Read Kambera NDANIALU 12 Bible Online

NDANIALU 12 - Kambera bible

NDANIALU 12

¹Nahili panii nu na papalewa na mapaki tera linangu, “La rehi nu napa natàka na papalewa bokulu i Mikayilu na maopa-nya na banjaru-mu. La malamiri-na napa natàka na rehi handuka manda ningu hamangu pa-kiringu welingu ba ningu ba - banjaru. Tàka mbuu ndàba na tau ma-welingu la banjaru-mu, da pa-tulihu tamu la Mbukuna i Ala, pa-pamara-ha napa.

²Dadangu la hongada da mambàda meti napa daluri beli, hawiangu dapàda-nya na luri pa-lupangu, tàka hawiangui dadeni-nya na pawawa ma-palupangu-mbu.

³Da liku uru da ma-manggàna napa da-handaraku hama tuna harii awangu. Dàngu nyuda da mambàda papekangu tau dangu la pawunda mahàmu dàngu mamola napa da-handaraku hama tuna kandunu lundu nu - nu,” wàna.

⁴Tàka nahili paniingga nuna na papalewa, “Oi Ndanialu, bita-nyawa nàhu na mbuku, dàngu tunya hanggelu ka na-padaingu pa-kabitangu lundu hupu njàpu rehi. Nadangu na tau na ma-kamangu pa-manginjiru-ya jàka nggàraya na ma-talànga njadi. Tàka na pa-mukarungu-da nu kahewa-ma-ana,” wàna.

⁵Hàlaka nu kuita-ha da madua da tau mini. Na haàtu na-ndolaku la hingi luku mbara nàmuya, tàka na haàtu la hingi luku mbara papaya.

⁶Na haàtu na paàra-nya na marihi lihinya na katiku luku, “Pirangu-mapa nanjàpu-da da pa-hangàtarungu da matumbu yiada?” wàna.

⁷Tàka na haàtu na-wulaku-ha da limana hanggangu la awangu. Kurongu-ya ba nahara wànya i Ala na malundu nu - nuna hi napanii, “Nu da manjadi da-pangalangu-mapa lundu tailu mbua ndaungu ha-kadipu. Jàka hupu njàpu-naka ba pa-mayila-ya na banjaru-na i Ala, hupu njàpu-madai duda nuda da pa-hangàtarungu da matumbu,” wàna.

⁸Mbuu ndàba da paniina kurongu-maha, tàka nda ku-jàngapu-aha. Tàka hi kupaàrangu, “Umbu, nggiki hamada napa ba danjàpu mbuu ndàbada yiada?” wànggunya.

⁹Nahema nyuna, “Lakuwa nàhu, hi Ndanialu, nadu da kareuku yiada pa-winingu-maha bàdi lundu hupu njàpu rehi.

¹⁰Napa nadangu na tau pakaka dàngu na pa-payarahu. Nyuda da ma-akatu nda jia jàngapu-adanya dàngu napa pa-daingu akatu-madapa; mbulungu da ma-manggàna-a da ma-jàngapu-ya.

¹¹Piti welingu ba papànja-nja da tanda maraku nimbihu lodu dàngu ba pa-ndolaku-ya na Akatu ma-pakabu,[25] napa na-làpahungu 1.290 lodu.

¹²Oha-adaka nyuda da ma-padaingu pa-tuturu lundu la lodu pa-1.335 wàna.

¹³Nyumu dumu Ndanialu, tuturu-wa lundu hupu njàpuna. Napa nyumu umeti, tàka na nyuna napa uhadangu beli pakei wundamu la hupu njàpu rehi,” wànangga.