Read Kambera NDANIALU 8 Bible Online

NDANIALU 8 - Kambera bible

NDANIALU 8

¹La patailu mbua ndau wàna na pareta-na i Mbeluhiahàru ku-ngalangu harii mata pa-panduangu, wàna.[12]

²La harii mata nuna ningga la porupinihu Elàmu la Huhàngu na parai puhu pareta, Perihia. Ndolaku-nggunya la lihi Luku Ulai,

³dàngu la hingi luku nuna ninya heuna na mbimbi bumbu dua mbunguda da kadu ma-ditana, na hapungu na rihi madita-pa dàngu narihi bidipa welingu la ma-hapungu-na.

⁴Kuita-ya na mbimbi bumbu nuna ba na hiku hanggangu la patama lodu, hu dia dàngu hu luru. Nda heuma banda ma-dàdungu pahangga-nya jàka ndia mamara welingu la kawaha-na. Àtalu-ma-ana ba nawàngu etina hi na-ngànjangu.

⁵Ba talànga tàngaru-nggunya, nàmunya heu na kamàmbi bumbu ma-talanjiru welingu la patama lodu matuu peraya na pinu tana. Paraï pa-mbangatu pa-talanjiru hi lupangu nda da-rànjaku da wihina la tana. La njonga matana da madàmbu-da ninya na hapungu kadu ma-manyori.

⁶Nuna na kamàmbi bumbu nalihi-nya na mbimbi bumbu na paita-nggu la hingi luku nuna, hi na-kaluluku hangganya dàngu mbana etina.

⁷Ku-kanàndaru-ya ba na-kaluluku-nya na mbimbi bumbu. Paraï pa-mbumbaru na mbenina hi lupa na-njukulu-nya na mbimbi bumbu hi napata ndàbaha da kaduna ba dua mbunguda. Nuna na mbimbi bumbu nda na-payatangu-a la pa-patumbarungu. Na-hanggubalu la tana hi taro - rohaku-ya, dàngu nda ana haàtu-a ma-ngalangu pandula-ya.

⁸Parukangu-nanyaka pa-bokulu nuna na kamàmbi bumbu. Na nyuna ba natàka-ka la kapuka na kawaha-na, mbata-nanyaka na kaduna na ma-bokulu, tàka la pangia-na hi datumbu ba patu mbunguda da kadu ma-manyori, hau hangga - hau hanggangu-mada.

⁹Welingu la hapungu kadu tumbu-nanyaka na hapungu kadu kudu, na malua-ya la bokulu na ma-làmbatu kawaha-na hanggangu hu luru, hanggangu la pahunga lodu dàngu hanggangu la tana ma-manandangu.

¹⁰Na kadu nuna na-parukangu pa-bokulu lundu natoma hàmu na kapingatu-na la pa-kaluluku-nja da tanatara la awangu nu da kandunu, lupa ningu ba nda pirada la hongada pa-kawuka-na la tana dàngu hi nataro - rohaku-ha.

¹¹Jiapa na ngora tanatara la awangu na-jeriku-ya, na-pa-kamàndalu-ha da tanda maraku nimbihu lodu da pawotu la ngora tanatara nuna, dàngu na-panjoru-ya na uma lumungu lai nyuna.

¹²Ka pakiringu-danyaka panjala da tau lai nu dàngu nda dawotu-ahapa da tanda maraku da ngerada.[13] Tàka na lumungu ma-padeningu hi datòku-nya la tana. Mbuu ndàba da pawunda-na na kadu nuna da-hàrangu ndàba.

¹³La malamiri kurongu-ya na haàtu papalewa na-paàra-nja da anguna, “Lundu pirangu-mapa mandaina na-pangalangu-da mbuu ndàbada nida da paita la harii mata? Lundu pirangu-mapa ba nahilu-ya natanda maraku nimbihu lodu paraïna nina na njala bokulu? Lundu pirangu-mapa ba taro - rohaku-ha da tanatara awangu dàngu na ngia palumungu?” wàna.

¹⁴Kurongu-ya na haàtu na papalewa ba nahema, “Lundu 1.150 lodu-mapa. La ngalana nu da tanda maraku malingu dàngu mbaru nda pawotu ahapa. La hambeli-na nu hinaka hi pajia beliya na uma lumungu,” wàna.

¹⁵Ba talànga kanandi-nggunya keha ka kupinya na ihina na harii mata ba wànggu, hi jia ndolaku biana la hangganggu na mahama tauya.

¹⁶Kurongu talia lii mawara la hapapa Luku Ulai, “Nggambarialu, pa-habola-nyawa lai nyuna na harii mata,” wàna.

¹⁷Tàka i Nggambarialu na ma-ndolaku la hangganggu nalihi-ngga. Ka dira mangàdatu-ka hi lupa kunjoru. Napanii i Nggambarialu, “Ha tau pinu tana manda torungu lupangu bàdi upinya ba jia na rukuna na hupu njàpu rehi nina na harii màta,” wànangga.

¹⁸Ba talànga kareuku-na kumeti widi. Tàka nyuna na kitangga hi nandula-ka pa-ndolaku beli hi napanii,

¹⁹“Napa kupeka-nggaunya nggàraya napa na manjadi ruku mbenina i Ala. Nadu na harii matamu na-paloha-nya rukuna na hupu njàpu rehi.

²⁰Na mbimbi bumbu na paita-mu, na madua mbungu kaduna, na-paninu wai na-pamaü maranya na pa-maràmba Mendia dàngu Perihia.

²¹Na kamàmbi bumbu na-paninu wai na-pamaü maranya, na pa-maràmba Yunani, tàka na kadu ma-manyori la njonga matana jiaya na kawunga maràmba-na.

²²Da patu mbungu kadu da matumbu ba nambata-ka na kadu na ma-wungangu na ihina, na pa-maràmba Yunani papabi - biwangu-ya hi patu mbua pa-maràmba-ya, tàka nda haua mahama kapingatunya na pa-maràmba ma-wungangu.

²³Ba na-mareni-ka na njàpuda nuda da pa-maràmba, ba nambinu-ka na akatu-da, kawudaku-nanyaka na haàtu maràmba na ma-malihu dàngu na mamàhi pa-panyonga.

²⁴Nyuna na luaya la kapingatu halawàla, tàka nda ruku kapingatu wiki-ana. Napa na-patàkangu tàlaru ma-pa-maringgingu dàngu nggàra bia pawundana napa na-hàrangu-ma. Napa na-pamànji-ha da tau kaborangu dàngu na banjaru-na i Ala.

²⁵Ruku màhina, na-ngalangu-ma ba na-panyonga. Napa na-pangànjangu wikina, dàngu wàngu nda panii hahangu-na nadangu na tau pa-patàlaru-na. Dàngu na toru mbenimbu pa-rawaku-ya na Maràmba Hupu Ma-bokulu. Na nyuna napa pa-pamija-ya nda wàngu kapàru tau pinu tana-a.

²⁶Na harii màta rukuda da tanda maraku la malingu dàngu la mbaru na pambàda kalokangu-kau, langatàka-ma ba na-hàrangu napa. Na nyuna mbuu ndàbada nuda napa da-hàrangu la rehi mandaina na manàmu-manyapa; ba tuna àmbu ningudu ngia papanimu,” wànangga.

²⁷Tunaka nu kupàda-nya na-malijangu na ihinggu hi kuhidu nda pira mbua lodu mandaina. Hàlaka nu hadangu-nggunyaka hi ku-palaku beliha da wai ngabanggu la maràmba. Na nyuna nda nangudu-a na etinggu ba ku-pangàda-nja da harii mata nuda dàngu ba nda ku-jàngapu-ha.