Read Kambera AMUHU 7 Bible Online

AMUHU 7 - Kambera bible

AMUHU 7

¹Ku-ngalangu hau harii mata welingu lai MIRI Hupu Majangga. Kuita-ya ba na-padikangu habàba bokulu kabala la rehi hàlana pakaü rumba nduma hanganji na tau, dàngu ba na-pakiringu pahili kalunga na rumba.

²Da kabala nuda datika pangaa pambuta-ha mbuu ndàba da matumbu la tana. Tunaka nu hi kupanii, “MIRI Hupu Majangga, jàma-nyawa na banjaru-mu! Lalu màrahu-da dàngu dala-manga, nggiki hama torungu biada?” wànggu.

³I MIRI na-panjilu-nya na pawuku-na hi napanii, “Nda nanjadi-apa napa nuna na paita-mu,” wàna.

⁴Kuhili ngalangu hau harii mata welingu lai MIRI Hupu Majangga. Kuita-ya ba talànga hawanjiru-na pahuku wànya epi na banjaru-na. Na epi nuna na pamihi pambuta-ya na tehiku lerangu la unu tana[6] dàngu na-pakiringu pa-pakehi-ha da woka.

⁵Kupanii, “Ou MIRI Hupu Majangga, papànja àru-kinya na epi! Dira màrahu dàngu lamanga-ya na banjaru-mu, nggiki hama torungu biada?” wànggu.

⁶I MIRI nahili panjilu-nya na pawuku-na hi napanii, “Napa yiana nda nanjadi-mbu,” wàna.

⁷Ku-ngalangu hili hau harii mata welingu lai MIRI. Kuita-ya ba na-ndolaku la hau karaha kangeli pa-pahadangu ba wàngu pawala-nya liku hukutu tinjangu. Nakita-nya na liku hukutu la limana ka ita wànya jàka natànji du na tinjangu-na na kangeli, jàka ndia.

⁸Na-paàra-ngga, “Nggàra paita-mu Amuhu?” wànangga. Kuhema-ya, “Liku hukutu tinjangu MIRI,” wànggunya. Hi napanii i MIRI, “Hi kuwànya yiana na liku hukutu ka ku-paitangu-ya ba hama kangeli manda tànjiya na banjaru-nggu. Nda kuhili panjilu-anyapa na pawuku-nggu, jiangu-maka ba kuhuku-nja.

⁹Da pangia, da patuda ngia pa-lumungu da ana umbuku-na i Ihàku pa-pakabu-ha napa. Pa-nyungguru-ha napa da pangia matua-da da tau Ihirailu. Napa ku-patàlaru-ha da ana umbuku-na i Hanganji Yerumbiamu,” wàna.

¹⁰I Amanjia na ratu la Mbetilu, na pangàndi-nya na lii pa-patàkangu lai Yerumbiamu na hanganji Ihirailu, “Pahama kangunduhungu-danya i Amuhu dàngu na rayatu la pa-ndubaku-ya i Tamu Umbu. Na kareuku-na na rundaya napa na rayatu hi na-paruha-ya na tana yiana.

¹¹Napa nameti la pa-hànjalungu i Tamu Umbu, dàngu pa-ndundilu-ya napa la ngia pa-tanawangu na tau Ihirailu, marau welingu la tana wikida, wàna ba napanii,” wàna.

¹²Tunaka nu ka panii-nanyaka i Amuhu i Amanjia, “Ha dumu wunangu, beliwa la Yahunda! Pa-bobarungu-wa lai nu. Màtawa nyuda ka dawua-nggau paluri wàngu!

¹³Àmbu hili pa-bobarungu dupa la Mbetilu. Na paraingu yiana, pa-pahinggilu nduma hanganji, dàngu ngia pa-lumungu-na na banjaru nggubulu-ya,” wàna.

¹⁴Nahema i Amuhu, “Nyungga duku nda wunangu pa-waingaba-aka. Tau kabua banda dàngu matanggu pàpu wua kapilitu-ka duku làti.

¹⁵Tàka i MIRI napaau-ngga welingu la paràma-nggu, hi na-palewa-ka pa-patàka-nya na lii languna la tau Ihirailu.

¹⁶Jia ba tuna patingi-nyawa jàka nggàraya na papanii-nanggau i MIRI. Rukuna bau hiringga papa-bobarungu ndubaku-ya na banjaru Ihirailu.

¹⁷Napanii i MIRI ba nanjadi kawini pahunda napa na papaha-mu la a - ànda la paraingu, dàngu pa-pameti la pa-hànjalungu-ha da anamu. Napa papabe - beringu la tau hawiangu-ya na tanamu, tàka nyumu wiki napa umeti la tana tau manda tandaya i MIRI. Da mangia-nya la Ihirailu jiangu-ma ba dundilu-ha la ngia pa-tanawangu, marau welingu la tana wikida,” wàna.