Read Kambera AMUHU 3 Bible Online

AMUHU 3 - Kambera bible

AMUHU 3

¹Rongu-yawa yiana na lii languna i MIRI, ha dimi banjaru Ihirailu pambàda luhu ngàndina i MIRI welingu la Mehiru! Napanii i MIRI,

²“Welingu la mbuu ndàba banjaru la pinu tana, didi mehakai nyimia banjaru patanda-nggu dàngu pa-hamata-nggu. Nuna-duyaka, na ma-pawitingu hi da-bokulu da njalami, hi lupa kuhuku-nggai,” wàna.

³Peku laku pa-kariangu-da ihu da tau madua, bundu nda pahama hahangu-da?

⁴Na-kangaüku ihu na hinga la omangu, jàka ndedi na-ngalangu payàpa-na? Na-kangaüku ihu na ana hinga welingu la liangu-na jàka ndedi nggàra payàpa-na?

⁵Pa-hanggàlu-ya ihu na ma-hawurungu, jàka nda pa-batangu hiru? Na-paràpitungu ihu na remba jàka nda ningu payàpa?

⁶Nda na-kandàndaku ihu na tau la paraingu jàka rongu lingu taropitu tanda pabera? Peku nggàna-nanya ihu tàparu na hau paraingu jàka nda na-pangàndi-nya paraïna i MIRI?

⁷I MIRI Hupu Majangga nda ana nggàra-a pawunda-na bundu nda peka-nanya na pawuku-na la atana, ba hapajia-ha da wunangu.

⁸Jàka na-kangaüku na hinga, nggamu manda mangàdatu? Jàka na kareuku i MIRI Hupu Majangga, nggamu majia kandii biana dàngu hi nda na-bobaru-ya na lii languna?

⁹Bobaru-ya yiana la tau na ma-ndàdiku la uma manandangu la Mehiru dàngu la Àndutu, “Pauhi-wa la palindi - palindi la winggiru-na na Hamaria dàngu hamata-ya na payiti yaüngu nda najaru dàngu da pa-kapidihu pawunda lai nu,” wàna.

¹⁰Napanii i MIRI, “Da tau nuda da-paihi-nja da uma manandangu dàngu wàngu banda pangala-da welingu la pa-kapidihu dàngu pa-janggilu-da. Dàngu nda ana pingu-mada pa-patutungu.

¹¹Rukuna nuna napa na-nggupulu-ya muhu na tanada, pa-pakabu-ha da ngia pa-torungu-da hi rambanja da uma manandangu-da.

¹²Hama tuna na haàtu mini pawangu ba jia-ma-aha da dua mbungu wihi jàka ndia na ha-kadipu kahilu pangala belina welingu la mbimbina pambàda hoba hinga, tuna numbu napa ba hakudu-a ma-ndàdiku welingu la tau Hamaria nàhu ma-katuda pa-hàmungu la ngia pa-katuda ma-mibilu-da,” wàna.

¹³Napanii i MIRI Hupu Mambiha dàngu Hupu Majangga, “Patingi pahàmungu nàhu, dàngu panamu-nja da ana umbuku-na i Yakupu.

¹⁴La lodu huku-nggunja da tau Ihirailu ruku njalada, ku-patàlaru-ha napa dangia pawotu maraku la Mbetilu. Nimbihu ngia pawotu maraku pa-poraku-ha da hu - hupuda, hi da-kanabu la tana.

¹⁵Napa ku-pakabu-ha da uma ngia pa-hangahu la wula urangu dàngu la wula wandu. Da uma pa-pamananda wàngu nggedingu danjoru; mbuu ndàba da uma ma-bokulu dakabu.