Read Kambera YAHAKIALU 7 Bible Online

YAHAKIALU 7 - Kambera bible

YAHAKIALU 7

¹Napanii-ngga i MIRI,

²“Ha dumu tau nda payatangu Nyungga, MIRI Hupu Majangga, ka kupanii-nya yiana na tana Ihirailu wànggu: Yiana-yaka na hupu njàpu pekana nggubulu-na na tana yiana!” wàna.

³Napanii i MIRI, “Ha dumu Ihirailu, nàhu rehi-nanyaka na njàpumu. Napa upàdanya na hàngganggu. Ku-patanda-nggau ngera nyumu nunjuha da pawunda-mu da ma-iraku.

⁴Napa nda kumila-anggau eti jàka ndia nda kuwua-anggau jàmangu njala. Napa kuhuku-nggau nyumu nunjuha mbuu ndàbada da ma-iraku pawunda-mu. Ka pi-dumu-nggaka ba MIRI-ka Nyungga,” wàna.

⁵Yiana-ya na papanii-na i MIRI Hupu Majangga la tau Ihirailu, “Napa da-pandutu - pa-ndutungu da tàparu da manggàna-kau nyumu.

⁶Nàhu mbuu ndàbada lundungu-danyaka. Yiana-yaka na njàpumu. Nda ningu-apa monungu ndumamu nyumu.

⁷Mbuu ndàbada lundungu-danyaka da ndumamu, ha dumu banjaru ma-ndàdiku la tana yiana. Nàhu nda ningu mànu-apa mbabu la ngia pamara - ngia pamaraku la palindi, mbulungu kanyaüru-ma-aka maningu.[10]

⁸Nda namandai-apa napa ipàdanya na hàngganggu na ma-mbàringu. Ku-patanda-nggai ngera nyimi nunjuha da pawunda-mi. Napa ku-palimba-nja lai nyimi mbuu ndàba da pawunda-mi da ma-iraku.

⁹Napa nda kumila-anggai eti jàka ndia nda kuwua-anggai jàmangu njala. Napa kuhuku-nggai nyimi nunjuha mbuu ndàba da ma-iraku pambàda wundami. Ka pi-dimi-nggaka ba MIRI-ka Nyungga dàngu ba Nyungga mahuku-nggai nyimi,” wàna.

¹⁰Na lodu tàparu nduma banjaru Ihirailu mbàda tàka-naka. Na pa-janggilu na-mehangu limana. Na ngànjangu natoma-ka la hupuna.

¹¹Na mbana eti na-pawiti-nya narihi danguna na akatu. Mbuu ndàba da pawulu-da, na bokulu-da dàngu na mangunju-da napa danjàpu nda ningua kaweida.

¹²Na rehina lu tàka-ama-naka, na loduna mareni-nanyaka! Na makei dàngu na ma-danggangu nda ana ngalangu-ada utuda, nadu na hukungu-na i Ala nanggàna ndàbaya na tau.

¹³Nda ningua tau danggangu mapeku la pangala belinja da pambàda danggana, nadu na hànggana i Ala nanggàna ndàbaya nggamu biaya. Na tau akatu nda jia mara-ana.

¹⁴Na lingu na taropitu ka hawaritu-nanyaka mbuu ndàba na tau. Na nyuna nda haàtu-a malaku la ngia pa-pabera, nadu na hànggana i Ala nanggàna ndàbaya na tau.

¹⁵La à - ànda la paraingu ningu pabera, la u - uma natungu na kanyaki pa-nggàbalungu dàngu na rimbangu. Nggamu biaya na maninya la hambeli paraingu napa nameti la pabera, tàka na ma-ndàdiku la paraingu napa uhu kanyaki dàngu rimbangu-ya.

¹⁶Napa hawiangu damara hi dapalai la ma-palindingu, hama tuna kulundiha da pawàngga welingu la lo - lolangu; napa mbuu ndàbada da-kanjaïku ruku njalada.[11]

¹⁷Nimbihu-na na tau napa na-maluputu limana dàngu na-kandàndaku kambàku-na.

¹⁸Napa nyuda da-kalambungu karungu dàngu nda - ndàndada da ihida. Napa pa-kamuluku-ha dàngu hi pa-makia-ha.

¹⁹Da àmahu marara mabara da pawàru kangudu-nja la ànda, nadu la lodu hanubukungu-na hànggana i MIRI, nda da-ngalangu-a da àmahu marara mabara pa-pamara-ha nyuda, tàka mbàda puha-kida-haipa nyuda la njala. Nda peku wa-ada-njapa ka nahoda-ya na pambuha toluda jàka ndia la patunja ihida da kambuda.

²⁰Àmangu da-hamela wànja da watu tawuru-da da ma-manandangu, tàka rukuna ba dapaki-ha nuda la patuha marapu pa-mayitangu, i MIRI na-pawiti-nya hi pa-haringgingu hamangu-ha nuda da bandada.

²¹I MIRI napanii-nya na banjaru Ihirailu, “Napa kumàta-nja da tau nàmu ka daramba-nggai nyimi, napa dawàhi-ha tau akatu da banda da malanja-mi hi da-pairaku-ha.

²²Napa nda ku-pajolangu-a limanggu jàka da-paruha-ya dàngu da-pairaku-ya na Umanggu paraï da tau rambangu.

²³Nggubulu-na na tana na-kanyaüru;[12] la nggi - nggini ningu ma-pameti tau dàngu mbana eti.

²⁴Napa ku-patàka-nggainja da banjaru ma-kanjupu mbana etiha ka dangia-nja da umami. Da mini la ngorami napa da mangàdatu rukuna ba kumàta-nja nuda da banjaru pa-pakabu-ha da ngia pa-lumungu-mi.

²⁵Nyuda na-panggàbalu-nja hawina dàngu handuka, hi dahimbu mambiru, tàka nda da-jàngapu-aya.

²⁶Na ura mila dàngu na pulungu handuka napa datàka pandutu mbàdangu. Napa ikamahingu ka da-manyura da wunangu tàka nda da-ngalangu-a. Hamangui da ratumbu nda nggàra maningu-da pa-papeka wànya na banjaru, dàngu da liku uru nanjàpu-nja lii panàrungu.

²⁷Napa na-padudurungu na maràmba, nambota monungu na anana na mahilu-ya, dàngu nda - ndàndana na rayatu paraï pa-mangàdatu. Napa kuhuku-nggai nyimi nunjuha mbuu ndàba da pawunda-mi dàngu ku-patanda-nggai ngera hama tuna nyimi bai patanda-nya ngera na tau hawiangu. Ka pi-dimi-nyaka ba MIRI-ka Nyungga,” wàna.