Read Kambera YAHAKIALU 45 Bible Online

YAHAKIALU 45 - Kambera bible

YAHAKIALU 45

¹Ba ndedi pabe - berinya nuna na tana ka tana kangeha nimbihu kabihu-ya, lupangu-ma kawàri pàkunya hangia ndumana i MIRI. Lupangu-ma hakambulu dàmbu paradua kilu metiru nunjuna, dàngu hakambulu kilu metiru[93] ndàbaru-na nuna na tana. Mbuu ndàba la ngabana nuna, ma-matua-ya wàda-nya.

²Hawiangu welingu la tana nuna nduma Umana i MIRI na-kapatungu kabihu-na, dua ngahu lima kambulu metiru na hukutu nimbihu karaha-na dàngu na-winggiru-nya mambila madua kambulu lima metiru mbàlaru-na tàka lupangu lai numaya bàdi pahada ninya na Umana i MIRI.

³Na beri bikana nuna na tana, na ma-hakambulu dàmbu paradua kilu metiru nunjuna, dàngu lima kilu metiru ndàbaru-na lupangu-ma ka nduma ngia pa-pahada-nya na Umana i MIRI-ya, nu na tana ma-kanjupu matua-na.

⁴Nuna na tana na-matua, dàngu pa-panduma-nja da ratu da mapawai ngaba palumu-nya i MIRI la Umana i Miri. Hawiangu welingu la tana nuna nduma pangia umada nyudaha napa, tàka na hawiangui nduma pangia Umana i MIRI-ya.

⁵Nahili paradua haunai welingu la tana nuna na ma-hakambulu dàmbu paradua kilu metiru nunjuna dàngu lima kilu metiru ndàbaru-na pa-pandumangu la tau Lewiya da maràma la Umana i MIRI. Lai nu napa ngia patura-ha da paraingu ngia pandàdiku-da nyuda.[94]

⁶La perana nuna na tana ma-matua lupanguma hekanya hau tana na ma-hakambulu dàmbu paradua kilu metiru nunjuna dàngu dàmbu paradua kilu metiru ndàbaru-na, nduma hau paraingu ka nangia-nya nggamu biaya welingu la banjaru Ihirailu.

⁷Nduma maningu kawahangu ma-katangu pareta lupangu-ma ningu tana pa-payemangu-ya. Nuna na tana na-tayilingu welingu la padira patama loduna na tana pa-pahinggilu ndumana i MIRI, lundu la Tehiku Padua, dàngu welingu la padira pahunga loduna nuna na tana pa-pahinggilu, lundu la padira pahunga loduna na tana nuna. Ba tuna na nunjuna na-pahama dàngu na nunju hau tana pa-wuangu-ha da kabihu Ihirailu.

⁸Nuna na tana ka manguna na maningu kawahangu-ya na ma-katangu pareta la tana Ihirailu, ka àmbu nahili kapadihu rayatu, tàka na nyuna na tana na marihi nawua-ya ka namangu-nya kabihu-kabihu Ihirailu.

⁹Napanii i MIRI Hupu Majangga, “Jiaka-njawa da njalami, ha dimi maningu kawa-hangu la Ihirailu! Pànjangu-wa pa-kapidihu rayatu ba àtalu pa-luangu-mi lima. Wundawa ma-padeningu dàngu mamola. Màtangu langàtaka-ma pahili wànggaya na banjaru-nggu welingu la tanada nyuda. Nyungga yia, MIRI Hupu Majangga mawua-nggainya na pareta nuna lai nyimi.

¹⁰Pakiwa timbangu dàngu takaru ma-padeningu:

¹¹Hau epa pa-takaru wàngu mamàdu lupangu-ma na-pahama na ihina dàngu hau mbàtu pa-takaru wàngu mapawai. Lupangu-ma tàpu wànya hau homiru. Ba tuna, lupangu-ma tuna yia bàdi nuda da hukutu: 1 homiru[95] = 10 epa = 10 mbàtu.

¹²Na timbangu-mi lupangu-ma tuna yia bàdi: 1 hikalu[96] = 20 nggera 1 mina = 60 hikalu

¹³Yiana na lata hukutu ka kawuku-ha da hunggu maraku: uhu nggàndumu: 1/60 welingu la ihi raïngu-mu uhu kanu: 1/60 welingu la ihi raïngu-mu mina haitungu: 1/100 welingu la ihida da pingi ai - pingi ai. (Hukutu wànja mbàtu: 10 mbàtu = 1 homiru = 1 kòru) mbimbi: heu mbimbi welingu la nimbihu 200 ngiu. Lupangu-ma nyimi iwotu hunggu maraku uhu nggàndumu, hunggu maraku patunu, dàngu hunggu maraku papeku wàngu ka da-jàmangu da njalami. Nyungga yia, MIRI Hupu Majangga ma-wuangu pareta rukuna nuna.

¹⁶Mbuu ndàba na mangia-nya na tana lupangu-ma dangàndi[97]-ha la maningu kawahangu na ma-pareta Ihirailu nuda da hunggu maraku.

¹⁷Nyunaka na mangera-nya na pa-yemangu banda nduma kameti maraku patunu dàngu ngara pangangu-ka nduma hunggu maraku uhu nggàndumu dàngu hunggu maraku angguru ndumana mbuu ndàba na banjaru Ihirailu la lodu - lodu bokulu, la mbabunya na Wulangu Bidi, da lodu Hangahu dàngu da lodu - lodu bokulu hawiangu. Lupangu-ma nyuna na-payemangu kameti maraku podahu njala, hunggu maraku uhu nggàndumu, hunggu maraku patunu, dàngu hunggu maraku papeku wàngu pakarai wàngu jàmangu njala nduma banjaru Ihirailu,” wàna.

¹⁸I MIRI Hupu Majangga napanii-nya na banjaru-na, “La tànggalu hau wulangu hau, lupangu-ma ipamatua-ya na Umanggu bai wàngu pawotu maraku heu hapi mini manda ningu nyurangu.

¹⁹Lupangu-ma na wai ria podahu njala nuna napiti-ya paraï ratu, hi naperi-nja da kambaniru Umanggu, dàngumbu da patu kabihu-na na ngia pawotu maraku, dàngu da kambaniru pindu bokulu ma-orangu la talora mbara dalu.

²⁰Wunda-mbuya na ma-hamangu la tànggalu pihu wulangu nuna, nduma nimbihu tau na mambàda wunda njala dàngu nda harawuku-na jàka ndia dàngu nda pinanya. Wàngu matungu nuduka napa bai mangganya na matua-na na Umanggu.

²¹La tànggalu hakambulu patu wulangu hau lupangu-ma imbabunya na remi Paha. Pihu mbua lodu mandaina lupangu-ma mbuu ndàba-na na tau nangangu roti nda patai wolungu.

²²La lodu kawunga-na, lupangu-ma nawotu maraku na maningu kawahangu pa-pareta heu hapi mini pa-podahu wàngu njala nduma wikina dàngu nduma nggubulu na rayatu.

²³Nu ba mbabu pihu mbua lodu, lupangu-ma nimbihu lodu nawotu maraku lai MIRI pihu ngiu hapi mini dàngu pihu ngiu mbimbi bumbu manda ningu nyurada, hi tunu mangu heunja. Nimbihu lodu lupangu-mbu nawotu maraku heu kamàmbi bumbu nduma kameti maraku jàmangu njala.

²⁴Hinggilu-da nuda, lupangu-ma wotu maraku 17,5 litaru uhu nggàndumu nimbihu hapi mini dàngu tailu litaru mina haitungu nimbihu kamàmbi bumbu.

²⁵La mbabu Maü Ma-paraungu, na pa-pakiringu la tànggalu hakambulu lima wulangu pihu, nimbihu lodu la pihu mbua lodu lupangu-ma nawotu maraku ma-hamangu na maningu kawahangu, nu da maraku jàmangu njala, maraku patunu, dàngu maraku uhu nggàndumu lupa mina haitungu,” wàna.