Read Kambera YAHAKIALU 9 Bible Online

YAHAKIALU 9 - Kambera bible

YAHAKIALU 9

¹Tunaka nu kurongu ba nawara i Ala, “Maiwa nàmu ha dimi tau ma-paloku-ya nahuku-nggunya yiana na paraingu. Ngàndi-hawa da madàka-mi,” wàna.

²Hi jia hàndaka wudaku wàda bia da tau manomu welingu la hambeli pindu bokulu Umana i MIRI mbara dia, nimbihu-da dangàndi madàka. Karia-da nyuda ninya na tau mapaki tera linangu na mangàndi pa-tulihu wàngu. Nyuda datama hi da-ndolaku la lihi ngia pawotu maraku welingu lai parunggu.

³Hàla na-handaraku ma-kalilangu na tanda ba ninya na Ala Ihirailu, na-handaraku welingu la patau awa - patau awangu,[16] hi na-lelingu la pindu tama Umana i MIRI welingu la pangia-na na ma-wungangu. Ka paau-nanyaka na tau mapaki tera linangu nuna paraïna i MIRI,

⁴“Lakuwa la mbuu ndàba kabihu-na na paraingu tunyawa tanda la kaba mata nimbihu-na na tau ma-hawina dàngu ma-handuka-nya rukuna mbuu ndàba da pawunda pa-mayitangu da pawunda la paraingu nuna,” wàna.

⁵Kurongu-ya i Ala ba napanii-nja da tau hawiangu, “Ndàkiya nyuna la mbuu ndàba kabihu-na na paraingu dàngu pameti-ya nimbihu-na na tau dàngu nda pa-aïngu.

⁶Pameti ndàbaha da mini kawini ma-kaweda bidi tau, tau matua dàngu anakeda. Na nyuna àmbu haàtu-du pa-jonggaru-mi da maningu tandangu la kaba matada. Pakiri weli yiahungu-wa, welingu la Umanggu yiana,” wànanja. Ka pakiri-danyaka na wai ngabada ba dawàngu pa-pameti-ha da liku uru Ihirailu da ma-ndolaku la Umana i Miri.

⁷I Ala napanii-nja, “Pa-iraku-yawa yiana na Umanggu! Pinu wànjawa mameti da talora-na. Pakiringu-wa!” wànanja. Ka pakiringu-danyaka pa-pameti-ha da tau la paraingu.[17]

⁸Ba talànga pangalangu-na nu na hambàli, ningga lai nu didi-aka. Ku-marubuku hi kuwara, “MIRI Hupu Majangga, tuna numaka nu nahàngga-munya na Yeruhali hi lupa umbuhangu pa-pameti ndàbaya na tau na mani-inyapa yia la Ihirailu?” wànggu.

⁹Nahema i Ala, “Da tau Ihirailu dàngu Yahunda mbàda wunda-daka njala ma-kanjupu bokulu. Da-pameti tau la mbuu ndàba ngia pa-ngiangu, dàngu da-pairaku wànya akatu na Yeruhali. Nyuda dapanii, Nyungga MIRI, mbàda dunjaku-nggunyaka yiana na tana hi nda peku ita-ngguha da pawunda-da.

¹⁰Nyungga, nda jia mila-anggunja eti nyuda. Napa kuwunda-nja nyuda jàka nggàraya na pawunda-da la tau hawiangu,” wàna.

¹¹Tunaka-nu beli-nanyaka nuna na tau mapaki tera linangu hi na-patàkangu lai MIRI, “Mbuu ndàba da pareta-mu MIRI mbàda hàrangu-daka,” wàna.