Read Kambera HOHIA 9 Bible Online

HOHIA 9 - Kambera bible

HOHIA 9

¹Ha dimi banjaru Ihirailu, àmbi mbabu-dunjapa da lodu - lodu bokulu-mi hama tuna na banjaru hawiangu. Mbàda dunjaku-minyaka na Alami dàngu ndai tuturu-a lai Nyuna. La nimbihu ngia pawari puruhu uhu nggàndumu,[14] idanggangu wikimi la Marapu Mbaàlu la pa-pahunda dàngu imbuhangu payema uhu nggàndumu bai kakaya ba wunda-minya welingu la marapu nuna!

²Tàka nda namandai-apa ba danjàpu-nggai uhu nggàndumu dàngu mina haitungu dàngu danjàpu-mbu napa da angguru.

³Napa nyimi, ha banjaru Ihirailu ndai ndàdiku pa-daingu-a la tana pawua-nanggai nyimi i MIRI. Lupangu-ma ibeli la Mehiru, dàngu lupangu-ma ingangu pangangu manda hida[15] la Ahuru.

⁴La tana nuda ndai ngalangu-a pawotu tanda maraku angguru dàngu kameti maraku banda la pa-pahàmu-ya na etina i MIRI. Na pangangu-mi na-pairaku-ya nimbihu-na na tau na manganya, hama tuna pangangu da-pangangu la lii taningu. Nalingu-na nuna na pangangu mbulungu ka pambihu-ya na kambu-ma-ami; nda ana hakudu-a pangàndi la Umana i MIRI ka wotuha maraku lai nu.

⁵La lo - lodu bokulu huri lumungu ndai ngalangu-a pawunda ngga - nggàra ka mbabunya.

⁶Jàka natàka-ka na tàparu, dàngu ba pangàndi-kaika la hili hau tana, napa da ma-kanjepi welingu lai nyimi na-pauhi-nja paraï da tau Mehiru ka pameti-ha hi taninja la Mepihu! Napa natumbu-nja rii madàka dàngu rumba hi na-kawuhuku-ha da watu umami dàngu da kanaingu àmahu barami da ma-pawilingu.

⁷Toma-nanyaka na rehi hukungu, na rehi ngalangu limbana mbuu ndàba na pawunda. Pàda-nanyaka napa na Ihirailu! Mipanii, “Manduba-ya na wunangu yiana na pa-runuku ngahu! Katoba-nanya!” wàmi. Hi panii timi nu rukuna ba kanjupu karaü-mingga eti dàngu ba lalu bokulu-ha da njalami.

⁸Na-palewa-ka i Ala ka wunangu-ka pa-panamu-nggai nyimi banjaru-na, na nyuna la nggi biaka kulaku ningu, pa-mukarungu-maminya pahiru-ka nyungga hama tuna na ma-hawurungu. La tana mangu wikina i Ala, na muhu-nggama rayatu nyuma wunangu.

⁹Kanjupu akatu-ya na pawunda-mi hama tuna na pawunda tau la Nggimbia.[16] Napa na-pangàda-nja da njalami i Ala, hi nahuku-nggai rukuda da njalami.

¹⁰Napanii i MIRI, “La kawunga hunggu-nggunya na Ihirailu, kanjupu hawola-ka hama tuna tau mahunggu wua angguru la maràda telangu. La kawunga ita-ngguha da boku la mangilu-mi kumbaha eti hama tuna tau ma-itangu kawunga wua kapilitu. Tàka, ba dalua-ka la Palindi Piuru, pa-kiringu-danyaka palumu-nya na Mbaàlu, hi lupa da-iraku hama tuna nuna na marapu pambuha-da.

¹¹Na bokulu-na na Ihirailu napa na-hawurungu hi na munangu hama tuna ma-hawurungu; nda jia ningua maworu ihina, dàngu nda ningua anarara pa-habolangu.

¹²Tàka jàka ningukai anakeda madedi dàngu pa-pamatua napa kupiti-ha nyuda; nda haàtu-a pa-pahia-nggu paluri. Nai-a-ai nyimi, banjaru Ihirailu jàka ku-dunjaku-nggai!” wàna.

¹³MIRI, kuita-ha da anada ba ya - yauluha hi pameti-ha.

¹⁴Nggàraka bàdi pakarai-nggu lai Nyumu ndumada da tau nuda? Panjadi-ha kawini mbuta da tau kawini-da! Wunda-nyawa, ka àmbu peku pahuhu-daha da anada!

¹⁵Napanii i MIRI, “Mbuu ndàba na akatu-da nyuda na-pakirungu la Ngginggalu. Lai nuduka ba ku-pakiringu pa-karaü-nja eti. Ruku na pawunda-da na ma-akatu, napa kuwàngga-ha welingu la tananggu yiana. Nda kuhili mbuha-ànjapa nyuda; mbuu ndàba da liku uruda mbàda ndubaku-danggaka Nyungga.

¹⁶Da tau Ihirailu napa kuhuku-nja. Nyuda hama tuna pingi ai manda wuaya, dàngu mambàda meti amu-nanya. Nda jia ningua anada; tàka jàka ningukai anada, napa ku-pameti-ha nuda da ana pambuha-da,” wàna.

¹⁷Napa i Ala na palumu-nggu na-tebuku-ya na banjaru-na, rukuna ba nda-dambuhangu pa-patingi-nya Nyuna. Napa da-lindingu la honga ba - banjaru.