Read Kambera HOHIA 4 Bible Online

HOHIA 4 - Kambera bible

HOHIA 4

¹Ningu pa-palakara wàngu welingu lai MIRI hanggangu la mangia-nya yiana na tana. Oi Ihirailu, patingi-nya jàka nggàraya na papanii-na, “Nda ningua tuturu jàka ndia nda ningu-a mbuhangu la tana yiana, tàka na mangia-nya nda da-pajia-aya ba Alaka Nyungga.

²Da-harangu, tàka nda da-pahàra-nya;[8] da-kambàliku, da-pameti tau, da-manganga, dàngu da-njuraku. Na akatu na-bonjangu, dàngu na pameti tau na-pandutu - pandutungu.

³Jia ba tuna napa namàdu yiana na tana, dàngu mbuu ndàbana na maluri lai nu napa dameti. Mbuu ndàba da ngara banda la lumbu awangu, la mara dàngu la tehiku napa da-tàlaru,” wàna.

⁴Napanii i MIRI, “Ha dimi ratu ba hapajia-kai, àmbu ningudu ma-panjala-ya jàka ndia mambeni-nya na banjaru-nggu, nadu ba nyimi pa-panjala-nggu!

⁵Lodu rudungu bai wunda manjala, hamangui ba hapajia-ha da wunangu. Jia ba tuna napa ku-patàlaru-ya na Ihirailu, na inami.

⁶Nyimi, hapajia-kai ratu, ndai wàrihu-aka Nyungga, hi nda na-wàrihu-mbuka banjaru-nggu hi lupa da hanggàmaru. Itebuku-ha da papekangu-nggu. Ba tuna, napa Nyungga ku-tebuku-mbukai nyimi, tàka da anami nda kupajia-aha ba ràtu-ngguha.

⁷Hama huka bonjangu-mi padangu, hama huka njala-mbumi lai Nyungga, ha dimi ratu! Jia ba tuna napa ku-panjilu-nya na ngerami: Napa nda patembi-akaipa, tàka pa-pawawa-kai.

⁸Hi wulu nyimi rukuda danjala-na na banjaru-nggu, tuna nuduka hi irinjungu ka da-nutakungu panjala.

⁹Napa nyimi imayila hama tuna na rayatu! Napa kuhuku-nggai nyimi tuda limbada da pawunda-mi.

¹⁰Napa ingangu la kameti maraku pawotu, tàka pa-daingu manjuu biami. Napa ilumunja da marapu woru tàka pa-daingu biana ba nda na-bonjangu danguna na tau, nadu ba mbàda dunjaku-minggaka Nyungga la pa-lumungu marapu - marapu,” wàna.

¹¹Napanii i MIRI, “Ha dimi banjaru-nggu, da angguru da mamandai hamangui da mabidi da-pamuna-nya na màkami pa-kanandi pa-hàmungu.

¹²Ikarai ka na-paita-nggai ngerangu na ha-kadipu ai! Na hapungu tokungu napeka-nggainya jàka nggàraya na parinju-mi la papinya! Hama tuna haàtu kawini ma-pahunda-kai; mbàda dunjaku-minggika Nyungga, tàka hii pa-jàmangu wikimi la marapu - marapu.

¹³La ngia palumu - ngia pa-lumungu la pi - pinu tandula dàngu palindi iwotu kameti maraku, dàngu itunu dupa la lumbuda da ai bokulu ma-marumbingu lai nu ba na-pamaü-du. Tàka nggàra-yaka na wundami? Da ana karia-mi danjadi kawini pahunda dàngu da rii anami danjadi kawini njuraku!

¹⁴Na nyuna nda kuhuku-anja napa rukuna na pawunda nuna, nadu nyimi wiki bai luadu la kawini pahunda da maràma la uma - uma marapu,[9] dàngu anguda nyuda iwotu kameti maraku la marapu. Na-padeningu langatàka-ma na lawiti yiana: ‘Na banjaru na manda pinya na rukuna i Ala napa na-hadànjalu,’ ba wàna.

¹⁵Ha dimi tau Ihirailu, ndai tuturu-a nyimi lai Nyungga! Màla àruki ka àmbu nawunda njala ma-hamangu na Yahunda! Àmbu na-lumungu la Ngginggalu jàka ndia la Mbetilu.[10] Àmbu na-harangu lai nu wànya na tamuna i MIRI maluri.

¹⁶Nyimi dimi, ha tau Ihirailu, kanjupu tongguru etikai! Nggiki hama pawa-nggunggai nyimi, hama tuna mbimbi la maràda rumba?” wàna.

¹⁷Mbàda iru-ngàndi-nanyaka marapu na banjaru Ihirailu. Jia ba tuna nu màta bia-njawa nyuda.

¹⁸Jàka da-maüku-ka ba daunu padangu angguru, pahunda mbàha eti-danyaka. Darihi mbuhangu ka pawawa-ha welingu ba tembiha.

¹⁹Jia ba tuna napa da-molungu hama tuna pa-hapuputu ngilu. Napa da-makia rukuda da kameti maraku pawotu-da la marapu - marapu.