Read Kambera YAHAKIALU 36 Bible Online

YAHAKIALU 36 - Kambera bible

YAHAKIALU 36

¹Napanii i MIRI, “Ha dumu tau nda payatangu, panii-njawa da palindi Ihirailu dàngu paràha-nja pa-patingi-nya na hupu liina i MIRI Hupu Majangga,

²‘Ba na-kaluluku dàngu ba naramba-nggai paraï da banjaru la winggiru-mi, da-pawawa-yaka nggubulu-na na Ihirailu. Wàngu mbaha etida ba dapanii ba manguda nyuda-haka nàhu da tandula weli ndaingu. Jia ba tuna, ha dimi palindi dàngu tandula, ana luku dàngu lolangu, ha dimi paraingu mambàda njadi tanyungguru watu dàngu pambàda wàruda paraï da mangia-nggai pambàda rambangu dàngu pa-paaka-da da banjaru la winggiru-mi, patingi-nyawa jàka nggàraya na papanii-na i MIRI Hupu Majangga lai nyimi: La mbumbaru-na na hàngganggu mbàda panjala-ngguhaka da banjaru la winggiru-mi dàngu wàngu pa-ihikungu-na na Endumu, rukuna ba wàngu hawola dàngu paakangu-da, ba dawàhi-ya na tananggu dàngu dawàhi-ha da maràda rumbana. Nàhu kuhàngga dàngu ku-panyara rukuna ba lalu pawawa dàngu roduku-danggai nyimi paraï da nuda da banjaru.

⁷Ku-harangu Nyungga, MIRI Hupu Majangga ba jiangu-ma pa-pawawa-mbuha nyuda napa da banjaru la winggiru-mi.

⁸Tàka na nyuna kupanii-nggai nyimi ha dimi palindi Ihirailu, napa da-kalunga dàngu dahili wua beli da pingi aimi nduma banjaru-nggu na Ihirailu na maluu beliya.

⁹Nyungga duku kupulu angunggau nyumu ha Ihirailu, dàngu jiangu-ma ba hili kataka beliya na tanamu hi hàbaru-nya wini, wànggunggau.

¹⁰Napa kubonja-ya danguna na banjaru-nggu na Ihirailu. Napa dangia-nja da paraingu hi da-pahada belinja da tanyungguru watuda.

¹¹Napa kubonja-ha da mangia-nggau dàngu da bandami, hi lupa dira danguha, darihi dangu welingu la mangilu-na, dàngu da-paana umbuku padangu. Napa daluri-ha lai nu hama tuna la mangilu-na dàngu hi ku-pambokaru-ha, hama tuna na pandedi denimi. Ka pi-danggaka ba MIRI-ka Nyungga.

¹²Napa ku-karia belinya na banjaru-nggu na Ihirailu, ka dahili ngia belinya na tanada. Nuna na tana mangu wiki-mada-nyaka napa dàngu natuu mànu ihina hi nda dahili rimbangu-apa da anada.

¹³Kupanii Nyungga, MIRI Hupu Majangga: Deningu-mana, tana mangangu tauya dàngu nawàhi-ha da anana — na banjaru mangia-nya, ba wàdanya ngara hungana yiana na tana.

¹⁴Tàka na nyuna piti welingu nàhu yiana na tana nda nahili ngangu-apa tau jàka ndia nda nahili wàhi-ahapa da anada. Nyungga yia MIRI Hupu Majangga mambàda panii, wàna.

¹⁵Yiana na tana nda nahili rongu-apa paakangu-da da banjaru jàka ndia nda nahili handepa-apa pawawa-nanya tau. Na tana yiana nda nahili patàlaru-ayapa na banjaru na mangia-nya. Nyungga yia, MIRI Hupu Majangga mambàda panii,’ ” wàna.

¹⁶Napanii-ngga i MIRI,

¹⁷“Ha dumu tau nda payatangu, ba dangia-nyapa na tana wikida da tau Ihirailu, mbàda pairaku-danyaka ba da-paluangu limada dàngu wàngu huri lurida. Nuna na huri lurida manda hidaya wànggu, hama tuna na kawini ma-talànga tàkanya ariyaa-na.[73]

¹⁸Ku-hanubuku-nya na hàngganggu lai nyuda rukuna ba mbàda dangu-manaka na pameti-da tau la tana nuna dàngu na-pairaku-danya wàngu marapu - marapu-da.

¹⁹Kuhuku-nja nyuda pa-namatu-nya na nggoda-nggaduku dàngu na huri lurida nyuda, hàla hi kupai - ihanja la tana tau hangàdangu.

²⁰La nggi biaya na ngia pa-hanggangu ninguda, nyuda naingu-mana na pairaku-danya na tamu matua-nggu. Nadu ba tuna yia na panii tau, ‘Na banjaru yiana banjaru-na i Alaya, tàka na nyuna lupangu-ma da-dunjaku-nya na tana pawua-nanja nyuda i Ala,’ wàdanja.

²¹Kuringu langu Nyungga rukuna ba mbàda pairaku-danyaka na tamu matua-nggu paraï da tau Ihirailu la nggi biaya na ngia pa-hanggangu ninguda nyuda.

²²Jia ba tuna nu, patàka-nyawa jàka nggàraya na papanii-nggu Nyungga MIRI Hupu Majangga la banjaru Ihirailu, ‘Jàka nggàraya napa na pawunda-nggu duku nda lumumi nyimia, ha dimi tau Ihirailu, tàka lumuna na tamu matua-nggu duku, na pambàda pa-iraku-mi la nggi biaya na ngia pa-hanggangu ningumi nyimi.

²³Napa ku-paloha-nya na matua-na na tamunggu na ma-bokulu, na tamu pambàda pa-iraku-mi la hongada da banjaru, ka pi-duda-nggaka ba MIRI-ka Nyungga. Nyungga yia, MIRI Hupu Majangga mambàda panii. Napa jiakai nyimi pa-paita wànggunja da banjaru, ni ba ku-matua duku Nyungga, MIRI Hupu Ma-matua.

²⁴Welingu la nimbihu-da da banjaru dàngu nimbihu-da da tana, napa ku-pauhi-nggai hi ku-pabeli-nggai la tana wikimi.

²⁵Hàlaka nu hi ku-paiharu-nggai wai kahingiru, kai yarahu welingu la mbuu ndàba da marapu-mi dàngu welingu la mbuu ndàba-naka na mambàda pa-iraku-kai nyimi.

²⁶Hàla hi kuwua-nggai eti mabidi dàngu kanandingu mabidi. Da etimi da ma-patongguru watungu napa ku-pahilu-nja eti manundu.

²⁷Napa ku-paliri-nya na Ngahunggu la etimi dàngu hi kumangga-nggai kai luri nunjuha da Ukunggu dàngu hi ikaradaku-nja mbuu ndàba da hupu liinggu.

²⁸Napa ndàdiku-minyaka la tana pambàda wua-nggunja da boku la mangilu-mi. Napa banjaru-nggunggaika nyimi tàka Nyungga Ala-minggaka.

²⁹Napa ku-pahàla-kai welingu la iraku-mika. Napa kuwua-nja pareta da uhu nggàndumu ka datumbu kamboka ka àmbu nahili tunikai rimbangu.

³⁰Napa kubonja-ya na kamboka-da dapingi aimu dàngu da ihida da wokamu, hi ndai hili deninya na rehi rimbangu na ma-pakalana-ya na tamumi la hanggada da banjaru.

³¹Napa inamu beliya na huri lurimi na ma-akatu dàngu na-paluangu-mi lima na manda paràkangu, tàka hi dalabu da etimi hanggangu la wikimi rukuda da njalami dàngu ba pa-mayitangu-kai.

³²Pangàda-nyawa ha dimi Ihirailu, ba kuwunda-ha nuda mbuu ndàbada nda mulami nyimia. Lupangu-maka bàdi ipàdangu makia-mi dàngu pawawa-mi ruku huri lurimi. Nyungga yia MIRI Hupu Majangga mambàda panii,’ ” wàna.

³³Napanii i MIRI Hupu Majangga, “Jàka kuhàla-ka pa-payaha-nggai welingu la mbuu ndàba da njalami, napa ku-pahia-nggai pahili ngiangu la parai - paraingu-mi, tàka hi ipahada belinja da tanyungguru-da.

³⁴Àmangu da tau da malaku li ningu la maràda - maràda-mi daita-ya ba kanjupu buluya nuna na tana, tàka napa ku-papeku-ya kai poka beliya nuna na tana.

³⁵Ka hangàtaru ndàba-nanyaka na tau, ba mbàda panjilungu-naka hi woka Endingu-ya nuna na tana ànga làti, dàngu da paraingu da makabu ba rambanja, hi tanyungguru watuha làti, nàhu mbàda paraingu ma-kapingatu ngia pa-torungu-dahaka dàngu nadangu-ka na-mangia-nja.

³⁶Napa dapinya paraï da banjaru lihimi da manii-injapa, ba Nyungga MIRI mambàda pahada belinja da paraingu mambàda kabu, dàngu mapoka beliha da woka da mabulu. Nyungga yia, MIRI, mambàda panii dàngu jianguma duku ba ku-pahàra-nya,” wàna.

³⁷Napanii i MIRI Hupu Majangga, “Ha dimi banjaru Ihirailu, kuhili pahia-nggai nyimi pakarai pa-ndulangu lai Nyungga; napa ku-bonjaya na dangumi hama tuna kabàba mbimbi.

³⁸Da paraingu da makabu nàhu, napa dambinu wàngu mangia-nja hama tuna na Yeruhali la rehi na ma-làpahu ba nambinu wàngu mbimbi kameti maraku ba lumu pambabu. Ka pi-dimi-nggaka ba MIRI-ka Nyungga,” wàna.