Read Kambera HOHIA 6 Bible Online

HOHIA 6 - Kambera bible

HOHIA 6

¹Dapanii da tau Ihirailu, “Màlawa ka tabeli lai MIRI. Nyuna na ma-pakatiu-ta tàka Nyunamai na ma-pahàmu-ta. Nyuna na ma-pamanua-ta, tàka Nyunamai na ma-kamburu-nja napa da manua-nda.

²La dàmbu tailu mbua lodu-kika napa na-pahàmu-ta nyuta, hi taluri la opangu-na.

³Jia ba tuna màlawa ka ta-pamukaru weli etingu, la patanda-ya i MIRI. Jianguma napa namai lai nyuta hama tuna namaina na pabarahu, dàngu hama tuna na urangu na ma-pambaha-ya na pinu tana la hupu ndau urangu,” wàna.

⁴Na nyuna napanii i MIRI, “Ha dimi Ihirailu dàngu Yahunda! Nggiki-nggunggaika bàdi nyimi? Nambuha-mingga Nyungga narengga mau hama tuna hambongu jàka ndia wai hamburungu la lodu mbaru.

⁵Tuna nuduka hi ku-palewa-ha da wunangu-nggu pa-patàka-nggainya na botangu-nggu ba lupangu-ma pahuku dàngu pa-patàlaru-kai. Na parinju-nggu welingu lai yimi mbàda habukaru dàngu mbàda lohangu-naka:

⁶Kurihi rinju-nyapa kai tandaka dàngu kai mbuha mànungga Nyungga, welingu la tunumi dàngu wotumi kameti maraku lai Nyungga.

⁷Tàka hama tuna lai Andamu,[12] ihinggilu-nya na pa-njanjingu-mi dàngu Nyungga.

⁸Na Nggiliatu jiaya na paraingu mambinu wàngu tau ma-akatu dàngu ma-pameti tau.

⁹Da ratu la paraingu nuna hama tuna ha-kanguhuru tau rambangu-ha da mahapa tau ma-hanàhu-na. Jiapa la ànda ma-hanggangu la pangia matua la Hikimu dawunda-mbuya na pameti tau! Mbuu ndàba da ma-akatu nuda harawuku-mada pawunda-ha.

¹⁰La Ihirailu ku-itangu ngga - nggàra pa-mayilangu: na-pairaku wikina na banjaru-nggu wàngu lumungu marapu.

¹¹Na ngerami nyimi dimi, ha tau Yahunda, mbàda kawuku-nggunyaka na rehina la pahuku-nggai nyimimbu rukuda da pawunda-mi,” wàna.