Read Kambera YAHAKIALU 40 Bible Online

YAHAKIALU 40 - Kambera bible

YAHAKIALU 40

¹La rehi nu tànggalu hakambulu wulangu hauya, la padua kambulu lima wàna na ndaungu tanawangu-ma, hakambulu patu mbua ndaungu la hambeli mberana na Yeruhali, ba kupàda-nya na mbihana i MIRI hi nalaku karia-ngga.

²La hau harii mata, na-karia-ngga i Ala la tana Ihirailu hi nawotu-ka la palindi jangga. Kuita-ha la hangganggu ha-kabubuku-da da uma ba hama hau paraingu-ha.

³Na-karia-ngga lai nu hi kuita-ya na haàtu tau mini na ma-handaraku hama parunggu-ya ba na-ndolaku la lihi pindu bokulu. Na-kitangu liku hukutu welingu la tera linangu dàngu ai hukutu.

⁴Napanii-ngga nu na tau mini, “Ha dumu tau nda payatangu, patingi pahàmu-nja dàngu hamata-ha mbuu ndàba da pa-paita-nggunggau nyumu, ba ndumana nuna-duya hi karia-nggau yiahu. Paniinya na banjaru Ihirailu mbuu ndàba da paita-mu napa,” wànangga.

⁵Hàla hi kuita-ya na Umana i Miri na pa-winggirungu dindi watu. Pa-kiringu-nanyaka nu na tau mini pa-hukutu-ya na dindi watu wàngu ai hukutu matailu metiru madita-na. Na-lohangu ba tailu metiru janggana dàngu tailu metiru-mbu timbina nuna na dindi watu.

⁶Hàlaka nu hi nalaku-ya la pindu bokulu ma-hanggangu la pahunga lodu. Naheinya na panongu-na ba natàka nu dita na-hukutu-ya na patenga pindu, tailu metiru timbina.

⁷La hambeli pindu bokulu nuna ningu hau kanjilitu tàka la karaha hapapa - hapapa-na maràngga ninguda tailu mbua kurungu ngia padai. Hama bokulu ndàba-mada nuda da kurungu; da hadada da-kapatungu larada, tàka nimbihu larada tailu metiru nunjuda. Da dindi watu padira nimbihu kurungu hama timbi-mada, dàmbu paradua metiru-da. Nuna na kanjilitu na-panunjungu hilu tailu metiru dàngu na-orangu la kuru bokulu ma-hanggangu la Umana i MIRI. Nuna na tau mini na-hukutu-ya nuna na kuru bokulu hi na-lohangu ba patu matiru ndàbaru-na; la hupu pindu bokulu mbara daluya na pangia-na, nu la marihi mareni-nya na Umana i MIRI. Da dindi watu da mahanggangu la Umana i MIRI, hau metiru timbida.

⁸

⁹

¹⁰

¹¹Hàlaka nu nahili hukutu-ya na mbàlaru-na na kanjilitu la pindu bokulu paraïna nu na tau mini, nomu paradua metiru-na, dàngumbu na mbàlaru-na nu na pindu bokulu lima metiru-na.

¹²La hangga kurungu ngia padai da matailu metiru nunjuda-ndàbaru-da ningu dindi watu kendaru na ma-paradua metiru janggana, tàka na timbina paradua metiru-mbuna.

¹³Hàla hi na-hukutu-ya paraïna nu na tau mini na marau-na welingu la kajia dindi watu hau kurungu ngai padai lundu la kajia dindi watu kurungu la hapapa-na, hakambulu dàmbu paradua metiru-na.

¹⁴Na-hukutu-mbuya nu na rowa bokulu: hakambulu metiru-na na nunjuna. Na pinduna nu na rowa bokulu na-orangu la hanamba hambeli-na na Umana i MIRI.[79]

¹⁵Na marauna welingu la pindu bokulu la hambeli lundu la dindi watu rowa bokulu la pangia na ma-hanggangu la Umana i MIRI dua kambulu lima metiru-na.

¹⁶La dindi watu kajia-da dàngu la dindi watu padira-da nuda da kurungu ningu katonga - katonga kududa. Da dindi watu mbara dalu da ma-hanggangu la kanjilitu, papa-manandangu wàngu nggambaru pingi wolaha.

¹⁷Tunaka nu na-karia-ngga paraïna nu na tau mini la hanamba hambeli-na na Umana i MIRI ba li ningu la pindu bokulu. La karaha dindi watu la hambeli weli winggiru-na nuna na Umana i MIRI patungu tailu kambulu kurungu-ya. La hanggada nuda da kurungu papalatangu watuha

¹⁸ma-wiggiru-nya nuna na hanamba. Na hanamba mbara lua la hambeli nahiri kendaru-pa welingu la hanamba mbara dalu.

¹⁹Lai nu ninya nahili hau pindu bokulu na marihi jangga pangia-na dàngu na ma-hanggangu la hanamba mbara dalu. Nuna na tau mini na-hukutu-ya na pa-maraungu-da nuda da pindu bokulu da madàmbu-da: lima kambulu metiru-na.[80]

²⁰Tunaka nu na tau mini na-hukutu-ya na pindu bokulu mbara dia na ma-hanggangu la hanamba mbara dalu.

²¹La pindu bokulu nuna da tailu mbua kurungu ngia padai la nimbihu karaha kanjilitu-da da dindi watu padira dàngu na rowa bokulu-na hama ndàba-mada da hukutu-da dàngu da maninja la pindu bokulu pahunga lodu. Nggubulu-na na kanjilitu pindu bokulu nuna dua kambulu lima metiru nunjuna tàka na ndàbaru-na hakambulu dàmbu paradua metiru-na.

²²Hamangui na rowa bokulu-na, da katonga-na, dàngu da nggàmbaru pingi wolana hamada dàngu da maninja la pindu bokulu pahunga lodu. Na pa-kandekalu na mapihu ndàdiku-na na-orangu la pindu bokulu nuna, tàka la hupuna ningu rowa bokulu ma-hanggangu la hanamba hambeli-na na Umana i MIRI.

²³La tubana na pindu bokulu mbara dia, ninya na hili hau pindu bokulu ma-orangu la hanamba mbara dalu, hama tuna na maninya la hapapa pindu bokulu pahunga lodu. Nuna na tau na-hukutu-ya na pa-maraungu-da nuda da pindu bokulu da madàmbu-da: lima kambulu metiru-na.

²⁴Na pangalangu-na, na-kariangga nuna na tau mini la pindu bokulu mbara luru hi na-hukutu-ya. Na-lohangu ba na-pahama nuna na pindu bokulu dàngu da pindu bokulu hawiangu.

²⁵Da katonga-da da kurungu-na hama-mada dàngu da maninja la pindu bokulu hawiangu. Na nunjuna nuna na kanjilitu pindu bokulu dua kambulu lima metiru-na, tàka na ndàbaru-na hakambulu dàmbu paradua metiru-na.

²⁶Pihu ndàdiku-na na pa-kandekalu na ma-orangu la pindu bokulu nuna dàngu na rowa bokulu-na la hupu-mbunanya, na-hanggangu la hanamba hambeli-na na Umana i MIRI. Da dindi watu mbara dalu da ma-hanggangu la kanjilitu, pa-pa-manandangu wàngu nggàmbaru pingi wolaha.

²⁷Lai nu ningumbu pindu bokulu ma-orangu la hanamba mbara dalu. Nuna na tau mini na-hukutu-ya na pa-maraungu-da nuda da pindu bokulu da madàmbu-da: lima kambulu metiru-na.

²⁸Na pangalangu-na na-karia-ngga nuna na tau mini patama la hanamba mbara dalu ba li ningu la pindu bokulu mbara luru. Na-hukutu-ya nuna na pindu bokulu mbara luru, tàka na hukutu-na da pahama dàngu da pindu bokulu mbara lua la hambeli.

²⁹Da kurungu ngia padaina, na rowa bokulu-na, dàngu da dindi watu mbara daluna hama-mada la pindu - pindu bokulu hawiangu. Da kurungu la pindu bokulu yiana ningumbu katonga-da. Na kanjilitu pindu bokulu nuna dua kambulu lima metiru nunjuna dàngu hakambulu dàmbu paradua metiru ndàbaru-na.

³⁰

³¹Tàka na nyuna na rowa bokulu-na na-hanggangu la hanamba mbara lua la hambeli. Da dindi watu mbara dalu da ma-hanggangu la kanjilitu, pa-pamanandangu wàngu-mbuha nggàmbaru pingi wola. Na pa-kandekalu-na na mawalu ndàdiku-na na-orangu la pindu bokulu nuna.

³²Hàlaka nu na-karia-ngga na tau mini nuna patama la hanamba mbara dalu ba li ningu la pindu bokulu pahunga lodu. Na-hukutu-ya nuna na pindu bokulu tàka na hukutu-na hama-mada dàngu da pindu bokulu hawiangu.

³³Da kurungu ngia padaina, da dindi watu mbara daluna dàngu na rowa bokulu-na da hukutu-da jia-maha hama tuda la pindu - pindu bokulu hawiangu. La kurungu nuda dàngu la rowa bokulu-na ningu katonga-da. Na kanjilitu pindu bokulu nuna dua kambulu lima metiru nunjuna dàngu hakambulu dàmbu paradua metiru ndàbaru-na.

³⁴Na rowa bokulu-na na-hanggangu la hanamba mbara lua la hambeli. Da dindi watu mbara dalu da ma-hanggangu la kanjilitu, pa-pa-manandangu wàngu nggàmbaru pingi wolaha. Na pa-kandekalu-na na mawalu ndàdiku-na na-orangu la pindu bokulu nuna.

³⁵La hupu njàpuna na-karia-ngga na tau mini nuna la pindu bokulu mbara dia. Na hukutu-ya nuna na pindu bokulu tàka na hukutu-na hama-mada dàngu da pindu bokulu hawiangu.

³⁶Hamangui da kurungu ngia padaina, da dindi watu mbara daluna dàngu na rowa bokulu-na hama-mada dàngu da maninja la pindu bokulu hawiangu. Da kurungu-na dàngu na rowa bokulu-na ningu katonga-da. Na nunjuna na kanjilitu pindu bokulu nuna dua kambulu lima metiru-na tàka na ndàbaru-na hakambulu dàmbu paradua metiru na.

³⁷Na rowa ngia ngabana[81] na-hanggangu-mbu la hanamba mbara lua la hambeli. Da dindi watu mbara dalu da ma-hanggangu la kanjilitu, pa-pa-manandangu wàngu nggàmbaru pingi wolaha. Na pa-kandekalu-na na mawalu ndàdiku-na na-orangu la pindu bokulu nuna.

³⁸La hanamba mbara lua la hambeli ninya na hau kurungu ma-bonjangu la pindu bokulu mbara dalu la mbara diana. Welingu la kurungu ma-bonjangu nuna ninya na hau pindu ma-orangu la rowa bokulu. Lai nuduka na ngia pabaha-ha da banda nduma kameti maraku patunu.

³⁹La rowa bokulu nuna, ninja ba patuda da menja, dàmbuda la hingi hapapa - hapapa-na. La pinu menja nuda-duka ngia parupu-ha da banda kameti maraku patunu, kameti maraku podahu njala jàka ndia kameti maraku pa-belingu runggi.

⁴⁰La hambeli rowa bokulu nuna hiji ninjai ba patuda da menja, dàmbu la hingi hapapa - hapapa-na na pindu bokulu mbara dia.

⁴¹Jia ba tuna, nggubulu-da walu mbuada da menja da ma-ninja ngia parupu kameti maraku: patuda mbara dalu, dàngu patuda la hambeli hanamba.

⁴²Da patu mbua menja la kurungu ma-bonjangu ngia pa-paloku-ha da kameti maraku patunu pa-pandoi welingu la watuha. Na janggada nuda da menja paradua metiru-da, tàka da pinuda da-kapatungu kabihu-da, danunju dàngu da ndàbaru-da da-maràngga tailu beri patu metiru. La pinuda da menja pa-bànjalu-ha da paràma wàngu ba rupu banda kameti maraku.

⁴³La hingida nuda da menja ningu halinggi-da da mapihu kambulu lima mili metiru mbàlaru-da. Mbuu ndàba da tolungu da pa-maraku wàngu pa-bànjalu-ha la pinuda nuda da menja.

⁴⁴Tunaka nu hi na-karia-ngga la hanamba mbara dalu paraïna nu na tau mini. Lai nu ninja dàmbuda da rowa bokulu, na hau la pera pindu bokulu mbara diaya dàngu na-hanggangu hu luru,[82] tàka na haui la pera pindu bokulu mbara luruya dàngu na-hanggangu hu dia.

⁴⁵Nu na tau mini napanii-ngga nyungga ba ndumada da ratu da mapawai ngaba la Umana i MIRI-ya nuna na rowa bokulu ma-hanggangu hu luru,

⁴⁶tàka na rowa bokulu na ma-hanggangu hu dia ndumada da ratu da mapawai ngaba la ngia pawotu maraku-ya. Mbuu ndàba da ratu nuda ana umbuku-na i Handuku-maha bàdi. Nadu welingu la kabihu Lewi mbulungu ana umbuku-na i Handuku-a bàdi mapeku pa-hurungu la hanggana i MIRI palumu-nya Nyuna la rehi lumungu.

⁴⁷Nuna na tau mini na-hukutu-ya na hanamba mbara dalu. Na-kapatungu kabihu-na: na nunju dàngu na ndàbaru-na da-maràngga lima kambulu metiru. Na Umana i MIRI la patama loduya, tàka la hanggana ninya hau na ngia pawotu maraku.

⁴⁸Tunaka nu hi nangàndi-ka nyungga la rowa mangia ngaba la Umana i MIRI ba wàngu pa-kandekalu ba ana nda pira ndàdiku-da. Na-hukutu-ya na rowa ngia pali ba tama; na lerangu-na na papihungu padàmbu paradua metiru, dàngu da dindingu la halinggi-na da madàmbu-da ba hau paradua metiru-na timbina.[83] La ka-lai la kawana-na maràngga ninguda hapungu kambaniru watu. Nuna na rowa na mangia ngaba jua-a na nunjuna hakambulu metiru-na tàka na ndàbaru-na nomu metiru-na.