Read Kambera YUNUHU 2 Bible Online

YUNUHU 2 - Kambera bible

YUNUHU 2

¹Welingu la kambu iyangu nuna, na-hamayangu i Yunuhu lai MIRI na Alana,

²“Ou MIRI, la handuka-nggu kuwara-nggau Nyumu hiu hemaka nyungga. Welingu la pangia tau meti kukarai pa-ndulangu, urongu dàngu utanaü-ya na pakarai-nggu.

³Ukawuka-ngga la pangia ma-manjolungu, lundu la lata kurunduu. Lai nu na-winggiru-ngga arihu wai, na-ndakilu-ngga ngalingu nda najaru.

⁴Mbàda wàngga-nanggaka i MIRI welingu la hanggana, nda jia hili ita-anggu-nyapa na uma matua ngia pa-ngiangu-na, wànggu ba kupanii la etinggu.

⁵Nahei lundu la tàda ngarunggu na wai tehiku, na-lumburu-nya tehiku lerangu na ihi-ngguka, nawindu-ya raü tehiku na katiku-nggu.

⁶Ku-linjungu lundu la lata palindi, la pangia ma-paràpitungu pindu bokulu-na lundu hupu njàpu rehi.[4] Naonja nanjili na ndewanggu daa la wikinggu, hi ku pangàda dàngu hi kuwara-nggau. Ka lundungu-nanyaka na hamayangu-nggu lai Nyumu, daa la Uma nggi matua-mu. Hiu padita-ka welingu la unu tehiku, ou MIRI Alanggu!

⁸Hapajia-ha da ma-lumungu marapu manda lingu, da-dunjaku-nggau dàngu nda da-tuturu-apa.

⁹Tàka nyungga duku napa kuludu-nggau ludu wotungu dàngu kuwotu-nggau kameti maraku. Mbuu ndàba da njanjinggu ku-pahàra-nja napa. Nyumu MIRI ma-pamànangu-kau,” wàna.

¹⁰Tunaka nu, la hupu liina i MIRI, namuta-nya la mara i Yunuhu paraïna nuna na iyangu.