Read Kambera HOHIA 1 Bible Online

HOHIA 1 - Kambera bible

HOHIA 1

¹Yiana-ya na lii langu pawua-na i MIRI lai Hohia anana i Mbaeri la rehi pareta pandàki - pandàkingu-da la pa-hanganji Yahunda, i Hanganji Uhia, Yotàmu, Ahàhu, dàngu i Hihikia, dàngu na pareta-nanya na pa-hanganji Ihirailu paraïna i Yerumbiamu anana i Yoàhu.

²La kawunga paniina i MIRI la banjaru Ihirailu ba nangaru-ngga nyungga, napanii i MIRI, “Oi Hohia, kanoma-wa haàtu ma-mbuhangu pa-pahunda, tàka da anamu napa hama tuna nyunambu. Da banjaru-nggu da hamanya nuna na-papaha-mu; nda da-tuturu-a lai Nyungga, dàngu dalaku wàrungga,” wàna.

³Tàka kanoma-dunggu-nyaka na haàtu kawini ma-tamungu Nggomiru anana i Ndibulaimu. Ba na-habola-nyaka na kawunga anama na haàtu anakeda mini,

⁴napanii i MIRI lai nyungga, “Patamu-nya Yihireyilu, na anamu ba nda namandai-apa na hukunggu-nya napa na hanganji Ihirailu rukuna ba na-pameti tau i Yiahu, na boku la mangilu-na, la Yihireyilu[1] Napa ku-pahupu-nya na pareta-da da ana umbuku-na i Yiahu.[2]

⁵Napa la rehi nu la Lolangu Yihireyilu ku-pakabu-ya na kapingatu-na na tanatara Ihirailu,” wàna.

⁶Hàlaka nu na papaha-nggu na paana-nya na anama na padua wàda, haàtu anakeda kawini-ya. Napanii-ngga i MIRI, “Oi Hohia, patamu-nya na anamu, ‘Na Panda Aï’, ba nda kuaï-ayapa napa na banjaru Ihirailu, dàngu ba nda ana jàma-anggunya.

⁷Tàka napa kunamu-ya na banjaru Yahunda. Napa Nyungga MIRI, Alada, ku-pahàla-ha nyuda, tàka nda wàngu pabera-a, nda wàngu hapanda-mbu jàka ndia pana jàka ndia njara dàngu da ma-kaliti-ha,” wàna.

⁸Ba najàma-ka na anama na padua wàda, nahili pa-anakedangu na papaha-nggu hi na-habola-nya na haàtu anakeda mini.

⁹Napanii-ngga i MIRI, “Patamu-nya na anamu, ‘Nda Banjaru-anggunya’, nadu ba nda banjaru-anggunya na banjaru Ihirailu, dàngu nda Ala-adangga Nyungga,” wàna.

¹⁰Napa na banjaru Ihirailu hama dangu wara la tehiku hi lupa nda peku pa-takaru jàka ndia padiha-ya. Nàhu napanii-nja nyuda i Ala, “Nyimi nda banjaru-anggunggai”, na nyuna napa natoma na rehina ba napanii-nja, “Nyungga jiaka Ala maluri tàka nyimi ana-nggunggai!” ba wàna.

¹¹Napa pa-pambulungu beli-haka da banjaru Yahunda dàngu banjaru Ihirailu. Napa dawotu haàtu liku uruda, dàngu napa da pa-bonjangu hi dahili mbokaru beli la tanada. Langatàka, na Lodu Yihireyilu[3] napa nanjadi-ya lodu mbabu ma-bokulu!