Read Kambera AMUHU 8 Bible Online

AMUHU 8 - Kambera bible

AMUHU 8

¹Kuhili ngalangu hau harii mata welingu lai MIRI Hupu Majangga. Kuita-ya ba hauna na katanga ma-ihingu wua ai mambàda rara.

²Na paàrangu i MIRI, “Nggàra paita-mu Amuhu?” wàna. “Hau katanga ma-ihingu wua ai mambàda rara,” wànggu ba kuhema. Napanii i MIRI, “Rara-nanyaka na rehi ndumana na banjaru-nggu na Ihirailu. Nda kuhili panjilu-anyapa na pawuku-nggu dàngu jiangu-maka ba hukunja.

³La lodu nuna da ludu la uma hanganji napa danjadi-ha hii padudurungu. La nggi - nggini da-palimbangu da mameti pambàda wàru kangunduhungu,” wàna.

⁴Rongu dimi ha tau ma-kapidihu tau mamila la tana yiana hi lupa da-tàlaru!

⁵Ipanii la wikimi, “Ai, kanjupu mandaiha da lodu mbabu. Ka taluu hili dangganja da uhu nggàndumu-nda wàndaka lati, tàka na mbabu ndedima nanjàpu. Pirangu-mapa-ihu nanjàpu na lodu Hangahu ka peku pakiringu-nda pahili danggangu? Rinju halawàlangu-manda-nyaka làti pa-awahu padangu utu, pa-panyonga wàngu takaru, dàngu pa-palapingu wàngu timbangu.

⁶Peku pambotu-ndanja wilida da uhu nggàndumu maruha ba tadangga-nja. Tahimbu tau mamila manda màka pa-mbayaru wutana, jiapa ka hama wili halapa-aha, ka ta-keiya ka taata-nya,” wàmi.

⁷Mbàda harangu-naka i MIRI, na Ala banjaru Ihirailu, “Nda jia maromba-anggunja da pa-wundada da ma-akatu.

⁸Napa na-kandàndaku na pinu tana dàngu na-handuka ndàba na tau. Na tana nggubulu-na napa na-kanggauhaku dàngu nanggiulu nggaulu hama tuna na Luku Nilu.

⁹Napa na toma na rehina na-pawiti-nggunya natama-na na lodu la tidu lodu hi na-kapàtangu la lodu na pinu tana. Nyungga yia, MIRI Hupu Majangga, mambàda panii.

¹⁰Da mbabumi ku-pahilu wànja handuka, tàka da ludumi ku-pambeli-ha hii padudurungu. Ku-pawiti-nya kai kikiru lunggimi dàngu ikalambungu karungu tanda hawina. Napa hama tuna ina dàngu amakai mahiingu ana kamehangu-da na mameti. Nanjàpu wàngu handuka dira matiki napa na lodu nuna,” wàna.

¹¹I MIRI Hupu Majangga napanii, “Napa natoma na rehina na-patàka-nggunya rimba pa-nggàbalungu la tana yiana. Na-rimbangu napa na tau, tàka nda rimbangu-danya pangangu-a. Namadau napa na tau tàka nda madaungu-danya waia. Rimbangu dàngu madaungu-danya lii langunggu.

¹²Danjada weli diangu lundu hu luru dàngu weli la pahunga lodu lundu la patama lodu napa na tau la pahimbu-ya na lii langunggu, tàka nda jia hunggu-adanya.

¹³La lodu nuna dameti widi da bidi tau da ma-hayandalu paraï pa-kandànga.

¹⁴Napa danjoru hi nda dahili hadangu beli — da tau da mahara wànya na marapu Hamaria, ‘Parongu-na na marapu banjaru Ndàngu’, jàka ndia, ‘Parongu-na na marapu Mbiruhemba,’ da-mawàda,” wàna.