Read Kambera NDANIALU 2 Bible Online

NDANIALU 2 - Kambera bible

NDANIALU 2

¹Handàka la hau rudungu ba dàmbu ndaunaka pa-pareta na Maràmba Nembukatunehàru, na-manggadipangu nyuna. Ruku na manggadipangu-na dira nda nguduya na etina, hi nda peku mahuru-na.

²Jia ba tuna ka paau-nanjaka da ma-manyura, da mapingu alimu, da mapingu kabeli mata dàngu da tau mapingu - mapingu-ka, ka pa-habola-ya na manggadipangu-na.

³Ba da ndolaku-ka la hangga, panii-nanyaka na maràmba, “Ku manggadipangu, hi nda nangudu na etinggu ba ku-rinjungu papinya na ihina!” wàna.

⁴Tàka nyuda hi dahema wàngu hilu Aràmu, “Màta kau luri pa-daingu àruki ou miri lundu nu - nu! Peka-nggama-nyawa nuna na manggadipangu, ka ma-pahabola-ya na ihina,” wàda.[1]

⁵Nahema na maràmba, “Mbàda bota-manggu-nyaka: Lupangu-ma bàdi nyimi ipeka-ngganya nuna na manggadipangu, hamangui na ihina. Tàka jàka ndai duluku, napa palàtaku-kai dàngu pa-nyungguru-ha da umami.

⁶Tàka jàkai duluku, napa kuwua-nggai pawua juangu madira manandangu dàngu patembi halawàla-kai. Màla peka-yawa nàhu na manggadipangu-nggu pa-kariangu ihina!” wàna.

⁷Hi dahili hema, “Peka pàku-nggamanya làti na manggadipangu miri, hàlaka nu ka ma-pahabola-ya na ihina,” wàda.

⁸Ba narongu-yaka nuna ka hema-nanyaka na maràmba, “Langatàka nda nanjala-a na pa-pakaka-nggu. Nyimi naa ba pare - rehingu-aminya, bai pidunya ba kuwuku-ya

⁹pahuku-nggai mbuu ndàbami wàngu hukungu ma-pahama jàka ndai duluku papanii-ngganya na manggadipangu. Pa-pahama-minya la pa-pangala tilangu pa-pakambàliku-ngga dàngu monu-minya ba ku-haleli-ya napa na botangu-nggu. Màla, peka-yawa nu na manggadipangu, ka pidunggu-nyaka napa bai ngalangu-mbu pa-pahabola-ya na ihina,” wànanja.

¹⁰Dahema da ma-manyura, “La panggubulu awangu nda haàtu-a ma-ngalangu papeka-ya nu na pawuku-mu, miri. Dàngu ndedi ningua haàtu maràmba, jiapa ka nggi tuna bokulu-na dàngu mangarangu-na, ma-karuhi ma-hamangu welingu la ma-manyura, la mapingu alimu, dàngu da tau mapingu - mapingu-ka la umana.

¹¹Nyumu dumu miri urinjunya na ma-kalutu halawàla. Nda haàtu-a ma-ngalangu patàka-nya hinggilu-da da marapu, tàka nda da-ngiangu-a la honga tau pinu tana,” wàdanya.

¹²Ba narongu-yaka nu ka dira mbeniya na maràmba hi na wuangu pareta pa-pameti-ha mbuu ndàbada da mapingu da maninja la Mbambilu.

¹³Tàka hi bobaru-ya na pareta, dàngu hi himbuha mbuu ndàbada da tau pingu - tau pingu hamangui i Ndanialu dàngu da anguna ka pameti-ha.

¹⁴Tàka i Ndanialu hi nalua tomaya i Ariuku, na ngorada da karaha maràmba, na mambàda wai rehingu la pa-pahàra-nya na hukungu meti. Wàngu pananjarungu-na

¹⁵na-paàrangu i Ndanialu lai nyuna, jàka nggikina duna hi na-wuangu pareta ma-mbàringu tungu nu na maràmba. Tàka i Ariuku napanii-nya i Ndanialu na mambàda tumbu.

¹⁶Ka lu lua-nanyaka la maràmba i Ndanialu hi nakarai manggawangu ka pa-habola-ya na ihina na manggadipangu.

¹⁷Na pakarai-na pa-kataku-ya, tàka hi nabeli la umana i Ndanialu hi napanii-nja i Hananya, i Mihailu dàngu i Aharia mbuu ndàbana nu na matumbu.

¹⁸Na-paràha-nja pa-hamayangu lai Ala la awangu ka namila-nja eti nyuda dàngu ka nabuwa-ya na pànda pingu na manggadipangu. Ba tuna nu napa nyuda nda pahuku pameti karia-anjapa dàngu da mapingu - mapingu hawiangu.

¹⁹La rudungu nuna i Ala napeka-nya i Ndanialu la harii mata nu na panda pingu. Ka wotu-nanyaka i Ala la awangu nyuna i Ndanialu,

²⁰“I Ala na-manggàna dàngu narihi talu, pa-wotungu-ya Nyuna lundu nu - nu!

²¹Nyuna ma-kawuku ndaungu dàngu rehi, Nyuna na ma-kunggulungu dàngu na mawotu maningu kawahangu. Hili Nyunamai na ma-wuangu manggàna, dàngu ma-pakeingu kanandingu ma-jàngapu.

²²Nyuna nabuwa ma-kawiningu ma-tanjiku halawàla. Nyuna napiinya mbuu ndàba na matumbu la kanjidingu. Nyuna na-maringgi-nya hambila.

²³Ou, Ala palumu-da da boku la mangilu-nggu, Nyumu kuwotu-nggamu dàngu ku-pa-mangara-nggau. Bau wua-dungga manggàna dàngu màka. Na pakarai-ma mbàda pajia-munyaka. Dàngu nahema la maràmba mbàda pa-itangu-muyaka,” wàna.

²⁴Hàlaka nu lua-nanyaka i Ndanialu lai Ariuku na pambàda pa-ngabangu pa-pameti-ha da mapingu la Mbambilu. Napanii-nya nyuna paraïna i Ndanialu, “Àmbu pameti-duha da mapingu - mapingu. Karia-nggawa la hangga maràmba, ka kupeka-nya i tamu umbu na parinju-na la papinya,” wànanya.

²⁵Ka lu karia-nanyaka i Ndanialu palua la hanggana na Maràmba Nembukatunehàru paraïna i Ariuku hi napanii, “Mbàda hunggu-ngguka haàtu la honga tau Yahundi pa-patanawangu, ma-ngalangu papeka-ya na manggadipangu-mu miri,” wànanya.

²⁶Ka panii-nanyaka na maràmba lai Ndanialu na ma-tamungu Mbelutaharu-mbu, “Mu-ngalangu dumu papeka-ngganya na manggadipangu-nggu?” wànanya.

²⁷Nahema i Ndanialu, “Ou na miringgu, nda ningua tau pingu, mapingu alimu, ma-manyura jàka ndia mapingu kandunu ma-ngalangu papeka-nggaunya nuna miri.

²⁸Na nyuna la awangu ninya i Ala ma-ngalangu pabuwa-ya mbuu ndàba na ma-makawiningu, dàngu mbàda paniina-nggaunyaka nyumu miri jàka nggàraya na matumbu la rehi malamiri. Nàhu, pahia-nggawa ka ku-pahabola-ya na manggadipangu dàngu na harii matamu bau mahuru nyumu miri.

²⁹Ba talànga mahuru-mu miri, mu-manggadipangu rukuna na rehi na manàmu-nya. I Ala na mabuwa mbuu ndàba ma-kawiningu na paita-nggaunya nyumu miri jàka nggàraya napa na matumbu.

³⁰Yiana na ma-kawiningu pambàda buwa-yaka lai nyungga nda jia-aya ba ruku rihi pingunggu welingu la mbutana, tàka kapeku pimunya na ihi manggadipangu-mu miri dàngu kau jàngapu-mbuya na ihi etimu nyumu miri.

³¹Yiana-yaka na harii mata na paita-mu miri: La hanggamu miri ninya hauna na kahala hada! Kanjupu bokulu-ya na kahala tau nuna, dàngu dira kajilaku-ya tàka ba itaya kanjupu pa-maringgingu-ya.

³²Na katiku-na pa-pandoi welingu la àmahu rara ihi mbàngi-nanya, na kuruna dàngu da limana welingu la àmahu baraha, na puhu bànggina dàngu na kengana welingu la wuduha,

³³da winjuna welingu la bàhiha dàngu da wihina hawiangu welingu la bàhiha tàka hawiangui welingu la tana wurungu-ha.

³⁴Ba talànga tàngaru-munya nu miri, na-tambukalu welingu la karaha na hau watu bokulu, nda taua ma-jonggaru-ya, hi nanggàna-ya na kahala tau la wihina da pa-pandoi welingu la bàhi dàngu tana wurungu hi lundu da-muburu.

³⁵La rehi nuna ba nanjoru na kahala tau hi pabundu bàhi, tana wurungu, wudu, àmahu bara dàngu àmahu rara bia-yaka na makabu mija hama kumburu tana la ngia pa-pàmbalungu uhu nggàndumu la wandu. Na pa-bundungu nuna na hawuru ngàndiya ngilu, hi nda ana bii-ana kaweina. Tàka na watu bokulu ma-panjoru-ya na kahala tau nanjadi palindi bokulu hi napinu-ya na pinu tana nggubulu-na.

³⁶Tuna nu duka na manggadipangu-mu miri, tàka nàhu pa-habola-nggunyaka na ihina.

³⁷Nyumu ma-mangarangu miri, jiakau maràmba-da mbuu ndàba da maràmba; nyumu miri jiakau ma-kanjupu kawaha. I Ala la awangu mbàda wuana-nggaunyaka nyumu miri yiana na pa-maràmba, na kawaha, na kapingatu, dàngu na bokulu.

³⁸Nyumu miri nawotu-kau pa-kawaha-ya la pinu tana maningu tauna dàngu la mbuu ndàba ma-hawurungu dàngu da banda hawiangu. Jia wiki-makauka nyumu miri na katiku àmahu rara nuna la kahala tau.

³⁹Tàka la hambeli hupu njàpuna na pa-maràmba-mu miri, napa na-kawudaku na hili hau pa-maràmba na manda hama bokulu-na na pa-maràmba-mu nyumu miri. La malamiri-na na-kawudaku na pa-maràmba pa-tailu wàna na pa-paninu wai pamaü marangu la wudu la kahala tau nuna, na ma-kawaha-ya napa nggubulu na pinu tana.

⁴⁰Pa-ndàkingu-na napa na-kawudaku na-pamaràmba papatu wàna na ma-kalatungu hama bàhiya. Dàngu hama tuna bàhi na ma-pamuburu dàngu pa-kaweraku nggàra biaya, tuna numbu na pa-maràmba papatu wàna yiana napa na-pamuburu dàngu napa-kaweraku-ha da pa-maràmba hawiangu.

⁴¹Da wihi dàngu da wua wihina na kahala tau da maweli-da la tana wurungu hawiangu tàka hawiangu ba welida la bàhi, na ihina la lodu malamiri napa na pa-maràmba nuna na pabi - biwangu. Na pa-maràmba nuna na kalatungu-mbu ba na pa-korungu bàhidu na tana wurungu.

⁴²Da wua wihi hawiangu ba welida la bàhi tàka hawiangu ba welida la tana wurungu na ihina ninya hawiangu la ngaba tana pa-maràmba na ma-kapingatu tàka hawiangu nda na-kapingatu-a.

⁴³Na pa-korungu-na na bàhi dàngu na tana wurungu tanda-nanya na pa-maràmba nuna nakatikanguma pa-kapingatu wikina wàngu lalei mangoma pa-haürungu, tàka na katikangu-na nu kahewa-ma-ana, hama tunambu na bàhi ba nda na-ngalangu-a pa-paraï dàngu na tana wurungu.

⁴⁴La rehi pareta-da nuda da maràmba, i Ala la awangu natura-ya na hau pa-maràmba na ma-torungu lundu nu - nu dàngu nggàra banjaru bia nda jia ngalangu-ana pa-pakàku-ya. Na pa-maràmba nuna napa na-pakabu na-pamija-ha nuda mbuu ndàba da pa-maràmba hawiangu.

⁴⁵Hi ita-ma-dumunya nu miri ba nda ruku jonggaru-nanya lima taua, ba na-tambukalu na hau na watu welingu la karaha hi nanggàna-ya dàngu na pamija-ya na kahala tau na ma-welingu la bàhi wudu, tana wurungu, àmahu bara dàngu àmahu rara nuna? I Ala na ma-bokulu napuru pekanggau nyumu miri jàka nggàraya napa na matumbu. Nuna na manggadipangu peku-mana la pawaiya dàngu ma-tubangu-maya na pa-kaloka-nggu,” wàna.

⁴⁶Ka marubuku-nanyaka na Maràmba Nembukatunehàru la hanggana i Ndanialu hi na-wuangu pareta ka tembiya i Ndanialu dàngu ka dawotu-nya kameti maraku patunu dàngu tanda maraku hawiangu.

⁴⁷Na panii na maràmba, “Langatàka, Ndanialu, na Alamu nuna hupu ma-bokulu-ya la honga mbuu ndàba ala. Nyuna jiaya na ma-kawaha-ha mbuu ndàba da maràmba, dàngu na mabuwa mbuu ndàba pa-winingu. Nu hi kupinya ma bau ngalangu duka pa-pahabola-ya na pa-winingu yiana,” wànanya.

⁴⁸La hambeli-na nu nawua-nya wai ngaba ma-bokulu, dadangu da pawua juangu ma-manandangu pawua-nanya, dàngu nawotu-ya pa-nggumbunuru la Mbambilu dàngu natuya liku uru hupu majangga la mbuu ndàba ma-madaü la uma maràmba.

⁴⁹Tàka pa-namatu-nya na pakarai-na i Ndanialu, na maràmba nawua-ya na pareta la porupenihu Mbambilu nuna lai Hàndaràku lai Meha dàngu lai Ambitunenggu, tàka i Ndanialu duna na-ndàdiku la uma maràmba.