Read Kambera AMUHU 9 Bible Online

AMUHU 9 - Kambera bible

AMUHU 9

¹Kuita-ya ba na-ndolaku i MIRI la lihi ngia pawotu maraku. Na-wuangu-ya na pareta yiana, “Palu pawàndi-nja da hupu kambaniru la Umanggu ka na-kanggauhaku ndàba na hanamba. Panjoru-ha nuda da kambaniru la pinu katiku tau. Da manda meti napa ku-pameti-ha la pabera. Nda haàtu-a ma-ngalangu papalai, nda haàtu-mbu napa mamara.

²Jiapa-kai ka dalumbu làpahu la pangia tau meti, napa ku-yayapu-maha. Jiapa-kai ka dahei la awangu, ku-papuru-manja napa welingu lai nu.

³Jàka da-kawiningu la pinu Palindi Kàramilu, kuhimbu-maha napa hi kuyàpa-ha. Jàka da kawini pa-ràpungu la libu muru, napa ku-paràhangu nggarihu[7] pa-njàkapu-ha.

⁴Jàka da-tanawa-nja muhu napa ku-paràha-nja ka pameti-ha. Kita-mananya na etinggu la pa-patàlaru-ha nyuda dàngu la panda ndulaha,” wàna.

⁵Na-kanggauhaku na tana hi na-handuka na mangia-nya, rukuna ba na-jonggaru-ya paraïna i MIRI Hupu Majangga dàngu Hupu Mambiha. Hama tuna ba nahei dàngu ba nawawa na Luku Nilu, tuna numbu naheida hi da-kanabu.

⁶I MIRI na-pahadangu Umana la mamarau la ma-kahàna, la ditana na pinu tana natuya na awangu na hangguru-na ma hama kiri wurungu-ya, na wai welingu la tehiku naràba-ya la mara, na mawunda-ha nuda mbuu ndàbada i MIRI-ya na tamuna!

⁷Napanii i MIRI, “Ha dimi banjaru Ihirailu, ku-hamata-ya na tau Hundangu hama tuna ba ku-hamata kai nyimi. Ku-karia-nya na tau Pilitingu welingu la Kareta dàngu na tau Hiria welingu la Kiru hama tuna ba kukaria-nggai nyimi welingu la Mehiru.

⁸Nyungga MIRI Hupu Majangga, nàhu kanandaru-nggunya yiana na pa-hanganji Ihirailu na manjala, dàngu napa ku-pamolu-nya welingu la pinu tana. Na nyuna da ana umbuku-na i Yakupu nda ku-patàlaru ndàba-aha. Nyungga yia, MIRI mambàda panii.

⁹Napa ku-wuangu pareta dàngu kutàpi-ya na banjaru Ihirailu hama tuna na tau matàpi uhu nggàndumu la tàpi. Ka pa-hinggilu-ha mbuu ndàba da manda lingu la hongada, napa ku-haüru-nja la ba - banjaru.

¹⁰Dapanii da tau njala la honga banjaru-nggu, ‘Nda jia màta-ananda i Ala ka nanggàna-ta ura mila,’ wàda. Tàka na ma-langatàka nyuda pa-pameti-ha napa la pa-hànjalungu,” wàna.

¹¹Napanii i MIRI, “Napa natoma na loduna ba ku-pajia beliya welingu, na pa-hanganji-na i Ndautu. Nàhu hama tuna uma njoru-yaka nuna na pa-hanganji. Na nyuna napa ku-pahàmu-ha da kangeli-na dàngu ku-pahada belinja hi jia beliha hama tuna la handàka-na.

¹²Na tau Ihirailu na-kawaha-ya napa na tana Endumu tàdi bii dàngu mbuu ndàbana na banjaru mangunggu àmangu. Nyungga yia MIRI, mambàda panii dàngu napa ku-pahàra-manya duku nuna,” wàna.

¹³Napanii i MIRI, “Napa natoma na rehina ba kanjupu renggaha da uhu nggàndumu hi lupa nda na-kambotahu na rehi muti. Da pingi angguru da kahàruku pa-kabutuhu hi na-panua likungu pa-pandoi wai angguru na tau. Napa na-kambàtiku na wai angguru welingu la palindi - palindi hi na-lulungu welingu la tandula - tandula.

¹⁴Napa ku-pambokaru beliya na banjaru-nggu na Ihirailu. Napa dahili pahada belinja da paraingu-da da mambàda tanyu-ngguru, hi da-ndàdiku lai nu. Napa dapoka woka angguru, hi daunu-nya na angguru-na. Napa da-tondungu, hi dangaa-nya na ihina.

¹⁵Napa ku-banjàlu-ya na banjaru-nggu la tana pa-mbàda wua-nggunja. Nda pahili butuhu-ahapa welingu lai nu. Nyungga yia MIRI Alada mambàda panii,” wàna.