Read Kambera NDANIALU 7 Bible Online

NDANIALU 7 - Kambera bible

NDANIALU 7

¹La hau na rudungu, ba hau ndaunaka pa-maràmba i Mbeluhiahàru la Mbambilu, ku-manggadipangu nyungga, Ndanialu, dàngu ku-ngalangu harii mata. Ku-tulihu-ya na manggadipangu dàngu na lii pa-patàkangu, tuna yia: Na ngilu mbangatu na-hapuputu welingu la nggi - nggini hi lupangu na tungu na làpuru la tehiku lerangu.

³Tunaka nu da-kawudaku ba patu ngiuda da banda bokulu nda najaru weli dalungu la unu wai, nda da-pahama ndàba-a.

⁴Na ma-wungangu na hadana hama tuna hingaya, tàka ningu ruu kàpa mbàkuna. Ba ku-tàngaru-ya, hi jia tambuta biada da ruu kàpana hi da-pahàlangu; na-tanggadaku welingu la tana hi na-ndolaku wànja da wihina ba dua mbunguda hama tuna tauya, hi wuanya kanandingu tau.

⁵Na banda padua ngiu wàda hama tuna mbaruangu-ya. Na-ndolaku wànja da wihi malamiri-na, dàngu nangàndi tailu mbungu rii karaha la manggawa ngànduna. Kurongu talia lii ma-kareuku dànya, “Màla, nganguwa tolungu pira bia pambuha-mu!” wànanya.

⁶Nu ba talànga tàngaru pahàmu-nggunya, kawudaku-nanyaka na hili heui na banda. Na hadana hama tuna mahangu kadutulu-ya, tàka la wungguna ninja patuda da ruu kàpa ma-hawurungu, dàngu patuda da katiku-na. Pa-mahumbarungu-ya ba itaya.

⁷Ba talànga tàngaru-nggunya, kawudaku-nanyaka na banda papatu wàda. Kanjupu kapàru dàngu ma-wirungu-ya dàngu pa-mangàdatungu-ya. Wàngu ngànduna da ma-bokulu dàngu da ma-kalatungu ba hama bàhiha, na pa-karunggutu-ya na payàpa-na hi nyo - nyòlu-nanya, hi na taro - rohaku-ha da marihi. Nda hama tuda da banda ma-mangilu, nyuna duna ningu kaduna hakambulu-da.

⁸Ba talànga tàngaru pahàmu-nggunja da kaduna, hi jia tumbu biana nahili hapungu kadu la hongada. Na kadu nuna nakudu-a, tàka na-ngalangu bia pa-hihiku-ha hi da-tambuta da tailu mbungu da kadu ma-mangilu. Na kadu kudu nuna ningu matana hama tuna mata tau dàngu ngaruna ma-abungu wàngu ngànjangu-na.

⁹Ba talànga kanàndaru-nggu, ninja da kanjàka pareta ba nda pirada talànga paloku-ha. Tàka Nyuna na maluri pa-lupangu na-mandapu-nya na hau la hongada nuda da kanjàka pareta. Na pakina dàngu na lunggina dabara burahu hama tuna kamba. Na kanjàka pareta-na dàngu da ndutungu-na da roka la kandulangu epi,

¹⁰dàngu na arihu epi na-lulungu welingu la kanjàka pareta nuna. Nda pira rata biaya na tau malumu-nya Nyuna, dàngu nda pira pàku biaya na tau na ma-ndolaku la hanggana. Hàlaka nu hi pakiri-nya na rapatu pa-tandangu ngera dàngu hi bunggahu-ha da mbuku.

¹¹Nu ba talànga tàngaru-nggu, kurongu-mayapa ba na-abungu dàngu ngànjangu-na na kadu na makudu. Tunaka nu na banda papatu wàda pa-pameti-ya, tàka na metina hi ndauhaya la epi lupa na-tàlaru.

¹²Da banda hawiangu pa-àlingu-ha da kawaha-da, na nyuna pa-pahiangu-ha paluri lundu toma la rehi pa-kawuku.

¹³La harii matanggu la rudungu nu, kuita-ya na mahama tauya. Namaiya dàngu winggiru-nanya karumangu hi nalua lai Nyuna na maluri pa-lupangu hi patanda-nya.

¹⁴Nyuna pa-wuangu tembiya dàngu kawaha nunjuya ba maràmba-ya, hi da lumunya paraï tau welingu la mbuu ndàba banjaru, kabihu banjaru dàngu hilu. Napa na kawaha-na na-torungu lundu nu - nu, na pareta-na nda jia kunggulu-anya.

¹⁵Nuda da harii mata paita-nggu dapahondaruka dàngu nda da-pangudu-ya na etinggu.[10]

¹⁶Hi kulihi-nya na haàtu na ma-ndolaku lai nu hi kukarai lii kaloka rukuda nuda mbuu ndàbada. Tàka nyuna hi napanii-ngganya.

¹⁷Napanii, “Da patu ngiu banda bokulu nda najaru nuda jiaha da patu mbua pa-maràmba da mahunga napa la pinu tana.

¹⁸Tàka na nyuna na banjaru-na i Ala Hupu Majangga napa da-ngalangu ngaba la pa-pareta, tàka na pareta-na na-dàdungu lundu nu - nu,” wàna.

¹⁹Tunaka nu hi ku-rinjungu papinya na ihina na banda papatu wàda, na ma-pahilitu welingu la hawiangu; na pa-mangàdatungu dàngu na ma-pa-karunggutu-ya dàngu manyo - nyòlu-nanya na payàpa-na wàngu wuu wuduna dàngu ngàndu bàhina, dàngu na mataro - rohaku-ha da marihi.

²⁰Ku-rinjungu papi-mbunya rukuda da hakambulu da kadu la katiku-na dàngu rukuna na kadu kudu na matumbu pa-malamiringu hi nabuta-ha da tailu mbungu kadu ma-mangilu. Na kadu kudu nuna ningu matana dàngu ngaruna ma-abungu dàngu ngànjangu-na. Parihi pa-mangàdatungu-mayapa welingu la kadu hawiangu nuda.

²¹Ba ku-kanàndaru-ya, na kadu nuna na-pabera ba na-rawaku-ya na banjaru-na i Ala hi na pakàku-ya.

²²Tunaka nu hi namaiya na maluri pa-lupangu hi na-wuangu botangu na ma-pamàna-nya[11] na banjaru-na i Ala Hupu Majangga. Toma-nanyaka na rehi ngalangu-da kawaha pa-pareta.

²³Yiana-ya na lii kaloka pangala-nggu, “Na banda papatu wàna jiaya na pa-maràmba na papatu wàna na ma-ndolaku napa la pinu tana dàngu napa na pa-hilitu dàngu na pa-maràmba hawiangu. Napa na pa-maràmba nuna na pamija dàngu nahoba-ya na tana nggubulu-na dàngu nataro - rohaku-ya na marihi.

²⁴Da hakambulu kadu nuda jiaha da hakambulu maràmba da ma-pareta napa la pa-maràmba nuna. Tunaka nu napa ninya nahili haàtu maràmba; napa nyuna na-pahilitu halawàla dàngu da maràmba ma-mangilu dàngu napa na-pakàku tau matailu maràmba.

²⁵Napa nyuna na-kareuku ndubaku-ya i Ala Hupu Majangga dàngu na kapidihu-ya na banjaru-na i Ala. Napa nyuna napamukarungu pa-panjilu-nja da uku dàngu da mbabu anggama-na na banjaru-na i Ala, dàngu napa na-kawaha-ha nyuda la tailu mbua ndaungu ha-kadipu.

²⁶Tàka na kabungguru ma-patandangu la awangu na-batangu la pa-butuhu-ya na kawaha-na dàngu hi pamija-ya lundu namànji.

²⁷Na kawaha dàngu na bokulu mbuu ndàbana na pa-maràmba la pinu tana napa pa-wuangu-ya la banjaru-na i Ala Hupu Majangga. Na kawaha-da la pa-pareta nda ningua dirana dàngu mbuu ndàba na maningu kawahangu la pinu tana napa dalumu-nja nyuda wàngu karadaku-da,” wàna.

²⁸Tuna nuka yiana na pa-patàkangu. Lalu nda nguduya na etinggu hi lupa ku-tawàla bara, tàka nda haàtu-a papanii-nggu rukuda nuda mbuu ndàbada.