Read Kambera YAHAKIALU 48 Bible Online

YAHAKIALU 48 - Kambera bible

YAHAKIALU 48

¹Na padira tana mbara dia na-tayili hanggangu la pahunga lodu, piti welingu la Tehiku Padua hanggangu la paraingu Hetilungu, na ànda tama la Hamàtu, la paraingu Hahàru-Enàngu, lundu la padira paraingu Ndamàhiku dàngu paraingu Hamàtu. Da kabihu da ma-pandàkingu yiada lupangu-ma da-ngalangu hangia welingu la tana matayilingu welingu la padira pahunga lodu hanggangu la patama lodu lundu la Tehiku Padua, tuna nu na pa-ndàkingu-da piti weli diangu hanggangu hu luru: Ndàngu Ahiaru Nàputali Manahi Epuraïmu Rumbingu Yahunda

⁸Na marihi welingu la tana nuna lupangu-ma pa-kawàri-ya nduma ma-paihikungu. Na nunjuna lupangu-ma 12,5 kilu metiru piti welingu la padira mbara dia lundu hu luru. Na padira pahunga loduna dàngu patama loduna lupangu-ma da-pahama marau dàngu da kaloka pa-wuangu-ha da kabihu Ihirailu. Lai nuya napa na ngia pa-pahada ninya na Umana i MIRI.

⁹Hawiangu welingu la ngaba tana nuna pa-pahinggilu-ya ndumana i MIRI, nu na ha-kaloka tana maninya la puhuna na tana, 12,5 kilu metiru nunjuna dàngu hakambulu kilu metiru[102] ndàbaru-na.

¹⁰La padua-na nuna na tana napa pa-pahadangu-ya na Umana i MIRI. Da ratu lupangu-ma da-ngalangu ndumada welingu la tana ma-matua nuna. Na ndumada nyuda 12,5 kilu metiru-na welingu la karaha pahunga loduna hanggangu la patama lodu, dàngu lima kilu metiru-na welingu la karaha mbara diana hanggangu hu luru.

¹¹Na pangia pa-pahinggilu nuna napa ka manguda da ratu ana umbuku-na i Handuku-ya. Nyuda duda mbàda lumu dàngu tuturu-danyaka i MIRI dàngu nda hama tuda da tau Lewi angu kabihu-da, da manjala karia-nja da tau Ihirailu hawiangu.

¹²Jia ba tuna nyuda duda da ana umbuku-na i Handuku pa-pahinggilu mehangu tanaha ba wuanja, la pera tana pawua-nja da tau Lewi. Tàka na tana pa-pahinggilu nuna kanjupu matua-ya.

¹³Nuna na tana tau Lewi 12,5 kilu metiru nunjuna welingu la pahunga lodu lundu la patama lodu, tàka na ndàbaru-na lima kilu metiru-na weli diangu lundu hu luru dàngu la pera tanada da ratuya na pangia-na.

¹⁴Mili ana hapangga-a welingu la tana nuna àmbu jia dangga-dudanya jàka ndia àmbu jia njepa-dudanya; na tana na marihi hàmu la tana Ihirailu nda peku-ana pa-haleli la lima tau hawiangu, nadu ba pa-pahinggilu ndumana i MIRI-duyaka nuna na tana hi manguna Nyunaya.

¹⁵Mbara luru welingu la tana pa-pahinggilu nuna, ninyapa na marihi ba 12,5 kilu metiru-na nunjuna dàngu 2,5 kilu metiru-na ndàbaru-na. Nuna nu nda na-matua-a dàngu pekuna ka nangia-nya rayatu dàngu ka maràda rumbaya, la padua-na lupangu-ma pahada-nya hau paraingu.

¹⁶Nuna na paraingu lupangu-ma na-kapatungu kabihu-na bàdi, nimbihu karaha-na 2,25 kilu metiru hukutu-na.

¹⁷La winggiru mbutana nuna na paraingu lupangu-ma ka ningu ma-wailangu-na bàdi ma-125 metiru ndàbaru-na.

¹⁸La pahunga dàngu la patama lodu welingu la paraingu nuna ningu ma-wailangu-na da-maràngga 5x2,5 kilu metiru. Nuda da ma-wailangu da madàmbu-da lupangu-ma ka dapoka-ha woka bàdi paraï rayatu la paraingu nuna.

¹⁹Da tau - tauka welingu la mbuu ndàba kabihu Ihirailu da mangia-nya nuna na paraingu pekuda papoka-ya nuna na tana.

²⁰Ba tuna, nggubulu-na na ngaba tana nuna, papohu-nya na tana pa-pahinggilu dàngu na tana nduma paraingu, na-kapatungu kabihu-na, 12,5 kilu metiru-na nimbihu karaha-na.

²¹Na tana la patama dàngu la pahunga lodu welingu la pangia pa-pahinggilu nduma Umana i MIRI, ndumada da ratu, da tau Lewi dàngu nuna na paraingu, jiaya na ndumada da maningu kawahangu da ma-katangu pareta. La pahunga loduna nuna na tana na tayilingu lundu la padira pahunga loduya, tàka la patama loduna lundu la Tehiku Padua-ya, tàka nangia padua welingu la tana Yahunda hanggangu la tana Mbanyamingu.

²³Na tana mbaru luru welingu nu na tana pa-pahinggilu, nduma da kabihu hawiangu-ya. Na lerangu-na nuna na tana napiti welingu la padira pahunga lodu nahanggangu la patama lodu lundu la Tehiku Padua, dàngu tuna yia ba paberi-nya piti weli diangu hanggangu hu luru: Mbanyamingu Hamiungu Ihakàru Hembulungu Nggàtu

²⁸Mbara luru welingu la tana Nggàtu ninya na padira mapiti welingu la tuba patama loduna harangu hibitungu hu luruna na Tamàru lundu nàhuya la mata wai Kandihu-Marimba, hàla hi nàhuya la patama lodu harangu hibitungu hu dia nàhu la padira Mehiru lundu la Tehiku Padua.

²⁹Napanii i MIRI Hupu Majangga, “Tuna nu ba paberi-nya nuna na tana la kabihu - kabihu Ihirailu,” wàna.

³⁰Da pindu tama la paraingu Yeruhali hakambulu dàmbuda. Da kangeli-na da mapatu-da da-maràngga 2,25 kilu metiru hukutu-da, dàngu ta - tailu pindu bokulu-da. Nimbihu pindu bokulu pa-patamungu tamu hau kabihu Ihirailu-ya. Da pindu bokulu mbara dia datamu-nja i Rumbingu, i Yahunda, dàngu i Lewi; da pindu bokulu la kangeli pahunga lodu, datamu-nja i Yuhupu, i Mbanyamingu, dàngu i Ndàngu; la kangeli mbara luru tamuda i Hamiungu, i Ihakàru dàngu i Hembulungu-ha; tàka la kangeli patama lodu datamu-nja i Nggàtu, i Ahiaru, dàngu i Nàputali.

³⁵Nggubulu-na nu na kangeli 9 kilu metiru-na marauna. Dàngu piti welingu la rehi nàhu, na-patamu-nya tau, “I MIRI NINYA LAI NU!” wànanya.