Read Kambera AMUHU 6 Bible Online

AMUHU 6 - Kambera bible

AMUHU 6

¹Nai-a-ai nyimi maluri lànyapu la Hiungu, dàngu nyimi ma-mambiru la Hamaria — nyimi dimi ha ma-pangora la panggolu banjaru Ihirailu, nyimi pakàli mai tomana na rayatu pakarai pa-ndulangu!

²Luawa patà-ngaru la Kàlani kai mangu palaku pangalangu la parai Hamàtu na ma-bokulu, hàlaka nu la parai Nggàta la Pilitingu. Bai kakaya darihi hàmupa da paraingu nuda wàmi, welingu la pa-hanganji Yahunda dàngu Ihirailu? Narihi lerangu-pa na tana ngabada nyuda welingu la tana ngabami nyimi?

³Ipa-dàdungu ba na-marau-mapa na lodu ura mila, tàka na pawu-ndami parengga-wa pàku-ananya na tàkana na lodu nuna.

⁴Nai-a-ai nyimi ma-katuda la ngia pa-katuda mbotu wili, dàngu mambabu wàngu tolu hapi dàngu tolu mbimbi kanguraku!

⁵Imbuhangu pa-lawitingu ludu, hama tuna na pawàna i Ndautu, dàngu iwotuha la jungga nuda da ludu.

⁶Iunungu angguru welingu la kaha papinu, dàngu itungu mina mbii kati mahàmu halawàla, tàka ndai hawina-a ba na hadànjalu-na Ihirailu.

⁷Tuna nuduka hi nyimima napa pa-kawunga dundilu la ngia pa-tanawangu. Hupu njàpu-daka napa da mbabu dàngu da pamangu-mi.

⁸Wàngu kawàndi-na i MIRI Ala Hupu Mambiha dàngu Hupu Majangga ba na-wuangu-ya yiana na lii panamu, “Huda eti-manggunya na abungu-na na banjaru Ihirailu; nda kumbuha-anja da uma manandangu dàngu da uma borakungu-da. Napa kuwua-ya la muhu na parai puhu pareta-da dàngu na ihi-naka,” wàna.

⁹Jàka ningupa tau hakambulu mamai pa-kawiningu la hau uma, dameti-mbu napa.

¹⁰Na haàtu kalembi-na na ma-pangaba patani-nya, napa namai pa-paluhu-ya na metina na anguna. Napa nawara-nya na tau na maninya la rowa kajia uma, “Màla ningupa hiana maluri hinggilu-mu nyumu?” wànanya. Tàka hi ronguya na hemana, “Ndia!” wàna. Ka panii-naka napa nu na kalembi-na na ma-pangaba patani-nya na mameti, “Àmbu hili kareuku dupa! Nda peku ana ka tikiya na tamuna i MIRI,” wànanya.

¹¹Jàka na-wuangu-ka pareta i MIRI, pa-pakabu-haka napa da uma bokulu da uma kudu.

¹²Da-ngalangu papalai la tandula watu ihi da njara? Mbàda ninguka maluku tehiku ihi wàngu hapi? Tàka nyimi dimi ikabeli pu-haya na mola hi nanjadi-ya ma-maüku pameti wàngu, tàka na ma-mànangu hi nanjadi-ya manjala.

¹³Ipanii abungu ba mbàda pakàku-minyaka i Londimbàru.[4] Ipaniimbu, “Natoma-ma duma na kapingatu-ma la pawàhi-ya na Kàranaimu,”[5] wàmi.

¹⁴Panii wiki-mana i Ala Hupu Majangga dàngu Hupu Mambiha, “Ha dimi banjaru Ihirailu, napa ku-pangàndingu tanatara welingu la banjaru tau hangàdangu pa-kaluluku-nya na tanami. Napa da-roduku-nggai piti weli diangu la ànda ma-hanggangu la Hamàtu lundu hu luru la Lola Aramba,” wàna.