Read Kambera HOHIA 12 Bible Online

HOHIA 12 - Kambera bible

HOHIA 12

¹Napanii i MIRI, “Na banjaru Ihirailu na-winggiru wàngga kambàliku dàngu kaputingu; na banjaru Yahunda pa-daingu ndubaku-nangga Nyungga, Ala Ma-matua dàngu ma-tuturu.

²Mbuu ndàba-naka na pawunda tau Ihirailu weli mbarungu lundu rudungu nda ningua linguna dàngu pa-tàlaru wànguya hama tuna ngilu timiru. Na-palapingu dàngu na mbana eti na-bonjangu lai nyuda. Datura panjanji - panjanjingu dàngu na Ahuru, dàngu dangàndi lonahu la Mehiru ka tandana na pa-ariyaangu,” wàna.

³Ningu palakara-na dàngu na banjaru Yahunda i MIRI; napa nahuku-mbunya na Ihirailu rukuna na huri lurida nyuda. Napa na-palimba-nya na pawunda-da.

⁴Piti welingu la kambu, i Yakupu na boku la mangilu-da ba mbàda janggilu-nanyaka i Ehaü na angu nduana; tàka ba namatua-ka, i Yakupu na-paudulu-danya i Ala.

⁵Na-paudulu dànya na haàtu papalewa, hi natalu. Hàla hi nahii hi nakarai ka pa-kanyuru-nya. La malamiri namai i Ala la Mbetilu lai Yakupu na boku la mangilu-nda hi napanii dànya.

⁶I Ala jiaya i MIRI Hupu Mambiha. MIRI-ya na tamuna. Na-mbuhangu ka wànya na tamu nuna-duka ba nalumu-nya tau.

⁷Jia ba tuna ha dimi wàlana i Yakupu, waiyawa na Alami dàngu beliwa lai Nyuna. Luri paundu-nya na mbuhangu dàngu na-patutungu, dàngu nedi mànungu-wa lundu na-paluangu limana na Alami.

⁸I MIRI napanii-nya na banjaru Ihirailu, “Ipalapingu nyimi hama tuna na tau Kanaàngu; da mini danggangu-mi da kàli lapiha da tau da-makàli kei danggangu lai nyuda wàngu timbangu manda pa-deningu.

⁹‘Wulu ndanyaka nàhu,’ wàda. ‘Ta-ngalangu utu! Nda haàtu-a ma-ngalangu pa-panjala-ta ba wàngu nda pa-tutungu, nangala-ndanja da pawulu wàngu,’ wàda.

¹⁰Na nyuna napa Nyungga MIRI Alami, mambàda luhu karia-nggai welingu la Mehiru, napa kuwunda-ya kai hili ngiangu la uma - uma tera hama tuna la handàka-na ba kumai la maràda telangu lai nyimi.

¹¹Mbàda panii-nggunjaka da wunangu, dàngu kuwua padaanja nyuda harii mata. La ngaruda nyuda kupeka-ha da pa-pakaka hahanggu ndumami nyimi, banjaru-nggu,

¹²jiapa-kai ba tuna nu ningu biapa ma-lumungu marapu la Nggiliatu, dàngu nawotu tanda maraku hapi la ngia pawotu maraku la Ngginggalu. Na nyuna napa dameti nu da ma-lumunya nuna na marapu tàka da ngia pamara - ngia pa-maraku la Ngginggalu napa danjadi pabundu watu la wo - woka,” wàna.

¹³I Yakupu na boku la mangilu-nda napalai la Mahupatamia hàla ka ngalangu wàngu papaha ba wàna, na-paatangu wikina la tau lai nu dàngu napawa-nja da mbimbina na tau nuna.

¹⁴I MIRI na-palewa haàtu wunangu pa-pahàla-ya na tau Ihirailu welingu la ata la Mehiru dàngu la pamangga-nja nyuda.

¹⁵Mbàda pawiti-danyaka na pambeni wàna i MIRI paraï da tau Ihirailu; ràka-mana ka hukunja rukuna na akatu-da. Napa i MIRI nahuku-nja, rukuna ba mbàda pawiti-danyaka hi na paaka-nya tau Nyuna.