Read Kambera YOILU 2 Bible Online

YOILU 2 - Kambera bible

YOILU 2

¹Hapuiwa taropitu, palingu tanda hanggàmaru la tandula Hiungu, ma-matua ngia pangiangu-na i Ala. Kandàndaku-wa, ha mangia-nya la Yahunda! Nadu ba lu tàka-nanya na Loduna i MIRI.

²Na Lodu nuna na-kapàtangu kanjidingu, nambinu-nya hambongu ma-lamaru. Danjungu da kabàba kabala hama karumangu ma-panggàbalungu la palindi. Na matuna nu ndedima nanjadi, dàngu lundu nu - nu nda nahili pa-nduangu-apa.

³Hama tuna epi ma-pakehi dàngu ma-pakàrangu ba da-pamànji-ha da ngara da pa-tondungu-ka. Ba ndedipa, nuna na tana hamana la Endingu, na wokana i MIRI, tàka la hambeli-na nu, hama maràda wara manda nggàra matumbu-nya. Nda ana nggàrama marihi, nda ninguma ma-hinggilu welingu la pa-kalulukungu-da.

⁴Na hadada hama njaraha; hama njara pabera-ha na palaida.

⁵Ba punduhu - punduhu-da la pinu palindi, nalingu-da hama kanggeriku kareta pabera-ha dàngu hama kapàraku epi matunu kuwangu-ha. Da-pajurungu hama tuna ha-pajuru ma-kaborangu-ha, da ma-hawaritu pa-ndàharungu la ngia pa-panàhaku.

⁶Ba danjungu-ka, na-kandàndaku ndàba na tau, mbuu ndàbana da-tawàla bara dàngu da-làmangu da matada.

⁷Hama tuna ma-kaborangu ba da-kaluluku, dàngu da hei la kangeli hama tuna mini mbeni hanggangu. Da-tàrihu ba da-pajuru hanggangu, nda da-hiliru jàka ndia nda dawihu-aya na katiku halaku-da.

⁸Nda dapada - dàhiku-a, la ànda nduma wiki-mada duda ba dalaku. Handàka tarànjaku-da ba da-bàriku ngia pa-torungu, nda pa-ngalangu-a papàtu-ya na pa-jurungu-da.

⁹Danjungu la paraingu, hi dapalai la pinu kangeli-na. Daheiha hu daa la uma - uma; hama tuna ma-manganga-ha ba dali ningu la katonga.

¹⁰Ba dalaku hanggangu na-tandidu na tana, dàngu dira kanggauhaku-ya na awangu. Na mata lodu dàngu na wulangu da-kapàta wuruyila, dàngu da kandunu nda da-handaraku-apa.

¹¹Ndu - nduruna na talia liina i MIRI, ba na-wuangu lii pa-irungu, la kanguhuru pabera-na. Kanjupu danguha da tanatara-na! Kanjupu kapingatu-ha da tanatara da ma-pahàra-nya na pareta-na! Kanjupu pa-mangàdatungu dàngu ma-wirungu-ya na Loduna i MIRI! Nda haàtu-a ma-ngalangu pa-padàdungu.

¹²Napanii i MIRI, “Na nyuna nàhu, beli weli etingu-wa lai Nyungga, pa-kariangu puaha hii dàngu hawina.

¹³Bàriku-ya na etimu, àmbu jia niha da paki-ami,” wàna. Pambeli belingu-wa la MIRI Alami. Nyuna na-panamungu dàngu ma-paaïngu-ya. Nyuna na-lerangu etina dàngu kanjupu mila etiya, na-mbuhangu pa-jàmangu njala dàngu nda na-mbuhangu pawunda-ya na hukungu.

¹⁴Raï-aiduna i MIRI Alamu na-panjilu-nya, na bàndukungu-na, hi na-pabundu lànda-nggai kanyuru-na. Tàka hi peku wotumi tanda maraku angguru dàngu uhu nggàndumu lai MIRI, na Alami.

¹⁵Hapuiwa taropitu la Hiungu, na palindi-na i Ala, pakada-nya na banjaru ka na-puaha, pulu pamba bata bokulu-wa.

¹⁶Pauhi-nyawa na banjaru nggubulu-na, dundilu-ya ka na-pamàtungu na banjaru. Mai karia-njawa da ma-kaweda, anakeda dàngu ana rarambu. Jiapa da mabidi pakuru umangu lupangu-ma damaimbu. Paràha-nja ka damàta-nja da kurungu-da.

¹⁷Paràha-nja ba hapajia-ha da ratu ma-lumungu la Umana i MIRI, ka dahii la njongana na ngia pawotu maraku dàngu na hanamba, ba dàngu paniida, “Nàmuya na banjaru-mu ou MIRI, àmbu màtanya na mangumu pa-makia,” ka wàda. Hi na-paakangu na banjaru hawiangu ba dapanii, “Ka nggini-yaka na Alada nyuda?” ka àmbu wàda.

¹⁸Tàka i MIRI na-hamata-ya na tanana, dàngu namila-nya eti na banjaru-na.

¹⁹Tuna nu nahema-naha nyuda, “Nàhu nyimi mbuu ndàbami kuwua-nggai: uhu nggàndumu, da angguru, dàngu mina haitungu nduma pangangu, ka pambihu ndàbakai. Nda kumàta-anggai ka pawawa-kai jàka ndia ka nariki-nggai paraï da banjaru.

²⁰Da pamba kabala weli diangu kuwàngga-ha napa, hawiangu kuweli-nja la maràda wara. Da juruda da mangia ngaba ku-dàhiku-ha la Tehiku Meti, da juruda da ma-malamiri ku-jukaru-nja la Tehiku Padua. Napa dawau da metida. Ku-patàlaru-ha ba mbàda pajàra-danggai nyimi.

²¹Àmbi mangàdatu dimi, ha woka, pambaha-ya na etimi; namuya na ma-bokulu pa-patumbu-nanggau i MIRI!

²²Ha dimi banda, àmbu na-hariwatu na kanandingu-mi. Damuru-ka nàhu da maràda rumba. Da-ràjingu-ka da wuada da pingi ai, dira bundungu-ha dawua angguru dàngu da wua kapilitu.

²³Ha rayatu la Hiungu hawola-wa! Hayidi dàngu kayaka-wa! ruku mbuu ndàbana na hàmu welingu lai MIRI Alami. La pamunju ruu ai natoma na urangu pawua-nanggai.[1] Na-papuru-nggai urangu la wula maringu, dàngu la pa-kameli ruu ai hama tuna welingu.

²⁴Napa ningu belika uhu nggàndumu la ngia pawari puruhu; da angguru dàngu da mina haitungu dambinu lembaru la ngia papohu.

²⁵Napa kuhilu ndàbaha da runggimi la nda - ndaungu ngananja kabala da ihi wokami. Ba Nyungga ma-paràha-nja da kabàba kabala lai nyimi.

²⁶Napa na-patoma na pangami dàngu hi imbihu. Napa kai pa-mangara-nya i MIRI Alami, nadu ba nadangu na pa-hangàtarungu pawunda-na lai nyimi. Na banjaru-nggu nda pa-paakangu wàngu-ayapa!

²⁷Ka pi-dimi-nyaka, ha Ihirailu ba ningga lai nyimi, dàngu Nyungga MIRI, ba Ala-mingga. Nda hili ningu hili hau Ala, hinggilu-nggu Nyungga ba didi meha-aka. Nda pahili pa-makia-ayapa na banjaru-nggu!” wàna.

²⁸“Hàlaka nu napa kuwua padaanya Ngahunggu na tau mbuu ndàbana. Napa da anami mini kawini da-patàka-nja da lii langunggu; da ma-kaweda lai nyimi napa da-ngalangu manggadipangu da bidi mini da bidi kawini pa-wuangu harii mataha.

²⁹La rehi nu ku-papuru-mbunya na Ngahunggu la matanggu paloku, ka miniya ka kawini-yakai,” wàna.

³⁰Dadangu da pa-hangàtarungu pawunda-nggu napa la awangu dàngu la pinu tana. Napa natumbu na pameti dua wiki, na roka epi dàngu na kutu epi ma-kangutingu.

³¹Napa na kapàtangu na mata lodu dàngu narara hama wai riaya na wulangu. Nuda mbuu ndàbada napa danjadi ba ndedipa natàka na Loduna i MIRI, na lodu pa-mangàdatungu dàngu pa-maringgingu!

³²Tàka na nyuna jàka nggamuya na ma-kamahi-nya na pa-ndulangu-na i MIRI, napa pa-pamara-ya. Napanii i MIRI, “La Yeruhali da tau papindi-nggu napa damara,” wàna.