Read Kambera YAHAKIALU 39 Bible Online

YAHAKIALU 39 - Kambera bible

YAHAKIALU 39

¹Napanii i MIRI Hupu Majangga, “Ha dumu tau nda payatangu, panjala-yawa i Nggòku na maràmba bokulu welingu la tana Mehiku dàngu la tana Tumbàlu, dàngu panii-nyawa nyuna ba muhu-nangga Nyungga.

²Napa Nyungga kuwikitu-nya nyuna, hi hànditu paluhu-ya weli diangu la pangia marau, hi kungàndi-ya la palindi - palindi Ihirailu.

³Lai nu napa kupalu-ya na tandai panana hi na-yàmihu welingu la lima kalaina, hi kupuha-ha da ana panana welingu la lima kawana-na.

⁴Napa da-hanggubalu la pinu palindi - palindi Ihirailu, nyuna i Nggòku pa-kariangu mbuu ndàba tanatara-na dàngu da angu pa-kuhinguna, tàka da metida nyuda napa kuwua-ha la mbuu ndàba ma-hawurungu dàngu banda bohu ka dangaanja.

⁵Nuda da panjuri napa danjoru hi dameti la wo - woka. Nyungga yia, MIRI Hupu Majangga mambàda panii.

⁶Napa kupatumbu-ya na mutungu la tana Mangguku dàngu la hingi - hingi tehiku, ngia pa-mambiru-da da mangia-nja. Ka pi-ndàba-danggaka nyuba ba MIRI-ka Nyungga.

⁷Tàka na nyuna la njonga tau Ihirailu, napa ku-paloha-nya na tamu matua-nggu, dàngu nda jia hili pa-irakuayapa nu na tamunggu. Ka pi-danggaka da banjaru ba MIRI-ka Nyungga, Ala Ma-matua-na na Ihirailu,” wàna.

⁸Napanii i MIRI Hupu Majangga, “Langatàka, jiangu-ma natàka nu na lodu papanii-nggu.

⁹Napa dapaju - jurungu ba daluhu-ha da tau ma-ngiangu la parai - paraingu Ihirailu pa-pauhi-nja da pambeni wàngu pa-dunjakungu, nu da temingu dàngu hapanda, tandai pana dàngu ana pana dàngu katiri palu. Nuda mbuu ndàbada datuha ai pa-mutungu, dàngu datoma nduma pihu mbua ndaungu.

¹⁰Ba tuna nda nggàra ilunga-apa nyuda pa-pauhingu ai pamutungu la woka jàka ndia papunggu ai la omangu, nadu da pambeni wàngu da pa-dunjakungu ba datoma dangu-mada ka pamutu-nja. Napa nyuda da-rambangu dàngu dawàhi-ha da banda da malanja-da da tau da mambàda rambanja dàngu da mambàda wàhiha da banda da malanja-da nyuda. Nyungga yia, MIRI Hupu Majangga mambàda panii,” wàna.

¹¹Napanii i MIRI, “Jàka da-hàrangu-ka nuda mbuu ndàbada, napa kuwua-nya tana reti la Ihirailu i Nggòku, la Lolangu Papala la pahunga lodu welingu la Tehiku Meti. Lai nu-duyaka napa na ngia patani-nya i Nggòku dàngu mbuu ndàba da tanatara-na, napa na lolangu nuna ‘Lolangu Pambana i Nggòku,’[77] wàdanya.

¹²Pihu mbua wulangu mandaina pa-kanggutaku napa da tau Ihirailu ba datani-nja mbuu ndàbada nuda da mameti ka àmbu nahili iraku nuna na tana.

¹³Mbuu ndàba na mangia-nya na tana napa da-pambapangu nu la taningu; tàka ndumana nuna napa da-ngalangu limbana la lodu talunggu. Nyungga yia, MIRI Hupu Majangga mambàda panii.

¹⁴Ba na-làpahu-ka nu na pihu mbua wulangu, pa-wuangu wai ngabaha napa da manda pirada da tau ka danjada-nya nu na tana la pahimbu tau meti[78] ma-tawàlahu-ipa la tana, tàka jàka ningu, ka taninja, ka payaha-nya welingu la iraku nuna na tana.

¹⁵Nu ba da-njadangu, handàka hunggu - handàka hungguda rii kawudu tau, napa da-tunja tanda la lihida, ka daita-ha nuda paraï da matanggu taningu ka datani-nja nuda da rii kawudu la Lolangu Pambana i Nggòku.

¹⁶Tuna nuduka ba payaha-nya nuna na tana welingu la iraku. (Napa la lodu malamiri, la lolangu nuna ningu paraingu mahama tamuna dàngu na pambana i Nggòku.)” wàna.

¹⁷Napanii-ngga nyungga i MIRI Hupu Majangga, “Ha dumu tau nda payatangu, paau-njawa mbuu ndàba da ma-hawurungu dàngu da banda hawiangu, ka da-pamainguha welingu la nggi - nggini ka dangangu kameti pa-paloku-nggunja nyuda. Napa ku-paloku mbabu dira matiki la palindi - palindi Ihirailu, ngia papeku nganguda tolungu dàngu peku unungu-da wai ria.

¹⁸Peku nganguda meti mini kaborangu, dàngu paunu-nja da wai riada da maningu kawaha-da la pinu tana. Nuda da mini kaborangu dàngu da maningu kawaha-da pa-pameti-ha napa hama tuna kamàmbi bumbu jàka ndia hama tuna ana kamàmbi jàka ndia hama tuna hapi mbàtingu mbokaha.

¹⁹Ba kuhàla-ka pa-pameti-ha da tau nuda hama tuna kameti, ngga ndàba-danjaka napa da aparu-da paraï da ma-hawurungu dàngu da banda hawiangu lundu dalabu eti dàngu da-unungu wai ria lundu da-maüku.

²⁰La menjanggu peku mbihu wànguda mbuu ndàbada da njara dàngu da ma-kaliti-ha dàngu da mini mbeni hanggangu. Nyungga yia, MIRI Hupu Majangga mambàda panii,” wàna.

²¹Napanii i MIRI, “Napa ku-pajiliku-nya na mangunju-nggu la ba - banjaru. Napa nyuda mbuu ndàbada daita-ya nggiki hama palaku-nggunya na kawaha-nggu pa-pahàra-nja da botangu ma-padeningu.

²²Piti welingu la rehi nu napa dapinya paraï da tau Ihirailu ba Nyungga-maka MIRI Alada nyuda.

²³Dàngu napa dapinya paraï mbuu ndàba da banjaru ba ruku njalada lai Nyungga-maka hi pangàndi-nja la tanawangu da tau Ihirailu. Mbàda handaluru-nggunjaka nyuda hi kumàta-nja ba na-pakàku-ha muhu dàngu ji pameti-ha la pa-hànjalungu.

²⁴Ku-palua-nja lima pa-topangu dàngu na iraku dàngu na akatu-da nyuda, hàla hi ku-handaluru-nja,” wàna.

²⁵Napanii i MIRI Hupu Majangga, “Tàka na nyuna nàhu napa kuaï-ya na banjaru Ihirailu da ana umbuku-na i Yakupu, dàngu hi ku-pambokaru beliha. Tuna nuduka ba kumangga-nya ka pa-daingu tembiya na tamunggu.

²⁶Jàka da-ndàdiku beli dàngu mambiru-daka la tana wikida nyuda, dàngu jàka nda ana haàtu-mbupa ma-pangàdu-nja nyuda, ka maromba-danyaka napa nggiki hamana ba pa-makia-ha ruku katadaku-da lai Nyungga.

²⁷Napa kungàndi beliha nyuda welingu la tana muhuda, rukuna nuna na pawunda-nggu na-lohangu na matua-nggu la mbuu ndàba na banjaru.

²⁸Ka pi-danggaka paraï banjaru-nggu ba Nyungga-maka MIRI Alada nyuda. Nadu ba Nyunggama ma-pangàndi-nja la tanawangu, tàka Nyunggamai ma-karia belinja la tana wikida, tàka nda haàtu-a pa-bànjalu-nggu lai nu.

²⁹Napa kuburi-nya Ngahunggu na banjaru Ihirailu, dàngu nda jia hili handaluru-anggu-njapa nyuda. Nyungga yia, MIRI Hupu Majangga mambàda panii,” wàna.