Read Kambera DIHA 10 Bible Online

DIHA 10 - Kambera bible

DIHA 10

¹I MIRI napanii-nya i Muha,

²“Pandoi-wa dàmbu taropitu welingu la àmahu bara patuku, ka paau wànya na rayatu pa-pauhi jàka ndiakai ka paràha wànya palaku.

³Jàka handàka pamalai-ha nu ba dambuda, na ihina, na banjaru mbuu ndàbana lupangu-ma na pauhi la winggiru-na na pindu Maünggu.

⁴Na nyuna jàka hau-ana na pa-palingu, hapajia-ha da ma-pangora-a da ma-pauhi la winggiru-mu nyumu.

⁵Jàka palingu pakaba - babaya na tandana nuna, da kabihu da ma-pamaüngu la pahunga lodu lupangu-ma dalaku.

⁶Jàka palingu pakaba - babaya la pandua wundangu wàna, da kabihu la mbara luru lupangu-ma dalaku. Ba tuna, na lingu makaba - baba na ihina lupangu-ma nalaku na banjaru,

⁷jàka na lingu pa-malaingu na ihina lupangu-ma na-pauhi na banjaru.

⁸Da mapini-ha da taropitu lupangu-ma ba hapajia-ha da ratu, da anana i Harungu. Nunaya na kalaratu na panunju-mami bàdi lundu nu - nu.

⁹Tàka jàka pabera-minya la tanami la pa-padàdu-nya na tanami welingu la nàhaku-nanya muhu, palingu-ha nuda da taropitu. Napa Nyungga duku MIRI Alami, kundula-kai dàngu ku-pamara-kai welingu la muhumi.

¹⁰Hamangui la lo - lodu mbàha etimi nu la re - remi Wulangu Bidi dàngu la mba - mbabu hawiangu-mi, lupangu ihapii-maha nuda da taropitu la rehi wotumi kameti maraku patunu dàngu kameti maraku papeku lai Nyungga. Napa duku Nyungga kundula-kai nyimi. Nyunggama MIRI Alami,” wàna.

¹¹La ndaungu padàmbu wàna la hambeli dunjaku-danya na Mehiru na banjaru Ihirailu, la tànggalu dua kambulu la wulangu dàmbu, dita-nanyaka na karumangu welingu la Maüna i MIRI.

¹²Ka hadangu-danyaka palaku ba da-pandutungu da tau Ihirailu ba da-dunjaku-nya na maràda telangu Hinai, tàka na karumangu hi na-padaingu ba natàka-ka la maràda telangu Paràngu.

¹³Nunaya na kawunga hadangu-da palaku nyuda la hupu liina i MIRI la ngaruna i Muha.

¹⁴Nalaku mangilu na pamba na makiri-ya na penji juru Yahunda, ba dapamba pandutu pamba: i Nahahungu anana i Aminandàpu na-kapipi-ya na ndalaru kabihu Yahunda,

¹⁵i Netaneyilu anana i Huaru na kapipi-ya na ndalaru kabihu Ihakàru,

¹⁶tàka i Eliapu anana i Helungu na kapipi-ya na ndalaru kabihu Hembulungu.

¹⁷Hàla, hi nyànggaru-ya na Maüna i MIRI, ka hadangu-danyaka palaku da kalibaru Nggerihongu dàngu Marari da maduku-ya nuna na Maü.

¹⁸Tunaka nu da-pandutungu da pamba da malaku kiriya na penji juru Rumbingu, ba dapamba pandutu pamba: i Elihuru anana i Handiuru na-kapipi-ya na ndalaru kabihu Rumbingu.

¹⁹I Halumialu anana i Hurihandai na-kapipi-ya na ndalaru kabihu Hamiungu,

²⁰tàka i Eliyahàpu anana i Rehuilu na kapipi-ya na ndalaru kabihu Nggàtu.

²¹Hàlaka nu hi da-pandutungu da tau Kehàtu da maduku-ha da banda da malanja ma-matua. Tàkangu ba wàda la ngia pa-pamaüngu ma-pandàkingu, mbàda hàlaka pahili pahada-nya na Maüna i MIRI.

²²Tunaka nu pa-ndutungu-danyaka da pamba da makiri-ya na penji juru kabihu Epuraïmu, ba dapamba pandutu pamba: i Elihama anana i Amihutu na-kapipi-ya na ndalaru kabihu Epuraïmu,

²³i Nggamalialu anana i Pandahuru na kapipi-ya na ndalaru kabihu Manahi,

²⁴tàka i Ambindàngu anana i Nggindioni na kapipi-ya na ndalaru kabihu Mbanyamingu.

²⁵La malamiri dehi hadangu-danyaka da pamba da-makiri-ya na penji juru kabihu Ndàngu. Jiaha nyuda-maka yiada da mamangga rimanya na hupu dehina mbuu ndàbana na juru. Dapamba pandutu pamba ba dalaku: i Ahiyehiru anana i Amihandai na-kapipi-ya na ndalaru kabihu Ndàngu.

²⁶I Panggialu anana i Okuràngu na kapipi-ya na ndalaru kabihu Ahiaru,

²⁷tàka i Ahira anana i Enàngu na kapipi-ya na ndalaru kabihu Nàputali.

²⁸Tuna nuduka na pandàki - pandàkingu-da ba da-pandalarungu, pamba pandutu pamba handàka - handàka hadangu-na na tau Ihirailu ba na-lelingu.

²⁹I Muha napanii-nya na yerana, i Hombàpu anana i Rehuilu tau Mindiangu, “Nyuma duma nàhu laku-manya la pangia papanii-na i MIRI, napa kuwua-nggainya ba wàna. Mbàda njanji-nanyaka mahàmu i MIRI na Ihirailu. Ba tuna tundu nggamawa nyuma, napa duma nyuma mahàmu-nggau nyumu,” wànanya.

³⁰Nahema i Hombàpu, “Malangu-kimuka, na nyuna, rinjungu-manggunya duku pabeli la tana la paraingu-nggu,” wàna.

³¹“Ai, àmbu dunjaku maràda-ki-nggama,” wàna i Muha, “peku paita-mu-nggama ànda ngia palii, nadu bau pinya nyumu jàka nggi ta-pahadangu ningu maü la maràda telangu.

³²Jàkau tundu-nggama nyuma, mbuu ndàba na mahàmu na pawunda-na-nggama nyuma i MIRI, tuna numai duma nyuma na pawunda-ma lai nyumu,” wànanya.

³³Ba da-dunjaku-nyaka na Hinai na banjaru Ihirailu, nu na palindi pangia-na i MIRI, laku-danyaka tailu mbua lodu mandaina. Na mangilu mànu-manja Pàti Pa-ràndingu-na i MIRI ka jàngapu pangia ngia pa-pahadangu-da maü.

³⁴Ba da-hadangu-ka palaku welingu la ngia pa-pamaüngu, ni mànu-manya la lodu na karumangu-na i MIRI la ditada nyuda.

³⁵Handàka hada - handàka hadangu ka ngàndiya na Pàti Pa-ràndingu ba wàdaka, napanii i Muha, “Hadangu-wa ou MIRI, paiha pa-tanyala-njawa da muhumu ka dapalai da tau ma-karaü-nggau eti,” wàna.

³⁶Hamangui handàka pànja - handàka pànjangu-na na Pàti Pa-ràndingu, napanii i Muha, “Beliwa, ou MIRI, yia la riu rata kuru uma Ihirailu,” wàna.