Read Kambera YUNUHU 3 Bible Online

YUNUHU 3 - Kambera bible

YUNUHU 3

¹La pandua wundangu wàna, i MIRI napanii danya i Yunuhu,

²“Luawa la Naniwa, na paraingu bokulu, dàngu patàka-nyawa na rayatu-na, na lii langu pawua-nggunggau nyumu,” wàna.

³Ka pa-namatungu-nanyaka lai MIRI i Yunuhu hi na lua la Naniwa, na hau paraingu ma-kanjupu bokulu; hi lupangu tailu mbua loduma ba lakunya.

⁴Natama-nya nuna na paraingu i Yunuhu, tàka ba hau lodu titapu-naka ba nalaku, pakiringu nanyaka pa-pabobarungu, “Patu kambulu lodu kika, kabu-nanyaka na Naniwa!” wàna.

⁵Da ma-ngiangu la Naniwa dawaiya nuna na lii languna i Ala. Nggubulu na rayatu dabota-ya la pa-puaha, dàngu mbuu ndàba na tauka, ka ma-matua-ya ka anakeda-ya, da kalambungu karungu la pa-paloha-nya na halaera-danja da njalada.

⁶Ba narongu-yaka na langu nuna paraïna hanganji Naniwa, puru parenggangu-nanyaka welingu la kanjàka pareta-na. Na-kalàba-ya na kalembi pareta-na hi na-kalambungu karungu, ka mandapu-nanyaka la kumburu tana.

⁷Na-bobaru-mbuya nyuna na lii pa-kadangu yiana, “Yiana na pareta pa-paluhu la Naniwa-ya la botangu hanganji dàngu ba hapajia-ha da tau bokulu: Mbuu ndàba na tau, hapi, mbimbi dàngu banda hawiangu pa-hiringu-ha la pangangu pa-ngunungu.

⁸Tau dàngu banda lupangu-ma da-kalambungu karungu. Ka tanda halaera-ya lupangu-ma na-hamaya weli etingu lai Ala na tau. Lupangu-ma da-pahàmu-ha da huri luri akatu-da dàngu da pawunda-da da-mambinu wàngu njala.

⁹Raï ai duna hi na-panjilu-bianya na pawuku-na i Ala dàngu hi nda nahili hàngganda, hi nda tatàka-nya na tàparu!” wàna.

¹⁰Naita-ya i Ala na pawunda-da; naita-ha ba mbàda dunjakungu-daka huri luri akatu-da. Ka panjilu-nanyaka na botangu-na, hi nda nanjadi-apa pahuku-nja.