Read Kambera HOHIA 11 Bible Online

HOHIA 11 - Kambera bible

HOHIA 11

¹Napanii i MIRI, “Kumbuha-nya na Ihirailu piti welingu ba anakeda-mayapa, kupaau-nya nuna na ananggu paluhu welingu la Mehiru.

²Na nyuna ba hama huka paau-nggunya nuna na ananggu hama huka halairi-nangga Nyungga. Nangàndi kameti maraku dàngu na tunu dupa nduma Mbaàlu dàngu da marapu hawiangu.

³Tàka ba Nyungga pàku làti ma-papeka-nya papangga na Ihirailu, dàngu marohu-ya wàngu mbuha namu-nggunya. Nyunggama ma-kabida-nya nyuna tàka nyuna nda napajia-aya.

⁴Wàngu mbuu ndàba na mbuha namu-nggunya, ku-padoputu-nya lai Nyungga. Mbuu ndàbada da mayila-na ku-pahalela-ha, dàngu wàngu màjangu eti ba kuwua-nya pangangu.[20]

⁵Nuda da tau Ihirailu nda dabihu-a pabeli lai Nyungga, jia ba tuna lupangu da-belika bàdi la Mehiru, dàngu ka na-pareta-ha banjaru Ahuru.

⁶Lundu la parai - paraingu-da ba na-kanggihaku napa-hànjalungu, napa pa-weharu-ha da pindu bokulu, hi pa-tàlaru-ya na banjaru-nggu. Nu hi natumbu, rukuda ba da-kikungu pambuha wikida,

⁷dàngu ba da-patidungu pa-dunjaku-ngga Nyungga. Napa pa-kapidihu-ha, tàka nda ningua ma-pahàla-ha jiapa-kai da-kaladaku pakarai pandulangu,” wàna.

⁸Napanii i MIRI, “Ha Ihirailu, nda jia màta-anggunggau jàka ndia nda jia dunjaku-anggunggau. Jia pamolu-nggunggauka hama tuna la Àtama? Jàka ndia ku-palua-nggau lima hama tuna la Hamboingu?[21] Nda na-torungu-a na etinggu pawunda-ya nuna, ba lalu tanjiku-mana na mbuhanggunggau nyumu!

⁹Nda kuhuku-anggau nyumu la hàngganggu; nda ku-pakabu-akaupa. Nadu ba Alaka, nda tau-aka Nyungga. Nyungga, na Ma-matua, ma-karia mànunggau, dàngu nda kuhàngga-anggaupa,” wàna.

¹⁰Napanii i MIRI, “Napa na kikungga na banjaru-nggu jàka ku-kangaüku hama tuna hinga dàngu jàka ku-pa-kandàndaku-ha da muhuda nyuda. Na banjaru-nggu na-manyamalu pamai lai Nyungga welingu la patama lodu la pa-marubuku-ngga nyungga.

¹¹Welingu la Mehiru da mai pa-renggangu hama tuna ma-hawurungu, dàngu welingu la Ahuru hama tuna kabàba kulundiha. Hàla hi kukaria belinja la umada. Nyungga yia, MIRI, mapanii,” wàna.