Read Kambera YAHAKIALU 37 Bible Online

YAHAKIALU 37 - Kambera bible

YAHAKIALU 37

¹Kupàda-nya na mbihana i MIRI, tàka na Ngahuna na-karia-ngga papuru la lolangu mambinu wàngu rii kawudu.

²Nalonda-ka i MIRI pawi - winggiru-nya nuna na lolangu, hi kuita-ha da rii kawudu ma-taneparu la nggubulu-na nuna na lolangu da madira danguha dàngu dira màduha.

³Na-paàra-ngga nyungga i MIRI, “Ha dumu tau nda payatangu, peku luri belida yiada da rii kawudu?” wànangga. Kuhema nyungga, “MIRI Hupu Majangga, mbulungu Nyumua dumu mapinya,” wànggunya.

⁴Hàla hi na-paràha-ngga i MIRI pa-patàka-nya na lii languna la rii kawudu màdu nuda,

⁵“Nyungga MIRI Hupu Majangga ku-hapui-nggai kayeku daa lai nyimi ka peku luri belimi.

⁶Kutunggai kalotu dàngu tolumi hi ku-kamburu wànggai manula-mi. Napa kuwua-nggai kayeku hi peku luri belimi. Ka pi-dimi-nggaka ba MIRI-ka Nyungga,” wàmunja, wànangga.

⁷Hàla nyungga Yahakialu kupanii-nja nuda da rii kawudu nunjuya na hupu liina i MIRI. Tàka ba talànga paniinggu nu, kurongu ma-kabi - biriku, ba pa-kiringu-danyaka nuda da rii kawudu pa-papuingu dua wikida.

⁸Ba talànga hamata-ngguha nu, pa-kiringu-danyaka paningu kalotu dàngu toluda nuda da rii kawudu, hàla hi ningu manula-mbuda, tàka na nyuna ndedi da-kayeku-a nuda da ihida.

⁹I Ala napanii-ngga nyungga, “Ha dumu tau nda payatangu, panii-nyawa na ngilu.[74] Pekanya, Nyungga, MIRI Hupu Majangga ba wua-nggunya pareta nyuna ka na-pamaingu welingu la nggi - nggini, ka hapuinja kayeku daa la ihida yiada da mameti ka lupa daluri beli,” wànangga.

¹⁰Ka panii-nggunyaka nunjuya na hupu liina i MIRI, tàka na ngilu hi nahapui-nja kayeku daa la ihida nuda da mameti, hi daluri dàngu hi da-ndolaku. Nggubulu-da dira danguha, ràkangu tomada ka tuha hau pajuru bokulu tanatara.

¹¹Napanii-ngga nyungga i Ala, “Ha dumu tau nda payatangu, yiada da rii kawudu da-paninu maünya na banjaru Ihirailu. Dahali ura milada ba damàdu nyuda, ba nda nggàra pa-monungu dàngu ba nda na-habola na rehida nyuda na manàmu-nya.

¹²Jia ba tuna manyura-wa la banjaru-nggu na Ihirailu, napa ba bunggahu-ngguha Nyungga, MIRI Hupu Majangga da retida nyuda. Napa ku-paluhu-ha nyuda welingu lai nu hi ku-pabeli-nja la tana Ihirailu.

¹³Ba kuwunda-haka nuda mbuu ndàbada, napa napingga banjaru-nggu ba MIRI-ka Nyungga.

¹⁴Napa kuhapui-nja kayeku daa lai nyuda ka paluri-ha nyuda hi ku-pamanggawa-nja pa-ngiangu la tana wikida. Ka pi-danggaka ba MIRI-ka Nyungga. Nyungga yia MIRI mambàda panii dàngu ba jiangu-ma duku ku-pahàra-nya,” wàna.

¹⁵Nahili paniingga nyungga i MIRI,

¹⁶“Ha dumu tau nda payatangu, piti hapungu tokungu dàngu tulihu-ya la tokungu, ‘Pa-hanganji Yahunda’ wàmunya. Hàla piti hili hau tokungu, tulihu-ya nu la tokungu, ‘Pa-hanganji Ihirailu’ wàmunya.

¹⁷Hàlaka nu da dua mbungu tokungu nuda uyopulu pahàmu-manja lupa da-papohungu da hu - hupuda hi hapungu tokungu-ya.

¹⁸Jàka na-paàra-nya na ihina paraïna banjaru-mu,

¹⁹paniinja, napa Nyungga, MIRI Hupu Majangga kupiti-ya na tokungu ninu maüna na Ihirailu hi ku-papohu-nya dàngu na tokungu ninu maüna na Yahunda. Nuda da dua mbungu tokungu ku-panjadi-ha hapungu tokungu hi ku-kitanya la limanggu.

²⁰Kitanja nu da dua mbungu tokungu kau paita-nja la banjaru nuna.

²¹Hàla panii-njawa nyuda, Nyungga, MIRI Hupu Majangga kupiti-ya napa nggubulu-na na banjaru-nggu welingu la ta - tana la ngia palaku-da. Napa ku-pauhi-nja hi ku-karia belinja la tana wikida.

²²Napa ku-panjadi-ha nyuda hau banjaru la tana nuna, la ma-palindingu la Ihirailu. Napa na-pareta-ha haàtu hanganji dàngu hi nda dahili kawita-apa panjadi dua banjaru jàka ndia dua mbungu pareta.

²³Nda dahili pairaku-apa wikida wàngu wundada manjala dàngu hamayangu-da marapu - marapu pa-mayitangu. Napa ku-pahàla-ha nyuda welingu la mbuu ndàba pawunda ma-njàrangu ma-pawiti-nya na kaleka-da lai Nyungga. Napa ku-payaha-nja nyuda; napa nyuda banjaru-ngguha, tàka hi da-Alangga Nyungga.

²⁴Napa pa-pambulungu-ha nyuda la lima haàtu hanganji hama tuna i Hanganji Ndautu na ma-pareta lundu nu - nu. Wàngu tuturu-da napa danunju-ha da Ukunggu. Napa nyuda dàngu ana umbuku-da dangia-nya nuna na tana lundu nu - nu, na tana pawua-nggunya i Yakupu hi dangia-nya boku la mangilu-da.

²⁶Napa kutura hau pa-njanjingu dàngu nyuda na ma-pamàndu-nya na mambiru-da lundu nu - nu. Napa ku-pakanyuru-ha dàngu kubonja-ya na danguda. Napa ku-pahada-nya na Umanggu na ma-padaingu lundu nu - nu lai nu la tanada nyuda.

²⁷Napa Nyungga ku-ndàdiku angunja nyuda, hi da-Alangga Nyungga tàka nyuda hi banjaru-ngguha.

²⁸Jàka ninyaka na Umanggu la padua-da nyuda lundu nu - nu, ka pi-danggaka banjaru hawiangu ba Nyungga, MIRI, mambàda pindiya na Ihirailu panjadi banjaru wikinggu,” wàna.