Read Kambera AMUHU 5 Bible Online

AMUHU 5 - Kambera bible

AMUHU 5

¹Pa-tingingu dimi ha banjaru Ihirailu! Ka ludunja hapungu ludu handuka, wànggu-nggai:

²Mbàda njoru-naka na Ihirailu na mabidi kawini-iyapa, ndia jia hadangu-anapa! Pa-màtangu-ya la tana wikina, nda ningua mandula-ya pa-ndolaku.

³Napanii i MIRI Hupu Majangga, “Na hau na paraingu la Ihirailu na-pamàtungu 1.000 panjuri, tàka da mabeli hangahu-ada; na paraingu hawiangu na-pamàtungu tau hangahu, da mabeli hakambulu-ada,” wàna.

⁴Napanii i MIRI la banjaru Ihirailu, “Beliwa lai Nyungga, jiangu-ma napa bai luri.

⁵Àmbi luadu pa-lumungu la Mbiruhemba. Àmbi himbuka la Mbetilu, ba na-molungu napa na Mbetilu. Àmbi luambu la Nggi-nggalu, ba pa-dundilu la ngia pa-tanawangu-ha napa, da ma-ngiangu la paraingu nuna,” wàna.

⁶Beliwa lai MIRI, jiangu-ma napa bai luri. Jàka ndai beli lai Nyuna napa namai hama tuna epi ma-làmbatu-ya na matunu pambuta-ya na tau Ihirailu. Nda haàtu-a la Mbetilu ma-ngalangu papàda-ya nuna na epi.

⁷Nai-a-ai nyimi, nyimi ma-kabeli puhaya na mamola dàngu ma-rumbaku ngaba tau!

⁸I MIRI-ma mawulu-ha da kandunu la ma-kahàna — na kandunu Mbalàtiku dàngu Kàratika. Na-pambeli-ya harii na kapàtangu tàka na lodu na-pambeli-ya rudungu; na wai welingu la tehiku naràba-ya la mara. Na mawunda-ha nuda mbuu ndàbada i MIRI-ya na tamuna.

⁹Na-patàlaru tau maningu kawahangu pa-kariangu ngia pa-torungu-da.

¹⁰Ihuda etinya na tau na ma-ndubaku manda mola dàngu na mapanii pa-tànjingu la ngia pa-pàtandangu ngera.

¹¹Ikapidihu tau mila dàngu iwàhiha da uhu nggàndumu-da. Rukuna nuna ndai ndàdiku-apa napa la uma manandangu pawulu-mi. Ndai unungu-a angguru welingu la woka angguru da pa-pamula-mi.

¹²Kupinya nggi tuda bokulu-da da akatu-mi dàngu nggi tuda danguda da njalami. Ikapidihu tau hàmu; ikei pawua pa-runungu dàngu imàtanja da tau mila la pànda palua-nja mamola la ngia pa-patandangu ngera.

¹³Rukuna na pawunda-mi nuna, rihi hàmu kandii bia la rehi akatu tungu yia, hi wàda da tau manggàna la etida.

¹⁴Pamukarungu-wa pawunda mahàmu, dàngu àmbi wundadu ma-akatu kai luri. Napa i MIRI Ala Hupu Mambiha na-ndàdiku langatàka-ma la hongami hama tuna na papanii-mi.

¹⁵Huda eti-nyawa na ma-akatu mbuha-nyawa na mahàmu dàngu pamàndu-nyawa na mamola. Talànga wanguna nanamu-ha napa i MIRI da tau pa-manjabii la banjaru Ihirailu.

¹⁶I MIRI Ala Hupu Mambiha napanii, “La a - ànda la paraingu, na-padudurungu dàngu na-pangodungu napa na tau paraï pa-hawina. Jiapa da tau raïngu pa-paaungu-mbuha ka dahii dànja da tau pa-wuangu wunda la pahiingu mameti.

¹⁷La mbuu ndàba woka angguru, na-padudurungu napa na tau ba mai-nggunya pahuku-nggai nyimi. Nyungga yia MIRI, mambàda panii,” wàna.

¹⁸Langatàka nai-a-ai nyimi marinju-nya na Loduna i MIRI! Nggàra linguna na lodu nuna lai nyimi? Na lodu nuna lodu ma-kapàtangu ma-aya, nda lodu maharii-aya ndumami.

¹⁹Na ngerana hama tuna na tau mapalai welingu la hinga, tàka pa-hàmburu dàngu-nanyai mbaruangu. Jàka ndia hama tuna na tau mabeli la umana ma-panyuka wàngu limana la kangeli, hi nggepi kati-nanyai kataru!

²⁰Na Loduna i MIRI lodu mangàndi kapàtangu-maya, nda lodu harii-aya — lodu panggumungu dàngu lodu lamaru-ya.

²¹Napanii i MIRI, “Huda eti-manggunya dàngu nalabu na etinggu paita-ya na mba - mbabu la huri lumungu-mi!

²²Jàkai wotu kameti maraku patunu dàngu tanda maraku uhu nggàndumu, nda jia yema-angguha. Nda ku-mbuhangu-a payema-ha da bandami da ma-mboka da pawotu-mi lai Nyungga ka kameti pa-papeku wànguha.

²³Pànjanja da ludumi da ma-pakawanga kahilu; nda ku-mbuhangu-a parongu-ya bai jungga.

²⁴Narihi hàmupa, kai pa-mukarungu ka hama lulungu waiya na mamola, dàngu ka hama luku manda ana mihiya na tànji eti.

²⁵Ha dimi banjaru Ihirailu, ba kulonda-kai la marada telangu ba patu kambulu ndaungu mandaina, nda ku-karuhi-a tanda maraku dàngu kameti maraku lai nyimi.

²⁶Tàka nàhu nyimi ilumunya na Hakutu, hanganji-manya ba wàmi, dàngu na Kewangu, na kandunu pa-marapu-mi. Tàka nàhu lupangu, idanda wiki-nja nuda da kahala hada,

²⁷jàka kuwàru-nggai la tana marihi marau welingu la Ndamàhiku. Nyungga yia MIRI, ma-tamungu Ala Hupu Mambiha mambàda panii,” wàna.