu da banjaru. La rehi nu nda - ndàndada ba da-mangàdatu dàngu ra - ràngguda paraï pa-mangàdatu pameti,’ ” wàna.

¹¹I MIRI Hupu Majangga napanii-nya na hanganji Mehiru, “Napa pa-payalungu-ya lai nyumu na hapanda hanganji Mbambilu.

¹²Napa ku-paràha-nja da panjuri welingu la banjaru mambana etida pa-binjiru hapanda-da pa-pameti mbutaya na rayatu-mu. Na rayatu-mu dàngu mbuu ndàba da pa-bokulu eti wàmu napa dakabu pa-mbutangu.

¹³Napa ku-hambàli-ha da bandamu la lu - luku ngia paunu-da. Ka tauya, ka bandaya, nda jia pa-kanubaru-ada-nyapa nuna na wai luku.

¹⁴Ka pa-kahingiru-dunggu-njaka napa da luku la tanamu hi da-lulungu dàngu mandangu-da. Nyungga yia, MIRI Hupu Majangga mambàda panii.

¹⁵Jàka ku-panjadi-yaka maràda telangu kahàna na Mehiru, dàngu ku-patàlaru ndàba-yaka na maninya lai nu, ka pi-duda-nggaka ba MIRI-ka Nyungga.

¹⁶Yiana na panamu pa-mbangatungu napa nanjadi-ya ludu ringu langu. Da kawini welingu la ba - banjaru hawiangu napa daludu wànya ba tanda ringu langu-danya na Mehiru dàngu mbuu ndàba na rayatu-na. Nyungga yia, MIRI Hupu Majangga mambàda panii,” wàna.

¹⁷La tànggalu hakambulu lima wulangu hau[68] la ndaungu pa-hakambulu dàmbu wàna na tanawangu-ma, napanii-ngga i MIRI,

¹⁸“Ha dumu tau nda payatangu, ringu langu-nyawa na rayatu Mehiru. Pangàndi-njawa la pangia tau meti dàngu da paraingu kapingatu hawiangu.

¹⁹Paniinja nyuda, ‘Bai kakaya jia-makaika nyimi nu marihi nggajungu? Napa nyimi ipuru la pangia tau meti, hi pa-tanggilu-nggai la hongada da tau manda tandaya i Ala,’ wàna.

²⁰Napa na banjaru Mehiru dameti karia-nja da ma-hanggubalu la pa-hànjalungu. Ehingu-mana-nyaka na hupungu hapanda pa-pameti ndàbaha nyuda.

²¹Da mini kaborangu da mambeni hanggangu dàngu da tau pabera ma-angunya na Mehiru dayema mbaha etiya na tàkada da tau Mehiru la pangia tau meti. Tuna yia na warada, ‘Nida da tau manda tandaya i Ala mbàda hanggubalu-daka la pa-hànjalungu. Nàhu mai-danyaka hi da-tanggilungu lai yiahu!’ wàda.

²²Lai nuya na tanggilungu ningu na Ahuru, na-winggiru-nya reti panjuri-na. Nyuda mbuu ndàbada ma-hanggubalu la pa-hànjalungu-haka. Da retida la ma-manjolungu halawàla-maha la pangia tau meti. Ba daluri-ipa, da-patumbu-ya na mangàdatu la pinu tana.

²⁴Lai nuya na Elàmu, dàngu da reti panjuri-na la winggiru-na. Dàngu nda puruda lai wai, nyuda mbuu ndàbada da-hanggubalu la pa-hànjalungu, hi dapuru la pangia tau meti. Ba daluri-ipa, da-patumbu-ya na mangàdatu, tàka nàhu mbàda meti-daka hi lupa da-makia dàngu da tau mambàda hanggubalu la pa-hànjalungu.

²⁶Na Mehiku dàngu na Tumbàlu ninja lai nu, da-winggiru-nja reti panjuri-da. Da-hanggubalu la pa-hànjalungu, dàngu nda puruda la wai nyuda mbuu ndàbada. Ba daluri-ipa, da-patumbu-ya na mangàdatu la pinu tana.

²⁷Nda patani pa-bokulungu-aha nyuda hama tuna da mini kaborangu la rehi la handàka-na[69] ba dàngu mbinu madàka-da ba dapuru la pangia tau meti. Nuda da mini kaborangu pa-taningu dàngu hapanda-ha la pitaku katiku-da dàngu temingu[70] la pinu kuruda. Ba daluri-ipa, da-patumbu-ya na mangàdatu la mbuu ndàba tau.

²⁸Tuna nuduka napa ba taninja da tau Mehiru dàngu ba pa-tanggilu-nja la hongada da tau manda tandaya i Ala dàngu da ma-hanggubalu la pa-hànjalungu.

²⁹Lai nu ninya na Endumu dàngu mbuu ndàba da hanganji-na dàngu da maningu kawahangu-na. Àmangu panjuri ma-kapàru-ha làti nyuda, tàka nàhu tanggilungu-danyaka la pangia tau meti hawiangu da manda tandaya i Ala.

³⁰Ni ndàbanja lai nu da ana hanganji weli diangu hamangui da tau Hindungu. Na kawaha-da àmangu na-patumbu mangàdatu, tàka nàhu pa-pamakia-haka dàngu dapuru la pangia tau meti dàngu nda puruda la wai dàngu da tau ma-hanggubalu la pa-hànjalungu. Lai nu da tanggilungu wàngu kamakihu-da dàngu da tau mapuru la pangia tau meti.

³¹Jàka natàka-ka na hanganji Mehiru dàngu da tanatara-na la pangia tau meti dàngu ba naita ndàba-haka nuda da tau mambàda hanggubalu la pa-hànjalungu, da-halembiru da etida. Nyungga yia MIRI Hupu Majangga mambàda panii.

³²Nyunggama ma-pawiti-nya hi na-patumbu mangàdatu la tau luri na hanganji Mehiru, tàka na nyuna, nyuna dàngu tanatara-na napa da-hanggubalu, hi pa-tanggilu-nja dàngu mbuu ndàba da tau manda tandaya i Ala dàngu da ma-yàmihu la pa-hànjalungu. Nyungga yia MIRI Hupu Majangga mambàda panii,” wàna.