Read Kambera YAHAKIALU 44 Bible Online

YAHAKIALU 44 - Kambera bible

YAHAKIALU 44

¹Tunaka nu na-karia-ngga paraïna nuna na tau mini la pindu bokulu mbara lua la hambeli la pahunga lodu ngaba Umana i Miri. Nuna na pindu bokulu na-kabitangu,

²napanii-ngga i MIRI, “Yiana na pindu bokulu lupangu-ma na-kabitangu mànu dàngu àmbu-jia bunggahu duya. Àmbu jia haàtu-du matama-nya, nadu Nyungga, MIRI Ala Ihirailu, ba mbàda li ningu-ngguka la pindu bokulu yiana ba kutama la Umanggu. Jia ba tuna, lupangu na-kabitangu mànuma bàdi yiana na pindu bokulu.

³Na nyuna na maningu kawahangu na ma-pareta pekuna palua la kanjilitu pindu bokulu nuna pangaanya na pangangu matua la hangganggu Nyungga. Ba natama lupangu bàdi nali ningu la rowa bokulu dàngu ba nabeli-ya la ànda nuna-mbuya nali ningu,” wànangga.

⁴Tunaka nu na-karia-ngga paraïna nuna na tau mini la pindu bokulu mbara dia na ma-papangu dàngu na Umana i MIRI. Ku-hamata-ya, hi kuita-ya ba na-panggàbalu-nya handaraku ma-kalilangu nu na Umana i MIRI na tandana ba ninya i MIRI. Hàla hi kupawawa wikinggu pa-marubuku,

⁵tàka hi napanii-ngga i MIRI, “Ha dumu tau nda payatangu, hamata pahàmu-nya jàka nggàraya na paita-mu dàngu na parongu-mu. Ba panii-nggunggau-nya mbuu ndàba da kalaratu dàngu da uku rukuna yiana na Umanggu. Tulihu pahàmu-nya jàka nggamuha da pa-pahiangu patama la Umanggu dàngu jàka nggamuha da pa-hiringu.

⁶Panii-nyawa na banjaru Ihirailu na makàli patula ngganggangu, ba nda kubihu-apa Nyungga, MIRI Hupu Majangga, pamàta-nja nyuda pawunda ma-iraku.

⁷Mbàda pa-iraku-danyaka nyuda na Umanggu, nadu ba talànga wotuha da aparu dàngu da ria kameti maraku lai Nyungga, da-pahia-nja patama hu dalu da tau hangàdangu da manda puru la wai, dàngu da manda manundu lai Nyungga. Wàngu pawunda-da nuda da pa-mayitangu pangga-danyaka na pa-njanjingu-nggu dàngu nyuda.

⁸Nda nyuda wikia ma-paloku-ha da lii matua la Umanggu, tàka tau hangàdangu pa-panduma-da la pa-paloku.

⁹Nyungga MIRI Hupu Majangga, ku-bobaru-ya ba nda pa-pahiangu-aha patama la Umanggu, da tau hangàdangu manda puru la wai dàngu da tau manda manundu lai Nyungga. Nuna nu tuna numbu la tau hangàdangu ma-ndàdiku pa-daingu la njonga banjaru Ihirailu,” wàna.

¹⁰Napanii-ngga nyungga i MIRI, “Napa Nyungga kahuku-nja da tau Lewi da mambàda pa-angungu dàngu tau Ihirailu hawiangu, la pa-taliuru-ngga Nyungga dàngu la pa-lumungu marapu.

¹¹Na ngia papeku-na nyuda palumu-ngga Nyungga daa la Umanggu, mbulungu-anaka ka matanggu ràma dàngu matanggu dai pindu bokulu-ahaka. Pekuna nyuda pa-hambàli banda kameti maraku patunu dàngu maraku pawotu dàngu ngera-madanya la palumu mànunya na banjaru.

¹²Tàka rukuna ba mbàda patumbu-daka lii marapu nduma banjaru Ihirailu, tàka ba tuda nu ruruhu-danya nuna na banjaru la njala, ka harangu-nggunyaka Nyungga MIRI Hupu Majangga ba lupangu-ma bàdi pa-hukungu-ha nyuda.

¹³Nda peku-adapa la lumungu hama tuna ratuha nyuda jàka ndia la pa-jonggaru-ha da ma-matua ndumanggu Nyungga, jàka ndia la patama-nya na pangia Mahupu Matua. Nuna-duyaka na hukungu nduma da pawunda iraku pambàda wundada.

¹⁴Nàhu panduma-nggunjaka paràma-ha da paràma mambotu da pawàngu la Umanggu,” wàna.

¹⁵Napanii i MIRI Hupu Majangga, “Ba na-taliuru-ngga Nyungga na banjaru Ihirailu, da ratu Lewi welingu la ana umbuku-na i Handuku pa-daingu tuturu-da palumu-ngga Nyungga la Umanggu. Jia ba tuna lupangu nyuda-maka bàdi nàhu da malumu-ngga dàngu da mamai la hangganggu pawotu maraku aparu dàngu wai riada da kameti maraku.

¹⁶Mbulungu nyuda da mapeku patama la Umanggu, palumu-ngga Nyungga la ngia pawotu-ngga maraku dàngu da mauli-nya na lii lumungu la Umanggu.

¹⁷Ba datama la pindu bokulu ma-orangu la talora mbara dalu, lupangu bàdi dawotu paki tera linangu. Àmbu jia paki-duda paki welingu la wulu mbimbi jàka talànga pawai ngabada la talora mbara dalu, jàka ndia la Umanggu.

¹⁸Ka àmbu da-pambanahungu dàngu ka àmbu da hanggobungu, lupangu-ma bàdi nyuda dahau hakalaki tera linangu manda ningu boru bànggingu, dàngu da tera la katiku-da welingu la tera linangu-mbuha.

¹⁹Jàka dalua la talora mbara lua la hambeli, la ngia pa-pauhi-na na banjaru, lupangu-ma bàdi damàta-nja da paki ndihida nyuda da ratu la ku - kurungu matua la Umanggu, hi dapaki paki hawiangu ka àmbu da-pa-hanggàmaru-ya na banjaru [92] paraï da nuda da paki pa-pahinggilu.

²⁰Da ratu àmbu da-kikiru pabulu-duha da katiku-da, jàka ndia àmbu da-pahia-dunja pamalai da lunggida. Lupangu-ma pa-kàtahu pa-kababa-ha da lunggida pa-namatu-nya na kalaratu pambàda kawuku.

²¹Àmbu da-unungu-du angguru jàka datama la talora mbara dalu.

²²Mbulungu anakaria Ihirailu mandedi pingu mini, jàka ndia kawini meti lei papaha ratua bàdi pa-kanoma-da da ratu. Àmbu jia kanoma-duda kawini pa-wàrungu.

²³Lupangu-ma da ratu da papeka-nya na banjaru-nggu la paheka-nya jàka nggàraya na pa-pahinggilu ndumanggu Nyungga dàngu jàka nggàraya na mandia-a, jàka nggàraya na ma-yahangu pa-namatu-nya na huri lumungu dàngu jàka nggàraya na ma-iraku.

²⁴Jàka ningu ma-palumungu la uku, lupangu-ma nyuda da palànyapu-ya pa-namatu-nja da ukunggu. Lupangu dambabu-nja da lodu mbabu la huri lumungu, pa-namatu-nja da kalaratu dàngu da ukunggu, dàngu la patembi-ya na lodu Hangahu ba lodu pa-pahinggilu-ya ndumanggu Nyungga.

²⁵Àmbu na-pairaku wikina na haàtu ratu wàngu jonggaru-na mameti, hinggilu-na jàka meti ina ama-nanya, anana, anguna paluhu jàka ndia anawini-na mandedi mangoma.

²⁶Jàka na-yahangu belika lupangu-ma nahili nediki pihu mbua lodu,

²⁷hi namangu palua la talora mbara daluna na Umanggu, ka nawotu kameti maraku nduma pa-payahangu wàngu wikina ka peku pawai ngaba belina la Umanggu. Nyungga yia, MIRI Hupu Majangga mambàda panii.

²⁸Ba da-ngalangu wai ngaba ratu nyuda da ratu jia-mayaka na kangeha ndumada nyuda welingu la pawua-nggunya na Ihirailu lupa ana umbuku-na. Àmbu nggàradu manguda nyuda la Ihirailu: jiaka Nyungga-maka manguda nyuda.

²⁹Lupangu-ma nyuda daluri wàngu hunggu maraku uhu nggàndumu, kameti maraku podahu njala, dàngu kameti maraku pa-belingu runggi; dàngu mbuu ndàba-daka da pambàda pa-hinggilu ndumanggu Nyungga lupangu-ma pa-wuangu-ha lai nyuda.

³⁰Da ratu lupangu-ma pa-wuangu-ha marihi hàmu halawàla welingu la mbuu ndàba kawunga ihi raïngu, dàngu welingu la nggàra biaha da pahunggu maraku lai Nyungga. Handàka pandoi - handàka pandoi-da roti da tau Ihirailu da roti da ma-wungangu ndumada da ratuha. Napa ku-pakanyuru-ha da uma banjaru Ihirailu.

³¹Da ma-hawurungu dàngu da banda hawiangu da mameti wikida, jàka ndia da pa-njàkilu banda bohu, nda peku ngaa-adanja ratu,” wàna.