Read Kambera YAHAKIALU 8 Bible Online

YAHAKIALU 8 - Kambera bible

YAHAKIALU 8

¹La tànggalu lima wulangu nomu la ndaungu panomu wàna na tanawangu-ma, damai da ngora tau Yahunda tanawangu la umanggu hi da-mandapu dàngga. Hi jia huruku bia-nangga kawaha-na i MIRI Hupu Majangga.

²Ku-tangara hi kuita-ya na mahama tauya. Welingu la puhi bànggina huwaa hama epi-iya dàngu welingu la puhi bànggina hu dita na-kalilangu hama tuna parunggu pauda-ya.

³Ningu pa-pajola-na ba hama limaya hi najàmba-ya na lungginggu. Hàlaka nu, nu la harii mata, padendi pajangga-ka hu dita paraïna Ngahuna i Ala hi nangàndi-ka la Umana i MIRI la Yeruhali, la pindu tama mbara dia. Lai nu ninya na kahala hada marapu mambàda pambumbaru-ya na hànggana i Ala.

⁴Hàla hi kuita-ya na hambila kalilangu na tanda ba ninya i Ala Ihirailu, hama tuna na paita-nggu ba ningga la hingi Luku Kembàru.

⁵I Ala napanii-ngga, “Ha dumu tau nda payatangu, tàngaru-wa hu dia,” wànangga. Ba kukiku-nyaka, kuita-ya la karaha ngia pawotu maraku la lihi ànda tama na marapu mambàda pa-mbumbaru-ya na hànggana i Ala.

⁶I Ala napanii-ngga, “Ha dumu tau nda payatangu nggàraya na paita-mu? Hamata-ha da pawunda pa-mayitangu pawunda-da da tau Ihirailu, da mabonja-ya na pamarau wànggunya na Umanggu! Mai, ka ku-paita-nggaunja da marihi pa-iraku,” wànangga.

⁷Hàla hi na-karia-ngga la pindu tama la hanamba mbara lua la hambeli hi na-paita-ngganya na hau mambowa la kangeli.

⁸“Ha dumu tau nda payatangu, pa-bokulu-kiya yiana na mambowa,” wàna. Ba kununju-yaka, ku-itangu hau pindu.

⁹“Tamawa dàngu tàngaru-ha da pawunda ma-iraku dàngu pa-mayitangu da pawunda-da lai nu,” wànangga.

¹⁰Ka tama-nggunyaka pa-tàngaru. Da dindingu la kurungu nuna pa-huratungu mà - màtu ularu-ha dàngu ba - banda nda hida[13] hawiangu, dàngumbu mà - màtu nggàmbaru marapu palumu-da da tau Ihirailu.

¹¹Tau pihu kambulu-ha da liku uru banjaru Ihirailu da maninja lai nu papohu-nya i Yaahanya anana i Hapàngu. Nimbihu-da da-kitangu hau kanai dupa ma-hambumbatungu kawuu.

¹²Napanii dàngga i Ala, “Ha dumu tau nda payatangu, uita-duhaka da pawunda kangunduhu-da da liku uru Ihirailu? Nyuda da-lumungu la kurungu mambinu marapu-na ba da-palata ninya ba mbàda dunjaku-nggunyaka yiana na tana hi nda kuita-ha da pawunda-da,” wàna.

¹³Hàla napanii-ngga i MIRI, “Napa nyumu uitaha ba dawunda marihi pa-mayitangu,” wànangga.

¹⁴Ka karia-nanggaka la pindu bokulu mbara dia la Umana i Miri hi na-paita-nggaha da kawini mahiinya na metina na marapu Tamuhu.[14]

¹⁵I MIRI na-paàra-ngga, “Ha dumu tau nda payatangu, uita-duyaka nuna? Dadangu-mapa da marihi pa-mayitangu,” wànangga.

¹⁶Na-karia-ngga la hanamba mbara dalu la Umana i MIRI. La lihi ànda tama hanggangu la pangia matua, la padeni paduangu-na na ngia pawotu maraku dàngu na kanjilitu, ninja da tau da madua kambulu limada. Nyuda da taluru-nya na pangia matua, dàngu da-marubuku hanggangu la pahunga ba da-marubuku-nya na mata lodu na mahunga.

¹⁷I MIRI napanii-ngga, “Ha dumu tau nda payatangu, uita-duya nu? Yiada da tau Yahunda nda nahoda-aha jàka jia-aya ba dawunda-ha nuda da pa-mayitangu dàngu ba dawunda-ha da pawunda nda paaïngu la nggubulu-na na tana. Nuda mbuu ndàbada dawunda-kihaipa lai yiahu, la Umanggu dàngu na-pawiti-nya na parihi mbeni wànggu. Tàngaru-ha jàka nggiki hamana ba da-pawawa-ka wàngu pawunda ma-kanjupu iraku[15] yiana!

¹⁸Napa nyuda dapàda-nya na hàngganggu na ma-mbàringu! Nda nggàra ehia, nda jia wànggu-anja dàngu nda kujàma-anja da njalada. Jiapa-kai ka dawara pawàndingu ba da-hamayangga, nda ku-mbuhangu-a pa-patingi-nja!” wàna.