Read Kambera YAHAKIALU 5 Bible Online

YAHAKIALU 5 - Kambera bible

YAHAKIALU 5

¹Napanii i MIRI, “Ha dumu tau nda payatangu, pitiwa hapanda madàka kau kikiru pambuta wànya na ruu ngoramu dàngu na ruu lunggimu. Hàlaka nu timbanya na lunggimu la timbangu hàla biwa katailu ngianya.

²Na hangia lupangu-ma utunuya la padua paraingu ba nanjàpu-ka na nggupulu-ya. Na hili hangia-i lupangu uyàlu wànya hapanda-mu dàngu winggiru-munya na paraingu. Tàka na hangia panjàpu wàna lupangu uhàbaru-nja la ngilu, hàla ka kuyaulu wànya hapanda-nggu Nyungga.

³Bii hakuda welingu la ruu lunggi nuna dàngu kawuhuku-ya la làpitu kalembi malaimu.

⁴Hàlaka nu hili piti hakudu welingu la ruu lunggi nuna, kau patàda-nya la epi màta ka na-mutungu. Welingu lai nu napa na-làmbatu na epi la nggubulu banjaru Ihirailu,” wànangga.

⁵I MIRI Hupu Majangga napanii, “Tàngaru-ya ni na Yeruhali. Yiana na paraingu kutuya la puhu pinu tana, dàngu da nanggara hawiangu la winggiru-na.

⁶Tàka na Yeruhali mbàda tebuku-danjaka da pareta-nggu dàngu na-lohangu ba narihi akatu-pa welingu la ba - banjaru hawiangu, jiapa narihi nda karadakui-pa welingu la nanggara - nanggara la winggiru-na. Na Yeruhali napangga-ha da pareta-nggu dàngu nda dabihu panunju-ha da ukunggu,” wànangga.

⁷I MIRI Hupu Majangga napanii, “Ha dumu Yeruhali, patingingu-wa! Nyumu ndau nunju-aha da pareta-nggu dàngu da ukunggu; nyumu urihi malihu-pa welingu la ba - banjaru hawiangu la winggiru-mu dàngu mbàda kiku-munjaka da hurida nuda da banjaru.

⁸Nyungga duku MIRI Hupu Majangga, ku-paloha-nya ba muhu-mungga Nyungga. Napa kuhuku-nggau nyumu la hanggada da banjaru hawiangu.

⁹Ruku mbuu ndàba na pawunda-mu na panda mbuhanggu, napa kuhuku-nya na ma-mandapu-nggau wàngu hukungu ma-mbàringu mandedi ningu hamana la pambàda wundanggu, dàngu nda kuhili wunda-apa ma-hamangu.

¹⁰Da ina da amada napa danganja da ana wikida dàngu da ana napa danganja da ina da amada. Tuna nuduka napa ba kuhuku-nja, tàka na maluri-ipa ku-patanyala-nya la nggi - nggini.

¹¹Nyungga Ala maluri-ka, MIRI Hupu Majangga-ka, dàngu yiana-yaka na paniinggu: Rukuna ba mbàda pairaku-muyaka na Umanggu wànggu mbuu ndàba pawunda-mu da ma-akatu dàngu da pa-mayitangu, napa ku-pakabu-kau dàngu nda pa-aïngu.

¹²Hau beri tailu welingu la ma-mandapu-nggau napa dameti ruku kanyaki dàngu la rimbangu ma-panggàbalu-nya na paraingu. Hau beri tailu pa-hambàli wànja hapanda la hambeli paraingu, dàngu na hili hau beri tailu napa ku-patanyala-nya la nggi - nggini dàngu hi kunya - nyara wànya hapanda.

¹³Napa upàdanya na mbàringu-na na hàngganggu dàngu na panyara-nggu, lundu na-lànyapu na etinggu. Jàka da-hàrangu-ka nuda mbuu ndàbada, napa upi hàmunya ba Nyungga, MIRI, mbàda panii-ngguka lai nyumu rukuna ba hàngga-nggunya na nda manundu-mu.

¹⁴Napa kananda jua-ma-akauka dàngu da banjaru la winggiru-mu napa da-payudi-kau dàngu nimbihu-na na tau na manàhu-nya napa dawiliru-nggau nyumu.

¹⁵Jàka kumbeni dàngu kuhàngga-nggau hi kuhuku-nggau, mbuu ndàba da banjaru la winggiru-mu napa da-maringgingu hamangu-da. Da labu eti ba daita-kau hi da-payudi-kau.

¹⁶Napa ku-pamolu-nja da pangangu parima hahamu dàngu hi kumàta-nja pa-rimbangu da ma-mandapu-nggau. Napa dadeni-nya na pàda-danya na malara kambu ruku manjuu, hama tuna na wua pana dàka malumbu làpahu-nggau dàngu na ma-patàlaru-kau.

¹⁷Hinggilu-na na rimba pa-nggàbalungu napa ku-patàkangu-mbu kanyaki pa-nggàbalungu, mbana eti dàngu pabera pa-pameti-ha da ma-mandapu-nggau, dàngu banda bohu pa-pameti-ha da anada. Nyungga yia MIRI mambàda panii,” wàna.