Read Kambera YAHAKIALU 47 Bible Online

YAHAKIALU 47 - Kambera bible

YAHAKIALU 47

¹Na-karia belingga paraïna nuna na tau mini la pindu tama la Umana i MIRI. Ku-itangu wai ma-lulungu welingu la lumbu pindu nuna hanggangu la pahunga lodu, hama tuna na Umana i MIRI ba na-hanggangu la pahunga lodumbu. Nuna na wai na lulungu welingu la lumbu pàlaku pindu Umana i MIRI mbara luru nali ningu la karaha mbara luruna na ngia pawotu maraku.

²Hàlaka nu na-karia-ngga paluhu li ningu la pindu bokulu mbara dia paraïna nuna na tau mini hi nangàndi-ka la pindu bokulu pahunga lodu. Nuna na ana luku na-lulungu la karaha mbara luruna na pindu bokulu nuna.

³Ba dàngu hukutu wànguna ai hukutu-na, karia-nanggaka paraïna nuna na tau mini ba ma-namatu arihu luku hanggangu la pahunga lodu lima ngahu metiru marauna, hi na-paràhangga papala. Lai nu hupu kawudu kawita-aya na waina.

⁴Hàla nahili hukutu lima ngahu metiru, tàka lai nu hupu kambàku-ya na waina. Nahili hukutu lima ngahu metiru, tàka hupu bànggiya na waina.

⁵Nahili handàkangu pa-hukutu 500 metiru, tàka lai nu lalu manjolungu-naka na waina ka palaya la wihi. Jàka mbuhangu papala, wàngu pangeni-maka bàdi.

⁶Hi napanii-ngga nuna na tau mini, “Ha duma tau nda payatangu, hamata pahàmu-nja yiada mbuu ndàbada,” wànangga. Hàlaka nu na-karia belingga namatu luku,

⁷hi ku-itangu ai madira danguha la karaha hapapa - hapapa-na nuna na luku.

⁸Napanii-ngga nyungga, “Yiana na luku naliya na tana yiana ba na-lulungu hanggangu la pahunga lodu hi naliya na Lolangu Yorundangu hanggangu la Tehiku Meti. Jàka natàka-ka la Tehiku Meti na waina, ka pahilu-nanyaka wai kàba nuna na wai tehiku mambàru.

⁹La nggi biaya na-lulungu ningu yiana na luku, lai numbu napa ba ningu ndàba iyangu dàngu banda hawiangu. Napa na pakàba-ya na waina na Tehiku Meti, dàngu la nggi biaya na-lulungu ningu nuna na wai, lai numbu napa ba ninya na luri.

¹⁰Welingu la katiku-da da luku la Eni-Nggendi lundu la katiku-da da luku la Eni-Ekilaïmu nawàngu pa-kapitilu na tau majala ba dadengi jalada la hi - hingida lai nu. Mbuu ndàba na ngara iyangu-ka ni ndàbanja napa lai nu, hama tuna da maninja la Tehiku Padua.

¹¹Na nyuna na wai la ma-pakahala ma-nangangu dàngu na wai kalibuku la hingi-naka nuna na tehiku nda nakàba-a, tàka pa-daingu-mana ba pangia mehiya.

¹²La hi - hinggi-naka hapapa - hapapa nuna na luku natumbu-nya ma - màtu pingi wua ai pangangu. Nda ana malaï-mada da rauda nuda da pingi ai, dàngu nda ana njàpu-mada da wuada. Nimbihu wulangu nuda da pingi ai ba datuu wua bidida, nadu na wai ma-mangàpahu-nja ba lulungu welina la Umana i MIRI. Da wuada pangangu-ha tàka da rauda danjadi muru,” wàna.

¹³Napanii i MIRI Hupu Majangga, “Yiada-haka da padira tana da pa-paberingu napa la hakambulu dàmbu kabihu Ihirailu. Na kabihu-na i Yuhupu na-ngalangu dua ngia.[100]

¹⁴Mbàda harangu-ngguka ba lupangu-ma kuwua-nja napa nuna na tana la boku la mangilu-mi. Jia ba tuna, piti-yawa kai paberi dàngu hàmu-minya dimi nuna na tana.

¹⁵Na padira mbara diana napiti welingu la Tehiku Padua hanggangu la pahunga lodu lundu la paraingu Hetilungu, hanggangu la Hamàtu, na-pangalangu la paraingu Hendàtu,

¹⁶la Mbirota dàngu Hipuraïmu (da pangia-da nuda da paraingu ba ndedi patàka-nya la Ndamàhiku welingu la Hamàtu), hàla hi mangupa la paraingu Hahàru-Enàngu, la padira-na na paraingu Hauràngu.

¹⁷Ba tuna, na padira mbara diana napiti welingu la Tehiku Padua hanggangu la pahunga lodu, la paraingu Hahàru-Enàngu; la mbara dia welingu la padira nuna-duyaka na ngabana la Ndamàhiku dàngu la Hamàtu.

¹⁸Na padira la pahunga lodu na-hanggangu hu luru, welingu la hau pangia ba ndedi patàka-nya la Ndamàhiku welingu la Hauràngu. Ba tuna na Luku Yorundangu jia-yaka na padira tana Ihirailu la patama loduna dàngu na Nggiliatu la pahunga loduna, lundu la Tamàru[101] la hingi Tehiku Meti.

¹⁹Na padira mbara luru na-hanggangu la patama lodu harangu hibitungu hakudu hu luru, welingu la Tamàru hanggangu la mata wai Kandihu-Marimba, hàla hi na-hanggangu la patama lodu harangu hibitungu hakudu hu dia nàhu la padira Mehiru lundu la Tehiku Padua.

²⁰Na padira la patama lodu jiaya na Tehiku Padua, hàla hi-hanggangu hu dia la hau pangia la patama loduna welingu la ànda tama la Hamàtu.

²¹Paberi-nyawa dimi na tana dua wikimi, pa-namatu-nja da kabihu Ihirailu;

²²dàngu mangu-mami-nyaka dimi nuna na tana lundu nu - nu. Da tau hangàdangu da ma-ndàdiku pa-daingu la hongami dàngu ningu anada madedi lai nu, lupangu-ma da-ngalangu-mbu nduma-da welingu la tana nuna. Lupangu-ma padiha-ha hama tuna ba tau Ihirailu weli wingungu-ha, dàngu lupangu-mbu pa-patamangu-ha nyuda la undi ka da-ngalangu tana ba pa-beringu tana la tau Ihirailu.

²³Nimbihu-na na tau hangàdangu mangia-nya na tana lupangu-ma pawua pa-pohungu-ha tana dàngu kabihu Ihirailu la ngia pa-ndàdiku-da. Nyungga yia, MIRI Hupu Majangga mambàda panii,” wàna.