Read Kambera HOHIA 10 Bible Online

HOHIA 10 - Kambera bible

HOHIA 10

¹Na Ihirailu hama tuna pingi angguru ma-ràjingu wua-nanya. Hama huka bonjangu-da da pawulu-na, hama huka danguda da ngia pa-maraku pa-pandoi-na. Hama huka mbokaru-na hama huka manandangu-mbuda na-pandoi-naha da andu marapu palumu-na.

²Da tau ma-kaputingu etida nuda, lupangu-ma nàhu daita-ya na injana rukuda da-njalada. Napa i Ala na-pakabu-ha da ngia pa-maraku-da, dàngu na-nyungguru-ha da andu marapu-da.

³Nda namandai-apa napa ba dapanii, “Nda ningua hanganji-nda ba nda ta-mangàdatu-nya i MIRI. Nggàra linguna na haàtu hanganji lai nyuta?” wàda.

⁴Dapanii abungu dàngu dapeka njanji kabàli dàngu datura pa-njanjingu manda lingu. Da-kabeli puhaya na uku hi lupa natumbu na nda tànji, hama tuna rumba maüku la woka pambàda kangaburu.

⁵Napa na-mangàdatu na mangia-nya na parai Hamaria; napa nyuda dàngu da ratu malumu-nya nuna na hapi àmahu rara la Mbetilu[17] da-hawina dàngu dahii rukuna ba mbàda munangu-naka mbuu ndàba na mangarangu-na na marapu-da nyuda.

⁶Napa pangàndi la Ahuru-ya nuna na marapu ka wuanya na hanganji bokulu. Na Ihirailu nakiku-nya na pa-pakakangu na ma-pawiti-nya hi da-makia dàngu hi pawawa-ha.

⁷Napa nakabu na Hamaria dàngu hi laku ngàndiya na hanganji-da hama tuna ha-kadipu ai pa-pamili wai.

⁸Pa-pakabu-ha napa da u - uma marapu la Mbetilu[18] na ngia pa-lumungu-na marapu na tau Ihirailu. Napa natumbu-nja rii madàka dàngu rumba da ngia pa-maraku-da. Hàla hi dawara-nja da palindi, “Pa-nggàbalu-nggama!” wàda, tàka da tandula, “Kambitaku-kàma!” wàda.

⁹Napanii i MIRI, “Piti welingu na manjadi la Nggimbia, ndedima na-pànjangu pawunda manjala la panduba-ka Nyungga na tau Ihirailu. Jia ba tuna la Nggimbia[19]-mbuya napa natàka ninja pabera nyuda.

¹⁰Napa Nyungga ku-kaluluku-nja dàngu kuhuku-nja nuda da tau mawunda njala. Napa da-pambulungu da banjaru pa-ndubaku-ha nyuda, dàngu pa-hukungu-ha napa ruku njalada da madangu.

¹¹Àmangu na Ihirailu hama kamboka hapi pa-pandàmangu pa-hàmungu-ya dàngu na ma-mbuhangu pa-ruruhu ai pawari puruhu wàngu uhu nggàndumu. Nda kujàra-a pa-pakàna-nya buku la kahuki-na na ma-manandangu. Tàka nàhu mbàda bota-nggunyaka la pahàni-ya paràma mambotu. Na Yahunda ku-paràha-nya paluku, tàka na Ihirailu ku-paràha-nya panggari.

¹²Kupanii, ‘Ha Ihirailu! Pokawa woka bidi nduma wikimu, hàbaru-nyawa wini mola, dàngu mutiwa kanyuru na ihina nambuha weli eti-mungga Nyungga. Nadu, ba rehi-nanyaka nahimbu-mungga Nyungga MIRI-mu. Napa kumai dàngu hi ku-paliri-nggauha da kanyuru-nggu hama puru urangu,’ wàna.

¹³Tàka hauyai na pawunda-mu nyumu; uhàbarungu wini akatu, dàngu umuti manda mola. Mbàda ngaa-munjaka da wuana na ruku kambàliku-mu,” wàna. Nahili panii i MIRI, “Ha dimi banjaru Ihirailu, ruku bai monunja da kareta pabera-mi dàngu na danguda da panjuri-mi,

¹⁴napa natàka-nya pabera na rayatu-mi, dàngu mbuu ndàba da ngia pa-torungu-mi pa-pakabu-ha. Na ngerana hama tuna, la lodu pa-tàlaru-nanya na Mbetu-Àrambilu la pa-hànjalungu dàngu ba na-kapidihu-ha da ina pa-kariangu anada paraïna i Hanganji Hàlamàngu.

¹⁵Nuna-duyaka napa na matàka-nggai nyimi, ha dimi ma-ngiangu la Mbetilu, ba mbàda wunda-mika akatu ma-bokulu. Ba na-pakiringu-kika na pa-hànjalungu la pabarahu, napa nameti na hanganji-mi,” wàna.