Read Kambera NDANIALU 6 Bible Online

NDANIALU 6 - Kambera bible

NDANIALU 6

¹Ba pameti-yaka i Mbeluhiahàru, wàhi-nanyaka pareta i Ndariu tau Mendia. La rehi nu nomu kambulu dàmbu ndaunaka na ndaungu lurina.

²I Ndariu nabiwa-ya na pa-maràmba-na hi hangahu dua kambulu porupinihu-ya, nimbihu-da na-pareta-ya paraï haàtu nggumbunuru.

³Nawotu-ha i Ndanialu dàngu tau madua hawiangu pa-hamata-ha da nggumbunuru ka àmbu parunggi-ya na maràmba.

⁴Nalu lohangu-ma ba narihi pahàmu na paràma-na i Ndanialu welingu la nggumbunuru mbutada dàngu da maningu wai ngabangu papingi hawiangu. Tuna nu duka hi na-mbuhangu na maràmba pawotu-ya ka na-katangu kawaha la nggubulu pa-maràmba-na.

⁵Tàka da nggumbunuru dàngu da mapingu wai ngabada, da-duruhu pahimbu-nya njalana i Ndanialu la ngaba pareta, ba tuna nda da-ngalangu-a, ba na-tuturu dàngu na-patutungu i Ndanialu dàngu nda nggàra-a njala pawunda-na.

⁶Hi dapanii, “Mbulungu la ma-panuangu la huri lumungu-ana bàdi hi tahunggu-nya njalana i Ndanialu,” wàda.

⁷Tunaka nu lua-danyaka la hangga maràmba, “Dou na miringgu Maràmba Ndariu màta àruki miri kau luri lundu nu!

⁸Nyuma mbuu ndàbama ma-paloku-ya na pamaràmbamu miri, ma-hamata, nggumbunuru, wa - wakilu nggumbunuru dàngu da ma-pangaba hawiangu, mbàda pa-hamangu-maka pa-patàkangu lii kamahingu ka na-paluhu huratu pareta ma-kawàndi i miri, wàmanggau. Làti miri kau wuangu pareta màta la ngala tailu kambulu lodu nda haàtu-a pa-pahiangu pa-patàkangu lii kamahingu-na la marapu jàka ndia la taukai, mbulungu lai nyumu wikia bàdi miri. Jàka nggamu mapangga-ya nuna na pareta napa panàngga-nya la liangu hinga.

⁹Ma-kamahi-nggau ka nyumu wikima miri matuu tanda limamu la huratu pareta nuna ka nanjadi-ya uku Mendia dàngu Perihia na manda peku la paàli belinya,” wàda.

¹⁰Ka tuu-nanyaka tanda limana na Maràmba Ndariu la huratu pareta nuna.

¹¹Ba narongu-yaka nuna i Ndanialu, beli-nanyaka la umana. Na kurungu-na la ndàdiku dita ningu katonga - katonga-na ma-hanggangu la Yeruhali. Dàngu hama tuna na pakàli ndàmana, na-hamayangu la Alana pandailu wundangu hau lodu dàngu patika-na la hanggada nuda da katonga da ma-tabunggahu.

¹²Ba daita-yaka paraï da muhuna i Ndanialu ba talànga hamayangu-na la Alana,

¹³lua ndàba-danyaka la hangga maràmba pakàla-ya i Ndanialu. Dapanii, “Ka nda mbàda tuumu tanda limamu miri la huratu pareta mahiri ndàbanya na tau la tailu kambulu lodu nàhu pa-patàkangu lii kamahingu-na la marapu jàka ndia la tau hinggilu-na lai nyumua? Dàngumbu, jàka nggamu mapangga-ya na pareta nuna napa ba panàngga-nya la liangu hinga?” wàda. Nahema na maràmba, “Tubangu, dàngu na pareta nuna nanjadi uku Mendia dàngu Perihia na manda peku la paàli belinya,” wàna.

¹⁴Tàka nyuda hi da paniinya na maràmba, “I Ndanialu, na haàtu tau tanawangu welingu la Yahunda, nda natembi-akau nyumu miri dàngu nda na-kawela-anya na pareta-mu miri. Nda na pa-njalangu-a pa-hamayangu pandailu wundangu hau lodu,” wàda.

¹⁵Ba narongu-yaka nuna hawina-nanyaka na etina dàngu mangàdatu-na na maràmba, hi nahimbu wulu aka pa-pamara-ya i Ndanialu. Lundu malingu pa-daingu-mana-nyapa pa kana - nandingu.

¹⁶Hàlaka nu da hili mai da tau nuda la hangga maràmba hi dapanii, “Miri, upangàda-nya bàdi miri, pa-namatungu la uku Mendia dàngu Perihia, na pareta pa-paluhu maràmba nda pa-ngalangu-a papanji - njilunya,” wàdanya.

¹⁷La hupu njàpuna wuangu-nanyaka pareta na maràmba ka yàpaya i Ndanialu hi puhaya la liangu hinga. Tàka na maràmba, “Màla àruki na Alamu na palumu-mu wàngu tuturu-mu ka na-pamara-kau,” wànanya i Ndanialu.

¹⁸Hàlaka nu hi bànjalu-nya hau watu bokulu la ngaruna na liangu, tàka na maràmba nahàpu-ya na watu wàngu hàpu maràmba dàngu hàpuda da ma-pangora, hi nda haàtu-a mapeku la pa-pamara-ya i Ndanialu welingu la hinga nuda.

¹⁹Hàlaka beli-nanyaka na maràmba la uma maràmba. Nda nabihu-a pangangu jàka ndia pa-pamanda-nya. La rudungu nu lundu hariina nda peku katuda-ana.

²⁰La mbaru hada rudungu ringga - ringgana na maràmba ba nalua la liangu hinga.

²¹Ba natàka-ka lai nu, wara-nanyaka wàngu nggidiku etina, “Oi Ndanialu, atana i Ala maluri! Namàkadu na Alamu na palumu-mu wàngu tuturu-mu pa-pamara-kau welingu la hinga nada?” wàna.

²²Ka rongu-nanyaka hemana i Ndanialu, “Màta àruki miri kau luri lundu nu - nu!

²³Na Alanggu mbàda palewa-naka papalewa-na pawunggu-nja da ngaruda da hinga tàka hi nda dahoba-ka. I Ala na-pamara-ka ba napii-dunya ba nda kuwunda-a manjala lai Nyuna dàngu lai nyumu miri,” wàna.

²⁴Kanjupu mbàha etiya na maràmba hi na-wuangu pareta ka paluhu-ya i Ndanialu welingu la liangu nuna. Ba pahàra-nyaka nu na pareta na-lohangu ba nda ana ningua manua-na i Ndanialu, ba napawai-du la Alana.

²⁵La hambeli na nu wuangu-nanyaka pareta na maràmba ka yàpaha da tau makàla-ya i Ndanialu. Hi puhaha dàngu ana dàngu papaha-da la liangu hinga. Ba ndedipa da-rànjaku daa la liangu kataku hoba-madaha hinga hi da-pakarunggutu-ha da riida.

²⁶Hàlaka nu pangàndingu-nanyaka huratu na Maràmba Ndariu la mbuu ndàba na banjaru, na kabihu banjaru dàngu hilu la nggubulu-na na tana, “Tambi mambiru!

²⁷Ku-pareta-ya mbuu ndàbana na tau la ngaba pa-maràmba-nggu ka da mangàdatu-nya dàngu ka datembi-ya na Ala palumu-na i Ndanialu! Nyuna Ala maluri lundu nu - nuya, lundu njàpu rehi ba na-pareta. Nda jia tàlaru-ana na pa-maràmba-na. Nda ningu njàpuna na kawaha-na.

²⁸Nyuna ma-pahàla dàngu ma-pamara, nawunda pa-hangàtarungu dàngu pa-bànarungu la awangu hamangui la tana. Mbàda pahàla-nanyaka i Ndanialu, welingu la hoba-nanya hinga,” wàna.

²⁹Tuna nuduka i Ndanialu hi na-padaingu la ngaba ma-papingi la ngala pareta-na i Ndariu dàngu pareta-na i Korihu, na tau Perihia.