Read Kambera YAHAKIALU 38 Bible Online

YAHAKIALU 38 - Kambera bible

YAHAKIALU 38

¹I MIRI napanii-ngga nyungga,

²“Ha dumu tau nda payatangu, ràtu-nyawa i Nggòku na maràmba bokulu welingu la ta - tana Mehiku dàngu Tumbàlu la tana Mangguku.

³Panii-nyawa nyuna ba muhu-nangga Nyungga, MIRI Hupu Majangga.

⁴Napa Nyungga ku-wikitu-nya nyuna, ka pakàna-nya katekaru la ngingina, hi hànditu paluhu-ya pa-kariangu pamba tanatara-na. Dira danguha da pamba tanatara-na mali la njara da mapaki ndihi. Nimbihu da panjuri da-maràngga ngàndi temingu dàngu hapanda.

⁵Da-karia-nya panjuri welingu la Perihia, la Hundangu dàngu la Limbia na maràmba, nimbihu-da da-maràngga ngàndi hapanda dàngu nggubi waja.

⁶Mbuu ndàba da mini mbeni hanggangu welingu la tana Nggomiru dàngu la Mbetunggàrama weli diangu dalaku hanggangu karia-nya, dadangumbu da banjaru hawiangu ma-kikungu.

⁷Paràha-nya nyuna ka na-ehingu padua dàngu pareta-ha nggubulu da tanatara ma-pambulungu lai nyuna ka da-ehingu padua panunju-ya na lii pa-irungu-na nyuna.

⁸Napa nda pira mbua ndaungu-kinaka ku-paràha-nya nyuna panjungunya na hau tana dàngu da mangia-nya da pambàda pa-uhingu pabeli welingu la honga banjaru dangu, hàlaka nu hi da-ngiangu dàngu mambiru-da la tana nuna. Napa i Nggòku namandapu-nja da palindi Ihirailu da mambàda mandai pa-malinggitu dàngu da ma-mbinungu tanyungguru watu, tàka nàhu nangia-nya rayatu maluri mambiru.

⁹Napa nyuna dàngu tanatara-na hamangui da banjaru dangu ma-karia-nya damai pa-kaluluku hama tuna làpuru hi da-panggàbalu-nya nggubulu-na na tana hama tuna karumangu,” wàna.

¹⁰I MIRI Hupu Majangga napanii-nya i Nggòku, “Napa la rehi nu uwukuya nyumu na pakakangu akatu.

¹¹Ubotaya la panjungu-nya nuna na tana manda ningu ngia patorungu-na, ngia paluri mambiru hàmuna na mangia-nya la paraingu da manda ningu kangeli-na dàngu nda ningu pa-torungu wàda.

¹²Napa urambangu dàngu uwàhiha da malanja-na na mangia-nya na paraingu na mawatu tanyungguru-ya àmangu. Da mangianya da pa-pauhingu welingu la mà - màtu banjaru, nàhu danguka pawulu-da, dangu bandada dàngu da-ndàdiku-ha la kula pinu tana.

¹³Da ma-ngiangu la Heimba dàngu la Ndendàngu dàngu da ma-danggangu la parai - paraingu la tana Hapanyulu tuna yia ba da-paàra-nggau napa, ‘Hiu pamàtu-ha da tanatara-mu ka jiama-ayaka la pawàhi dàngu la pa-rambangu àmahu marara mabara, banda dàngu pawulu wàngu hiu ngàndi ndàbaha nuda?’ wàdanggau,” wànanya.

¹⁴Tuna nuduka hi na-palewa-ka nyungga i MIRI Hupu Majangga pa-patàka-nya yiana na lii langu lai Nggòku, “Ba jia pàkuya la rehi luri mambiru hàmuna na banjaru-nggu na Ihirailu kau mai panjungu-nja.

¹⁵Uhadangu[75] weli diangu la pangia-mu, na madira marauya, na-karia-nggau tanatara bokulu mawirungu, mbuu ndàbada pamba mali la njaraha welingu la ma - màtu banjaru.

¹⁶Hàla kau kaluluku-nya na banjaru-nggu na Ihirailu hama tuna làpuru ma-nàhaku pinu tana. Jàka jia-yaka na rehina, ku pa-huhuku-nggau nyumu pa-mandapu-nya na tananggu Nyungga. Ba jiakau nyumu pa-paluangu wànggu lima ha Nggòku, napa dapingga paraï da banjaru jàka nggamuka Nyungga, nu ba Ala Ma-matua-ka.

¹⁷Ka nda jia-aya na rukumu nyumu àmangu na papanii wànggu la ngaruda da atanggu da wunangu Ihirailu? Mbàda nyura-mada-nyaka, napa la rehi na manàmu-nya ku-paràhangu haàtu pa-kaluluku-nya na Ihirailu. Nyungga yia, MIRI Hupu Majangga mambàda panii,” wàna.

¹⁸Napanii i MIRI Hupu Majangga, “Na nyuna ba nahàla-kika napa i Nggòku pa-kaluluku-nya na Ihirailu, panyara-nggunyaka Nyungga.

¹⁹Tàka wàngu mbumbaru-na na hàngganggu napa ku-pangàdungu, ba natungu na upungu nda najaru la lodu nuna la tana Ihirailu.

²⁰Mbuu ndàba da iyangu dàngu da mahawurungu, mbuu ndàba da banda bokulu dàngu da banda kudu, dàngu mbuu ndàba na tau la pinu tana nda - ndàndada paraï pa-mangàdatu-ngga Nyungga. Napa da-tanyungguru da palindi, datanàba da ngamba tana dàngu mbuu ndàba da kangeli da-tanyungguru.

²¹Hi ku-pakatàtaku wànya ma - màtu tàparu[76] i Nggòku. Nyungga yia, MIRI Hupu Majangga mambàda panii. Da tau la ngabana napa da-maràngga pakalulukungu wàngu hapanda-da.

²²Napa kuhuku-nya nyuna wàngu kanyaki pa-nggàbalungu dàngu mbungu wai ria. Ura kawalu dàngu ura watu mboka, epi dàngu tana malira pahanubuku-nggunya napa nyuna dàngu da tanatara-na dàngu da banjaru dangu mambàda pa-mbulungu lai nyuna.

²³Tuna nuduka ba ku-paloha-nya la mbuu ndàba na banjaru ba ku-bokulu dàngu ba ku-matua Nyungga. Ka pi-duda-nggaka ba MIRI-ka Nyungga,” wàna.