Read Kambera NDANIALU 9 Bible Online

NDANIALU 9 - Kambera bible

NDANIALU 9

¹La kawunga ndaungu pareta-na la Mbambilu nyuna i Ndariu tau Mendia, na anana i Ahaweru, nyungga Ndanialu, diha-nggunya la mbuku - mbuku huri lumungu. Ku-pangàda-nya na paniina i MIRI lai Wunangu Yerimia, ba pa-daingu tanyungguru-na na paraingu Yeruhali la ngala pihu kambulu ndaungu mandaina, ba wàna.

³Ka hamaya weli etingu-nggunyaka lai MIRI Ala, dàngu hi kukarai-ya na mila etina. Nu ba talànga hamayangu-nggu kurotu wikinggu dàngu ku-kalambungu karungu hi ku-mandapu la kumburu tana.

⁴Ku pekaha mbuu ndàba da njala banjaru-nggu lai MIRI Alanggu, “Ou MIRI Ala, Nyumu ma-bokulu-kau, tàka nyuma matembi-kau. Nyumu ununjuya na njanjimu dàngu upa-itangu-ya na pa-namungu pa-lupangu-mu lai nyuda da mambuha-nggau dàngu da ma-pahàra-nja da hupu liimu.

⁵Mbàda njala-maka, mbàda wunda-maka ma-akatu, dàngu mawunda manjala. Mbàda patula ngganggangu-maka dàngu mapangga-ha da hupu liimu dàngu ma-hiliru welingu la kalaratu-mu.

⁶Nda ma-patingi-anja da wunangu, da atamu da mbàda wànya na tamumu ba da paniinja da maràmba-ma, da liku uru, da boku la mangilu-ma dàngu nggubulu-na na banjaru-ma.

⁷Ou MIRI, na pawunda-mu Nyumu na-patubangu mànuma dàngu natànji, tàka nyuma duma nua naingu-ma ma-pa-makiangu wikima, nu nyuma ma-ndàdiku la Yundia dàngu la Yeruhali dàngu mbuu ndàba na angu banjaru-ma na pambàda pa-tanyala-mu la ta - tana mamarau ma-mareni, rukuna ba nda da-tuturu lai Nyumu.

⁸Da maràmba-ma, da liku uru dàngu da boku la mangilu-ma mbàda wunda-daka pa-makia wàngu dàngu mbàda njala-daka lai Nyumu, ou MIRI.

⁹Nyumu dumu ma-jàmangu njala dàngu ma-paaïngu ju - juakau, jiapa-kai ka mbàda tumbaru-manggau Nyumu.

¹⁰Nyuma duma nda ma-patingi-anya na talia liimu, ou MIRI Alama, bau paràha-nggama paluri nunjuha da ukumu da pawua-munggama la ngaruda da wunangu, da atamu.

¹¹Nggubulu-na na Ihirailu mbàda pangga-dahaka da ukumu dàngu nda dabihu pa-patingi-nya na talia liimu. Manjala lai Nyumu, tuna nuduka hiu patidu-nggamanya na ràtungu na pambàda tulihu la Mbukuna i Muha, na atamu.

¹²Na-paàndangu na-paluangu-mu lima hama tuna na pambàda njanjimu lai nyuma dàngu da ma-kawaha-kama. Bau hukunya na Yeruhali narihi mbàringu-pa welingu la nggi paraingu bia la pinu tana yiana.

¹³Mbuu ndàbada da pa-manjurangu wàngu da pa-tulihu la Mbuku Ukuna i Muha mbàda patidu-munggama-njaka. Jiapa-kai ba tuna nu, ou MIRI Alama, pa-daingu biama-nyapa pa-tebuku-ya la pa-pambaha-ya na etimu. Daingu nda bihu-mama pa-dunjaku-nja da njalama dàngu nda mabihu-mbu paeti-wànja da pa-pekangu-mu.

¹⁴Nyumu dumu, ou MIRI Alama, mbàda hukumu-nggamaka wàngu pa-manjurangu wàngu pambàda payema hahamu; na paluangu-mu lima ma-paàndangu mànuya dàngu namola, tàka nyuma duma nda ma-patingi-anya na talia liimu.

¹⁵Ou MIRI, Alama, mbàda paita-muyaka na kawaha-mu bau iru ngàndiya na banjaru-mu paluhu welingu la Mehiru, pa-daingu-mama-nyapa pa-pangàda-nya nu na kawaha-mu. Mbàda njala-maka dàngu mbàda wunda-maka manjala.

¹⁶Mbàda kahiri-mu-nggamaka àmangu, ba tuna àmbu hili hàngga-dunyapa na Yeruhali, na parai wikimu, na tandula matua-mu.[14] Ruku njalama dàngu ruku akatu-da da boku la mangilu-ma, mbuu ndàbana na tau la winggiru-ma da-pawawa-ya na Yeruhali dàngu na banjaru-mu.

¹⁷Ou Alama, tingi-yawa na hamayangu dàngu na kamahingu-nggu. Pajia beliya na Umamu na pambàda patàlaru, pahàmu-ya ka napi ndàbanya tau ba Alakau Nyumu.

¹⁸Tingi-kamawa, ou Ala, tàngaru-kama dàngu hamata-ya na mayila-ma dàngu na ruhana na paraingu patiki wànya na tamumu. Ma-hamaya-nggau Nyumu nda rukuna na hàmu-ama, tàka rukuna ba kanjupu mila eti dumu.

¹⁹MIRI, tingi-kamawa, jàma-nggamawa, hamata-kamawa dàngu lu paluangu-wa limamu! Àmbu mangenahu-du, ka napi ndàbanya tau ba Alakau Nyumu. Nadu na Yeruhali dàngu na banjaru-mu mangumu Nyumu-maha,” wànggu.

²⁰Nutakungu-manggunya pa-hamayangu dàngu papeka njalanggu dàngu njalana na banjaru-nggu na Ihirailu, dàngu pa-kamahi-nya i MIRI Alanggu ka na pajia beliya na Uma matua-na.

²¹Ba talànga hamayangu-nggu, i Nggambarialu na pambàda itanggu la harii mata ma-mangilu, na-hawuru tubangga nyungga. La rehi nu jia-yaka na rehi ngàndina tanda maraku la malingu na tau.

²²Tàka hi na-pa-kalokangu i Nggambarialu, “Urongu Ndanialu, mainggunya pandula-kau la papinya na ihina na manyura.

²³Bau pa-kiringu-ka pa-kamahi-nya i Ala, na-wuangu pahema wànanggau. Nyuna duna na-mbuhanggau nyumu. Tuna nuduka hi kumai papanii-nggaunya na hemana. Màla, patingi pa-hamungu-wa ba ku-kaloka-ya na ihina na harii matamu.

²⁴Papihu wundangu papihu kambulu ndaungu jiaya na rehi pa-kawuku-na i Ala pa-pahàla-ya na banjaru-mu dàngu na paraingu matua-mu welingu la njala dàngu la ma-akatu. Mbuu ndàbada da njala napa pa-jàmangu-ha dàngu na mola manda kambotahu napa pa-wulaku-ya, hi lupangu na-hàrangu na harii mata dàngu na-manyura dàngu na Uma matua-na i MIRI hi hili jia beliya na ngia palumu-nya i MIRI.[15]

²⁵Tulihu-yawa dàngu pi-hàmu-nyawa yiana: Napa na-palàngangu pihu wundangu papihu mbua ndaungu, piti welingu ba paluhu-ya na pareta patura beliya na paraingu Yeruhali, lundu maina na haàtu ma-kapipi paleha-na i Ala. La ngala papihu wundangu panomu kambulu dàmbu ndaungu da ànda dàngu da tindingu la Yeruhali napa pa-pahàmu beliha. Na nyuna na rehi nuna handuka ju - juaya.

²⁶Napa la njàpuna na rehi nuna na ma-kapipi na paleha-na i Ala pa-pameti-ya, tàka làti nda nanjala-a[16] duna. Ka mai-danyaka da tanatara-na na haàtu maràmba ma-kapingatu hi na-patàlaru-ya na paraingu Yeruhali dàngu na Umana i MIRI. Nahupu njàpu rehi napa hama tuna iwa mangàndi pabera dàngu kabuya, hama tuna na pambàda, lakunda-na i Ala.

²⁷Napa na maràmba nuna na tura pa-njanjingu ma-undungu dàngu tau dangu la ngala pihu mbua ndaungu. Napa la padua-na na rehi nuna, na-papànja-nya na wotu tanda maraku dàngu hunggu maraku. Tunaka nu na Akatu ma-pakabu[17] patuya la Umana i MIRI dàngu napa na-padaingu lai nu lundu natàka-nya tàlaru na matunya lai nu na pambàda kawuku-nanya paraïna i Ala,” wàna.