Read Kambera YUNUHU 1 Bible Online

YUNUHU 1 - Kambera bible

YUNUHU 1

¹La hau na lodu i MIRI napanii dànya i Yunuhu anana i Amitaï,

²“Luawa la Naniwa na paraingu bokulu, pa-pangàdu-nya, nadu ba kupii-manya ba kanjupu akatu-ya na mangia-nya,” wàna.

³Tàka i Yunuhu hili hàuya na ngia pa-hanggangu-na ba nalaku ka halairi-nya i MIRI. Nalaku la Yopa hi talànga tomangu-na kapalu ma-kamomatu palaku la Hapanyulu. Ba nahàla-ka pa-mbayaru wunda lakuna, hei-nanyaka la kapalu hi da-paliru pa-kariangu la Hapanyulu dàngu da tau kapalu, ka halairi-nya i MIRI.

⁴Napuru la pangia mahupu ngia wawa i Yunuhu, hi na-tanggilungu lai nu, hi na-katuda mangandu. Tunaka nu patàka-nanyaka ngilu mbangatu na tehiku i MIRI, hi natungu na làpuru ma-wirungu, na ma-nàhaku-ya na kapalu hi natika pa-taweharu. Kanjupu mangàdatu-ha ba hapajia-ha da tau kapalu hi dakala - ladaku pakarai pa-ndulangu, nimbihu-da la marapu wikida. Ka pa-wadaru-ya na pa-hanggàmaru[1] wàngu pa-tambulu, dawàru-nja la tehiku da ngàndi[2] kapalu.

⁶Ba napuru-ka hu wawa na anakonda kapalu toma-nanyaka lai nu ba talànga katuda-na i Yunuhu. Hi napanii, “Nggiki hama peku katuda biamu nyumu la matungu yia! Màla hadangu! Hamayangu-wa la marapu-mu pakarai pa-ndulangu. Raï hi nanamu biata hi nda ta-tàlaru,” wànanya.

⁷Ba daheika hu dita i Yunuhu dàngu na anakonda, panii-danyaka dua wikida da tau kapalu, “Màla, ka tatungu undi ka tapinya jàka nggamuya na manjala hi nanggàna-ta yiana na tàparu!” wàda. Tungu-danyaka undi, nanggàna-ya na tamuna i Yunuhu.

⁸“Deningu-na dumu ba nyumu ma-pawitingu la tàparu-yiana? Nggi welimu? Nggàra banjaru-kau? Nggikina hi ninggau yiahu?” hi wàdanya i Yunuhu.

⁹Nahema i Yunuhu, “Tau Imbarani-ka, i MIRI Ala la awangu, na ma-padika-nya na tehiku dàngu na mara, jiaya na palumu-nggu,” wàna.

¹⁰Tunaka nu hi napeka-ya jàka nggikina hi na-pamukarungu pa-halairi welingu la hanggana i MIRI. Ba darongu-ya nuna ka hama huka mangàdatu-daka da tau kapalu. “Ai, utoru mbeni pàku nyumu patumu nu!”[3] hi wàdanya.

¹¹Nu ba tuna parukangu-nanyaka pa-mbangatu na làpuru hi da-paàra-nya paraï da tau kapalu, “Nggiki-manggauka bàdi ka na-pànjangu yiana na làpuru?” wàdanya.

¹²Nahema i Yunuhu, “Kawuka biangga la tehiku, jiangu-ma duna na-pànjangu napa na làpuru. Nadu ba pi-nggunyaka nàhu, ba nyungga-maka ma-pawitingu hi kiri tàka-nanggai yiana na làpuru ma-wirungu,” wàna.

¹³Na nyuna da-pa-mukarungu dira matiki-mapa da tau kapalu pabuhi-ya na kapalu hanggangu la mara. Ba tuna hama huka hambutalu biana na làpuru, hi kahewa-ma-ana na pamukarungu-da.

¹⁴Tuna nuduka hi dawara lai MIRI, “Ou MIRI, ma-kamahi-nggau, àmbu pa-tàparu-kima rukuna ba ma-butuhu luri tau manda ana wunda manjala hanggangu lai nyuma. Ou MIRI, mbàda wunda-munyaka dumu na pawuku-mu,” wàda.

¹⁵Tunaka nu hi da-kawuka-nya la tehiku i Yunuhu. Ka pànjangu-nanyaka pa-hambutalu na làpuru.

¹⁶Kadira mangàdatu-danyaka i MIRI ba hapajia-ha nuda da tau kapalu, tàka ba daheika la mara, wotu-danyaka kameti maraku dàngu ma - màtu papeka-danya i MIRI.

¹⁷Nu ba tuna na pa-tàkangu heu iya bokulu i MIRI mamai pahoba-ya i Yunuhu. Ka ndàdiku-nanyaka la kambu iyangu i Yunuhu tailu mbua lodu tailu mbua rudungu mandaina.