Read Kambera YOILU 1 Bible Online

YOILU 1 - Kambera bible

YOILU 1

¹Yiana-yaka na lii languna i MIRI lai Yoilu anana i Patuilu.

²Patingingu ha dimi ama bokulu; eti wànguwa dimi ha mbutami tau la Yahunda. Mbàda ninguka mahama tuna yiana la rehimi, jàka ndia la rehida da bokumi la mangilu?

³Peka-njawa nuna na matumbu da anami; ka da-palundu-nya la anada na rukuna nuna. Ka darongu-mbuya ana ha-ndalaru ma-pandutungu, ka dapakei-nya la hili ana umbuku.

⁴Da kabàba kabala da panda taü danguda, da-rànjaku la wo - woka hi da-pambuta-ha da ihida. Jàka nggàraha da pahili-na na hau kabàba, na-pambuta-ha paraï kabàba ma-pandutungu.

⁵Hadangu-wa ha dimi makàli maüku! Dàngu hiiwa dimi makàli unungu! Nadu da angguru mabidi pambàda wàhi-haka welingu la ngarumi.

⁶Da kabàba kabala da-kaluluku-nya na tananda; da-kapingatu dàngu nda pataü-ha danguda, da ngànduda hama dàka ngàndu bai hingaha.

⁷Da pingi angguru-nda da-pamànji-ha, da pingi kapilitu-nda jiaha da pola-adaka. Da binuha da polada, hi lupa da bara da karàngga-da.

⁸Mihiiwa ha banjaru, hama ana karia ma-handuka na mahiinya na metina na matanggu-nya na pambuha-na.

⁹Da uhu nggàndumu dàngu da angguru da-payilangu-ka welingu la Umana i MIRI. Ka hawina-danyaka da ratu, da ma-tuturu palumu-nya i MIRI.

¹⁰Da woka damija-ka nàhu. Na tana na ringu langu dàngu na handuka; nadu ba dambuta ba damànji da uhu nggàndumu, da pingi angguru nda da tuu wuada, da mina haitungu danjàpu-ka.

¹¹Ha ma-raïngu, mi-padudurungu-wa! Ha madai woka angguru, mihiiwa! Nadu da uhu nggàndumu dàngu da kamànggihu dambuta nda ningu kaweida, dàngu mbuu ndàba da ihi woka damau.

¹²Da pingi wua ai la maràda da-marokutu ndàba: da pingi angguru, àpilu, kapilitu, kuruma dàngu njalima. Hi nda na-hawola-apa na rayatu.

¹³Ha dimi ratu ma-lumungu la ngia pawotu maraku, kalambungu-wa karungu dàngu hiiwa. Tamawa la Umana i MIRI kai hii kanjupu-ya na rudungu, nadu ba nda ningu tanda maraku angguru dàngu uhu nggàndumu nduma na Alamu.

¹⁴Wua-nyawa pareta na banjaru-mi, ka na-puaha, pakada-nya na pulu pamba bata bokulu! Dunda-nyawa na liku uru dàngu da ama bokulu dàngu nggubulu-na na ma-ngiangu la Yahunda, ka damai la Umana i MIRI Ala, pa-hamayangu dàngu pawara karai pa-ndulangu-na Nyuna.

¹⁵Na Loduna i MIRI mareni-nanyaka, na lodu pa-maringgingu; na rehi pa-tàkangu-na kabu i Hupu Mambiha.

¹⁶Ba da-tàlaru pa-mbutangu da pangangu-nda la hangga matanda, la Uma Alanda nda ningu-apa kayaka hawola.

¹⁷Da wini dameti la tana màdu marokutu. Nda ningu-apa uhu nggàndumu ka pahàmu, da dàndaku da-kalukutu da-tanyànggaru.

¹⁸Da banda mopu da-kangua mbota monungu; nda ningu-apa maràda rumba ndumada. Da kabàba mbimbimbu da-kariku.

¹⁹Lai Nyumu, ou MIRI kukarai pa-ndulangu nadu da maràda rumba damàdu marokutu, da pingi ai damàdu hi dameti da-kàrangu beri ruku epiha.

²⁰Jiapa da banda bohu la omangu dawara-nggau Nyumu pakarai pa-ndulangu. Nda da-ngalangu-a nyuda papàda-ya na madauda, nadu damàdu ndàba da luku.