Read Kambera HOHIA 5 Bible Online

HOHIA 5 - Kambera bible

HOHIA 5

¹Napanii i MIRI, “Ronguwa, ha dimi ratu ba hapajia-kai. Eti wànyawa ha dimi tau Ihirailu! Ronguwa, ha dimi ana umbuku hanganji! Mbàda rata-yaka na hukungu-mi. Nadu ba lupangu-ma wàngu mamola làti bai patandangu ngera, tàka nda timi nua maa ba mbàda njàdi-mika hama tuna oka kahili la Mihipa, hama tuna hiru la Palindi Tamburu,

²dàngu hama tuna lambongu manjolungu la parai Hitimu. Jia ba tuna napa kuhuku ndàbanggai nyimi!

³Kupi ndàba-manya na rukumu nyumu ha Ihirailu! Nda peku winingu-amu ngga - nggàra welingu lai Nyungga. Nyumu ulumungu marapu dàngu ndau tuturu-apa lai Nyungga. Jia ba tuna da taumu nda ràka-àda ka dalumu-ngga Nyungga,” wàna.

⁴Na akatu pawunda-da da tau Ihirailu na-pawiti-nya hi nda peku belida la Alada. Mbàda jorutu-nahaka ngera lumungu marapu, hi nda da-wàrihu-ayapa i MIRI.

⁵Na abungu-na na banjaru Ihirailu paita lohangu-ya, dàngu nanjadi mbuti njalada. Na panjala-da na pawiti-nya na tunjuru-da hi danjoru, tàka na banjaru Yahunda danjoru karia-nja nyuda.

⁶Dalua pahimbu-ya i MIRI ba dàngu ngàndida mbimbi dàngu hapi ka kameti maraku-ha, na nyuna nda ningua linguda nuda mbuu ndàbada. Nadu ba mbàda dunjaku-nanjaka paraïna i MIRI, tàka hi nda peku jàngapu-adanya Nyuna.

⁷Nda da-tuturu-a nyuda lai MIRI; da anada nda anada nyuda-aha. Jia ba tuna nda namandai-apa napa na-patàlaru karia-nja dàngu da wokada.

⁸Hapiwa taropitu la Nggimbia! Palingu-wa tanda dundangu la Rama ka pa-hànjalungu! Pawungu-wa wara pabera la Mbetilu![11] Ha dimi tau Mbanyamingu, laku hanggangu-wa pa-pahànjalungu!

⁹Napa na-tàlaru na Ihirailu, ba toma-nanyaka na lodu hukungu-na nyuna. Ronguwa, ha dimi rayatu Ihirailu, jianguma napa na-hàrangu nuna.

¹⁰Napanii i MIRI, “Kumbeni Nyungga rukuna ba mbàda nàhaku-danyaka na Ihirailu paraï da liku uru - liku uru Yahunda hi dawàhi-ya na tanana. Rukuna nuna napa ku-hanubuku-nya nahuku-nggunya hama tuna iwa.

¹¹Pa-kapidihu-ya na Ihirailu; na-àlingu-ka na ngaba-nanya na tana, rukuna ba na-patidungu pakarai pa-ndulangu la manda peku làti pandula-ya nyuna.

¹²Nuna duyaka na ma-pawitungu hi ku-pakabu-ya napa na banjaru Ihirailu, dàngu hi ku-patàlaru-ha da tau Yahunda.

¹³Na banjaru Ihirailu dàngu na banjaru Yahunda dapinya na kalutu-da, hi nalua la Ahuru na Ihirailu pakarai pa-ndulangu welingu la hanganji bokulu. Tàka nda peku pa-ndulangu-ana na hanganji nuna jàka ndia nda peku pahàmu-ananya na ngerada.

¹⁴Hama tuna hinga ma-pa-kalulukungu tuna nu-màka napa ba ku-kaluluku-nja da tau Ihirailu dàngu Yahunda. Nyungga wikima napa maba - bàriku-ha nyuda, hi ku-dunjaku-nja. Jàka ku-ruruhu ngàndi-haka, nda haàtu-a ma-ngalangu pa-pahàla-ha.

¹⁵Nàhu ku-dunjaku-nya na banjaru-nggu hi lupa natoma na mayila-da rukuda da njalada, hi damai pahimbu-ka Nyungga. Talànga wanguna la mayila-da, da-pamukarungu la pa-jàngapu-ka Nyungga,” wàna.