Read Kambera NDANIALU 11 Bible Online

NDANIALU 11 - Kambera bible

NDANIALU 11

¹Nyuna-maka na[20] pa-wuangu wai ngaba pandula-ka dàngu pa-kahiri-ka la kawunga ndaungu pareta-na i Ndariu na tau Mendia.

²Dàngu na papanii-nggunggau napa ma-padeningu-maya,” wànangga. Na papalewa napanii, “Napa da tau matailu maràmba hawiangu da-pareta la Perihia, hi na-pandutungu na maràmba papatu wàda na marihi pawulu welingu la maràmba hawiangu. La kapuka kawaha dàngu bunjuku-na, napa da-pararingu kapingatu-da dàngu na pa-maràmba Yunani.

³La malamiri-na napa na-hadangu na haàtu maràmba ma-kaborangu. Napa nyuna na-pareta la ngaba pa-maràmba ma-bokulu halawàla dàngu napa àtalu wàngu eti biana.

⁴Tàka napa la kapuka bunjuku-na na pa-maràmba-na na-taweharu hi napabi - biwangu hi patu ngiana. Da maràmba da manda ana umbuku-na napa da-pareta hiluya nyuna, tàka nda tuana na kapingatu-na nyuna.

⁵Napa na maràmba la tana mbara luru nalua-ya la kapingatu. Na nyuna na haàtu welingu la ngora tanatara-na napa narihi kapingatu welingu lai nyuna, dàngu napa na-pareta pa-maràmba marihi bokulu.

⁶Nda pira mbua ndaungu la malamiri napa na maràmba la tana mbara luru da-pakuhingu dàngu na maràmba la tana mbara dia dàngu na-pamangoma-ya na anana kawini la maràmba la tana mbara dia. Na nyuna na pa-kuhingu-da nda na-torungu-a dàngu nu na anana kawini napa pa-pameti-ya, hamanai na leina dàngu da anana[21] dàngu da ata da malua patuya.

⁷Ndedi nggi tuna mandaina la hambeli-na nu, na haàtu welingu la kalembi-na na ana maràmba kawini napa nanjadi maràmba. Napa nyuna na-nàhaku-ha da tanatara-na na hanganji la tana mbara dia, danjungu-nya na ngia pa-torungu-na hi dabera-ya.

⁸Ba nabeli-ya la Mehiru, napa nangàndi-ya na kahala tau marapu-na na muhuna dàngu da kanaingu àmahu rara àmahu bara da pambàda hunggu marakungu la marapu nuna. Nda pira mbua ndaungu bia mandaina ba nda na-pabera dàngu na maràmba la tana mbara dia.

⁹Napa la malamiri-na na maràmba la tana mbara dia nanjungu-nya na tana mbara luru, tàka na nyuna da-nàhaku-ya hi lupa na-punjilungu beli la tana wikina.

¹⁰Tàka da ana maràmba mini la tana mbara dia napa da hawanjiru pa-pabera hi da-pauhi padangu tanatara. Na haàtu welingu lai nyuda na-talanjiru pa-làndahungu hama tuna tungu iwaya. La pa-panduangu wàna pa-talanjiru na-nàhaku-ya na ngia pa-torungu-na na muhu.

¹¹Ka mbeni-nanyaka na maràmba la tana mbara luru, hi na-ndàharungu la pabera pa-rawaku-ya na maràmba la tana mbara dia. Napa nyuna na-ngalangu pabera-ya na tanatara dangu pa-pauhi-na na maràmba la tana mbara dia.

¹²La malamiri-na rukuna ba natalu dàngu ba mbàda dangu-maka muhu pa-pameti-na, hau mini-duka nu, wàna, tàka nda jia talu pangalangu-ana.

¹³La pandua wundangu wàna na maràmba la tana mbara dia napa nahili pa-uhingu tanatara marihi dangu welingu la mangilu-na. Jàka na tomaka na rehina, napa na-ndàharungu dàngu tanatara dangu mambinu madàka-na.

¹⁴Napa nadangu na tau na ma-patula ngganggangu hangganya na maràmba la tana mbara luru. Dàngu nda pirada da tau mbana eti welingu la banjaru-mu, Ndanialu, napa da-patula ngganggangu-mbu ba mbàda itangu-daka harii mata. Tàka nda da-duluku-a.

¹⁵Tunaka nu napa na maràmba la tana mbara dia na-nggupulu-ya na hau paraingu maningu ngia pa-torungu-na hi nawàhi-ya. Da tanatara la tana mbara luru nda damàka-a pa-padàdungu, da pamba tanatara papindi-mbu nda peku pa-tumbarungu-adapa.

¹⁶Àtalu wàngu-nanyaka etina napa na maràmba la tana mbara dia dàngu nda ana ninguma ma-patumbarungu. Napa na-mandapu-nya nu na tana ma-manandangu hi na-kawaha ndàbaya.

¹⁷La malamiri-na napa na maràmba la tana mbara dia na-hawanjiru-ha da tanatara-na mbuu ndàbada pa-nàhaku-ya na tana mbara luru. Tàka keha ka ku-kawaha ndàbaya na pa-maràmba muhu ba wàna, wulu-nanyaka lii pa-hamangu dàngu nyuna tàka hi na-pamangoma-ya na anana kawini[22] la maràmba Mehiru nuna; tàka na pawuku-na nu nda jia hàrangu-ana.

¹⁸Hàlaka nu napa na-nàhaku-ha da banjaru la hingi tehiku, dadangu da pabera-na. Tàka na haàtu liku uru weli nàmungu napa na-pakàku-ya nyuna hi na-papànja-nya na paakangu-na, jiapa nyunaipa na pa-paaka-na paraïna liku uru[23] weli nàmungu nuna.

¹⁹Napa na maràmba la tana mbara dia na beliya la ngia patoru - ngia patorungu-na la tana wikina, tàka na nyuna napa nambera dàngu nda pahili rongu-ayapa rukuna nyuna.

²⁰Napa nyuna nahilu-ya paraï haàtu maràmba na ma-paràhangu panggawi mbana etina pa-pauhingu hilu katiku pawua lerangu ka da-bonjangu da pawulu-na na pa-maràmba-na. Nda nggi tuana mandaina napa pa-pameti-ya nuna na maràmba ba pameti-ya nda papi-anya dàngu nda la pabera-mbu,” wàna.

²¹Nahili panii na papalewa, “Na maràmba ma-pandàkingu na ma-pareta-ya na tana mbara dia haàtu tau mangia wawaya manda ningu ngabangu la panjadi maràmba. Tàka na nyuna napa nda pambuti-anya hi jia tàka harabàndangu biana hi na-hihiku-ya na mandapu-na na maràmba wàngu wulu akana.

²²Mbuu ndàba da tanatara ma-patumbarungu lai nyuna, jiapa ka jiaya na Ratu Bokulu-ma napamau-ya hi na-patàlaru-ya.

²³Napa napanda-ha da pa-njanjingu pabidi turana dàngu banjaru hawiangu. Dàngu na-parukangu pa-kapingatu jiapa-kai ka nanggara kudu-aya na pa-pareta-na.

²⁴Wàngu màhina napa na-kaluluku-nja da tana ma-kamboka la rehi mambiru-na na tau lai nu. Napa nawunda pandedi wunda ndokuda da boku la mangilu-na. Tàka hi napabe - berinja la ma-kikungu, mbuu ndàba da malanja pa-rambangu dàngu da pawulu wàngu pangala-na la pabera. Napa na-unangu wulu aka la pakalulukungu la pangia da maningu ngia pa-torungu-da, na nyuna na rehina lu njàpu-ama-nanyaka.

²⁵La malamiri-na na wàngu toru mbenina na pa-uhingu tanatara madangu la pa-kaluluku-nya na maràmba la tana mbara luru na mambàda hawaritu la pa-rawaku-ya nyuna wàngu tanatara ma-kapingatu dàngu da madira danguha. Na nyuna nda na-torungu-a na maràmba mbara luru ba ningu ma-kaleka-nya.

²⁶Da ama bokulu-na da ma-karaha mànuya nyuna napa dapuha-ya nyuna. Dadangu da panjuri-na da pa-pameti dàngu napa da tanatara-na papamau-ha.

²⁷La malamiri-na nu da maràmba pa-kadua-da da-mandapu la hau menja hi angu nganguda, tàka ningu pawuku akatu-da, dàngu da-kawara pa-kambàlikungu. Na nyuna nda na-hàrangu-a na pawuku-da ba ndedi natoma-a na rehina.

²⁸La malamiri-na beli-nanyaka la tanana na maràmba la tana mbara dia dàngu mbuu ndàba da malanja pa-rambangu da pangala-na. Kita-mananya na etina la pa-pamuna-nya na huri lumungu-na na banjaru-na i Ala. Napa àtalu wàngu eti biana hi namangu pabeli-ya la tana wikina.

²⁹Nda nggi tuna mandaina la malamiri, napa nahili kaluluku-nya na tana mbara luru, tàka na hupu njàpuna hauya welingu la wungana.

³⁰Nadu da tau Roma damai wàngu kapalu welingu la Hipuru hi dabera-ya nyuna, hi dira mangàdatu-ya. Hi nabeli dàngu karaü etina dàngu na pa-mukarungu la pa-pamuna-nya na huri lumunguna na banjaru-na i Ala. Napa nakiku-nya na panaungu-da da tau mambàda kandulingu welingu la huri lumungu nuna.

³¹Hi na-pangàndi-nja napa da pamba tanatara-na da ma-pairaku-ya na Umana i MIRI. Napa da-papànja-nya na kameti maraku nimbihu lodu dàngu hi pa-ndolaku-ya na pa-maringgingu hamangu na Akatu ma-pakabu ba wàda-nya.[24]

³²Wàngu wulu akana na maràmba napa na-pamanda-nja da tau da mambàda pahàla-nya na huri lumungu-da, ka da-mbuhangu pandula-ya nyuna. Tàka na nyuna da tau ma-karadaku-nya i Ala napa datoru mbeni la pa-rawaku-ya nyuna.

³³Da tau manggàna ma-kapipi-ya na rayatu napa da-pawiti-nya hi nadangu na tau na ma-jàngapu kanandingu-na. Na nyuna la nda pira mandaina ninja ba nda pirada la hongada napa da pa-pameti ruku pabera jàka ndia ruku epi dàngu nda piradai da pa-rambangu dàngu da pa-tanawangu.

³⁴Nu ba talànga palaku-ya na pameti-ha, da banjaru-na i Ala da ana ngalangu pa-ndulangu, tàka na nyuna nadangu na tau na ma-paoringu lai nyuda, ba yaulu-danya na nduma wiki-ma-ada.

³⁵Hawiangu welingu la liku uru ma-manggàna napa pa-pameti-ha, tàka nuna jiaya na pakaka wànya na banjaru hi da-yarahu wànya. Nuna nu napa napangalangu lundu hupu njàpu rehi, nu na rehi pambàda kawuku-na i Ala.

³⁶Na maràmba la tana mbara dia napa nawunda-ya na pambuha eti wikina. Wàngu ngànjangu-na napa napanii ba narihi pa-bokulu welingu la mara - rapuka, jiapa narihi-mbu pa-bokulu welingu lai Ala Hupu Majangga. Napa na-ngalangu patuna nu lundu na-kanjupungu na hànggana i Ala. Nadu jàka nggàraya na pambàda kawuku-na i Ala lupangu pahàra-manyapa bàdi.

³⁷Na maràmba nuna nda na wàrihu-aha da mara - rapuka da palumu-da da boku la mangilu-na, pambulu-mbunja da marapu palumu-da da kawini. Hi nda na-wàrihu-ha nuda da marapu nadu ba nakaka wikina narihi bokulu-pa nyuna welingu lai nyuda.

³⁸Tàka lumu ningu biana-nyai marapu pandedi lumu ndokuda da boku la mangilu-na, jia-duhaka da marapu maopa-nja da ngia pa-torungu. Napa nawotu maraku àmahu rara àmahu bara, watu pawilingu dàngu hu - hunggu hawiangu wàngu borakungu-na la marapu pandedi lumu ndokuda da boku la mangilu-na.

³⁹Napa napindi tau da ma-lumungu marapu weli nàmungu, la pa-kaluluku-nja da ngia pa-torungu ma-kapingatu. Nggamu mayema-ya nuna na marapu napa nawua padaanya tembi dàngu ngaba ma-manàra dàngu tana wundana.

⁴⁰Jàka jia-yaka na mareni njàpuna na kawaha-na na maràmba la tana mbara dia, napa na-kaluluku-nya paraï maràmba la tana mbara luru. Tàka na maràmba la tana mbara dia hi na-palimba nda ngerinya nuna. Napa na pa-uhingu padangu kareta pabera, njara dàngu kapalu. Napa nanjungu hama iwaya, hi dangu tana pa-mandapu-na.

⁴¹Dàngu na tana manandangu nanjungu-mbunya, dàngu diha kambulu rataya napa na tau pa-pameti-na. Tàka da pa-maràmba Endumu, Muapu dàngu na tana na marihi hàmu la pa-maràmba Amungu napa damara.

⁴²Ba na-mandapu-nja da pa-maràmba nuda nda namara-a na pa-maràmba Mehiru.

⁴³Napa naramba-nja da banda Mehiru nu da àmahu rara dàngu da àmahu bara dàngu banda hawiangu ma-pawilingu halawàla. Napa nandula-ya tau Limbia dàngu tau Hundangu.

⁴⁴Tàka na lii langu welingu la pahunga lodu dàngu weli diangu napa na pa-kandàndaku-ya, hi lupa na-pabera dira matiki hi dangu tau pa-pameti-na.

⁴⁵Dàngu na-patàngi-mbuya na uma tera pa-maràmba-na la padeni pa-duangu-na na tehiku dàngu na palindi pangia-na na Umana i Miri. Tàka la malamiri-na napa nameti dàngu nda haàtu-mbu mandula-ya,” wàna.